കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായുള്ള ക്രമസമാധാന പാലനത്തിനായി ഡല്‍ഹിയില്‍ നിയോഗിച്ചിട്ടുള്ള അര്‍ധസൈനിക വിഭാഗത്തിലെ 500 ഓളം ഉദ്യോഗസ്ഥര്‍ക്ക് വൈറസ് ബാധ സ്ഥിരീകരിച്ചു. വിവിധ യൂണിറ്റുകളിലെ സൈനികര്‍ക്കാണ് രോഗബാധ സ്ഥിരീകരിച്ചത്. സെന്‍ട്രല്‍, സൗത്ത് ഈസ്റ്റ്, നോര്‍ത്ത് ഈസ്റ്റ് ജില്ലകളിലെ യൂണിറ്റുകളില്‍ നിന്നാണ് ഭൂരിഭാഗം കേസുകളും റിപ്പോര്‍ട്ട് ചെയ്തിട്ടുള്ളത്.

ബോര്‍ഡര്‍ സെക്യൂരിറ്റി ഫോഴ്സിലെ (ആടഎ)195 സൈനികര്‍ക്കാണ് ഇതുവരെ കോവിഡ്-19 ബാധിച്ചത്. രോഗബാധയെ തുടര്‍ന്ന് രണ്ട് ബിഎസ്എഫ് ജവാന്‍മാര്‍ ഇന്നലെ മരിച്ചു. 191 ജവാന്മാരാണ് നിലവില്‍ ചികിത്സയിലുള്ളത്. ഇതില്‍ 130 ഓളം പേരുടെ രോഗബാധ ഡല്‍ഹിയുമായി ബന്ധപ്പെട്ടിരിക്കുന്നതായി ബിഎസ്എഫ് വക്താവ് അറിയിച്ചു. ക്വാറന്റൈനിലുള്ള ജവാന്മാരുടെ നിരീക്ഷണത്തിനായി ബിഎസ്എഫ് പ്രത്യേക സെല്‍ ആരംഭിച്ചിട്ടുണ്ട്.

സെന്‍ട്രല്‍ റിസര്‍വ് പോലീസ് ഫോഴ്സിലെ (ഇഞജഎ) 159 പേര്‍ക്ക് കൊറോണവൈറസ് ബാധ സ്ഥിരീകരിച്ചു. 900 ഉദ്യോഗസ്ഥര്‍ ഡല്‍ഹിയില്‍ ക്വാറന്റൈനിലാണ്. ആഭ്യന്തര മന്ത്രാലയത്തില്‍ പ്രത്യേക ഡ്യൂട്ടിക്ക് നിയോഗിച്ച രണ്ട് സിആര്‍പിഎഫ് ജവാന്മാര്‍ക്ക് രോഗബാധ സ്ഥിരീകരിച്ചതിനെ തുടര്‍ന്ന് ഇവരുമായി സമ്പര്‍ക്കത്തിലേര്‍പ്പെട്ടവരെ തിരിച്ചറിയാനുള്ള നടപടി ആരംഭിച്ചതായി മുതിര്‍ന്ന ഉദ്യോഗസ്ഥന്‍ അറിയിച്ചു. രണ്ടുപേരില്‍ ഒരാള്‍ ഡ്രൈവറും മറ്റെയാള്‍ കോണ്‍സ്റ്റബിളുമാണ്. സിആര്‍പിഎഫും പ്രത്യേക സെല്‍ രൂപീകരിച്ചിട്ടുണ്ട്.