പാല്‍ഘറില്‍ ഹിന്ദു സന്യാസിമാരെ ജനക്കൂട്ടം മര്‍ദ്ദിച്ച് കൊലപ്പെടുത്തിയതിന് പിന്നില്‍ ഇടതുപക്ഷ ഗൂഡാലോചനയെന്ന് സൂചന. ഹിന്ദു സന്യാസിമാരെ ആക്രമിക്കാന്‍ ജനക്കൂട്ടത്തെ പ്രകോപിതരാക്കിയത് ഗ്രാമപഞ്ചായത്ത് അംഗമായ സിപിഎം പ്രവര്‍ത്തകനാണെന്നാണ് പുറത്തുവരുന്ന വിവരം. പ്രദേശവാസികളായ ചിലര്‍ സംഭവത്തിനു പിന്നില്‍ സിപിഎം നേതാവാണെന്ന ആരോപണവുമായി രംഗത്തെത്തുവരുന്നുണ്ട്.

സന്യാസിമാരുടെ കൊലപാതകവുമായി ബന്ധപ്പെട്ട് ഗ്രാമപഞ്ചായത്ത് അംഗമായ സിപിഎം നേതാവിനെതിരെ പോലീസ് എഫ് ഐആര്‍ രജിസ്റ്റര്‍ ചെയ്തിട്ടുണ്ട്. വടിയും മാരകായുധങ്ങളും നല്‍കി സന്യാസിമാരെ ആക്രമിക്കാന്‍ ജനക്കുട്ടത്തിന് നേതൃത്വം നല്‍കിയത് ഇയാളാണെന്നാണ് എഫ്ഐആറില്‍ പറയുന്നത്. കൂടാതെ ഇവര്‍ മരങ്ങള്‍ മുറിച്ച് വഴികള്‍ തടസ്സപ്പെടുത്തിയിട്ടുണ്ട്. നക്സലുകളാണ് ഇത്തരത്തില്‍ വഴി തടസ്സപ്പെടുത്തി ആക്രമണം നടത്താറുള്ളതെന്നും എഫ്ഐആറില്‍ വ്യക്തമാക്കുന്നുണ്ട്.

സന്യാസിമാര്‍ ആക്രമണത്തിന് ഇരയായ ഗാന്ധ്ചിന്‍ച്ചല്ലേ ഗ്രാമം ഇടതുപക്ഷത്തിന് ഭൂരിപക്ഷം ഉള്ള പ്രദേശമാണ്. ഇവിടെ യുവാക്കളെ മസ്തിഷ്‌ക്ക പ്രക്ഷാളനം നടത്തി ഇടത് സംഘടനയില്‍ ചേര്‍ക്കാറുണ്ടെന്നും പ്രദേശവാസികള്‍ ആരോപിക്കുന്നുണ്ട്. ഇവരെ ഉപയോഗിച്ച് സിപിഎം നേതാക്കള്‍ നിയമ വിരുദ്ധ പ്രവര്‍ത്തനങ്ങളില്‍ ഏര്‍പ്പെടുന്നതായും ഗ്രാമവാസികള്‍ പറയുന്നുണ്ട്.