ഗുജറാത്തില്‍ കോവിഡ് രോഗികളുടെ എണ്ണം ഏഴായിരം കന്നു. 24 മണിക്കൂറിനിടെ 29 പേരാണ് മരിച്ചത്. പുതുതായി 388 പേര്‍ക്ക് കൂടി കൊറോണ വൈറസ് സ്ഥിരീകരിച്ചതോടെ രോഗബാധിതരുടെ എണ്ണം 7013 ആയി. ഇതുവരെ രോഗമുക്തരായത് 1709 പേരാണ്. മരിച്ചവരുടെ എണ്ണം 425 അയി. രോഗികളുടെ വ്യാപനം കണക്കിലെടുത്ത് സമ്ബൂര്‍ണ ലോക്ക്ഡൗണ്‍ പ്രഖ്യാപിച്ചു.

കോവിഡ് 19 കേസുകള്‍ നിയന്ത്രിക്കുന്നതിനുള്ള അടിയന്തര നടപടിയുടെ ഭാഗമായി അര്‍ധരാത്രി മുതല്‍ നഗരത്തിന്റെ ചുമതല പുതുതായി നിയോഗിച്ച ഉദ്യോഗസ്ഥര്‍ ഏറ്റെടുത്തു. അഞ്ച് അധിക അര്‍ധസൈനിക വിഭാഗങ്ങള്‍ ബുധനാഴ്ച നഗരത്തില്‍ എത്തി. സമ്ബൂര്‍ണ ലോക്ഡൗണ്‍ പ്രഖ്യാപിച്ചതിനു പിന്നാലെ പരിഭ്രാന്തരായ ജനങ്ങള്‍ കടകളില്‍ തള്ളിക്കയറി. ചില സ്ഥലങ്ങളില്‍ സംഘര്‍ഷങ്ങളും റിപ്പോര്‍ട്ട് ചെയ്തു.

പാല്‍, മെഡിക്കല്‍ ഷോപ്പുകള്‍ എന്നിവ മാത്രം ഒരാഴ്ചത്തേക്ക് തുറക്കും. സൂപ്പര്‍മാര്‍ക്കറ്റുകള്‍, പലചരക്ക് കടകള്‍, പച്ചക്കറി വണ്ടികള്‍ എന്നിവ മേയ് 15 വരെ അടച്ചിടുമെന്ന് അഹമ്മദാബാദ് മുനിസിപ്പല്‍ കോര്‍പ്പറേഷന്‍ വ്യക്തമാക്കി. നഗരത്തില്‍ ഓണ്‍ലൈനില്‍ ഡെലിവറിയും നിരോധിച്ചു. നഗരത്തിലെ സ്വകാര്യ ആശുപത്രികളോടും ക്ലിനിക്കുകളോടും വീണ്ടും തുറക്കാന്‍ നിര്‍ദേശം നല്‍കിയിട്ടുണ്ട്. മാര്‍ച്ച്‌ 25ന് രാജ്യവ്യാപക ലോക്ഡൗണ്‍ പ്രഖ്യാപിച്ചതിനു പിന്നാലെ മിക്ക സ്വകാര്യ ക്ലിനിക്കുകളും ആശുപത്രികളും അടച്ചിരുന്നു. പകര്‍ച്ചവ്യാധി നിയമപ്രകാരം 1,000 കിടക്കകളുള്ള ഒന്‍പത് സ്വകാര്യ ആശുപത്രികളെ കോവിഡ് ആശുപത്രികളായി നിയമിക്കാനും തീരുമാനിച്ചു.