അതിഥി തൊഴിലാളികളുടെ മേല്‍ ഗുഡ്സ് ട്രെയിന്‍ പാഞ്ഞുകയറി 15 മരണം. ഔറംഗാബാദ് നാന്ദേഡ് പാതയില്‍ ബദ്നാപുര്‍, കര്‍മാഡ് സ്റ്റേഷനുകള്‍ക്കിടയിലാണ് ഇന്നു പുലര്‍ച്ചെ 5.15 ന് ദുരന്തമുണ്ടായത്. മരിച്ചവരില്‍ കുട്ടികളുമുണ്ടെന്നാണ് പ്രാഥമിക വിവരം. റെയില്‍പാളത്തില്‍ കിടന്നുറങ്ങുകയായിരുന്ന തൊഴിലാളികളുടെ മേല്‍ ഗുഡ്സ് ട്രെയിന്‍ പാഞ്ഞു കയറുകയായിരുന്നു. ജല്‍ന ഔറംഗാബാദ് ട്രെയിനാണ് അപകടമുണ്ടാക്കിയത്.

ലോക്ഡൗണിനെ തുടര്‍ന്ന് മധ്യപ്രദേശിലേക്കു മടങ്ങുകയായിരുന്നു 21 അംഗ തൊഴിലാളി സംഘം. റെയില്‍പാളം വഴി നടന്നുപോവുകയായിരുന്ന ഇവരില്‍ ചിലര്‍ പാളത്തില്‍ത്തന്നെ കിടന്നുറങ്ങിയതാണ് അപകടത്തിന് ഇടയാക്കിയത്. റെയില്‍വേ സംരക്ഷണ സേനയും പൊലീസും സ്ഥലത്തെത്തി രക്ഷാപ്രവര്‍ത്തനം നടത്തി.പാളത്തില്‍ ആളുകള്‍ കിടക്കുന്നതു കണ്ട ലോക്കോ പൈലറ്റ് ട്രെയിന്‍ നിര്‍ത്താന്‍ ശ്രമിച്ചെങ്കിലും അത് ആളുകള്‍ക്കിടയിലേക്കു കയറുകയായിരുന്നെന്നും പരുക്കേറ്റവരെ ഔറംഗാബാദ് സിവില്‍ ആശുപത്രിയിലാക്കിയെന്നും റെയില്‍വേ മന്ത്രാലയം ട്വീറ്റ് ചെയ്തു.

അതിഥിത്തൊഴിലാളികളുടെ മരണത്തില്‍ പ്രധാനമന്ത്രി നരേന്ദ്രമോദി കടുത്ത വേദന രേഖപ്പെടുത്തി. സംഭവിച്ചതെന്താണെന്ന് അറിയണം അന്വേഷണം വേണമെന്ന് പ്രധാനമന്ത്രി പറഞ്ഞു മരണത്തില്‍ അനുശോചനം രേഖപ്പെടുത്തിയ കേന്ദ്ര ആഭ്യന്തരമന്ത്രി അമിത് ഷാ, എല്ലാ സഹായവും റെയില്‍ മന്ത്രാലയത്തിന് ഉറപ്പ് നല്‍കിയെന്നും, വാക്കുകള്‍ കൊണ്ട് പ്രകടിപ്പിക്കാനാത്ത വേദനയെന്നും പ്രതികരിച്ചു.

മുംബൈയുടെ പ്രാന്തപ്രദേശങ്ങളില്‍ നിന്ന് തൊഴിലില്ലാതായതോടെ കൈയില്‍ പണമില്ലാതെ, ടിക്കറ്റ് വാങ്ങാനുള്ള മാര്‍ഗവുമില്ലാതെ നാട്ടിലേക്ക് റെയില്‍വേ ട്രാക്ക് വഴി നടന്ന അതിഥിത്തൊഴിലാളികളാകാം ഇവരെന്നാണ് നിഗമനം. പുലര്‍ച്ചെ അഞ്ചേകാലോടെയാണ് അപകടം നടന്നതെങ്കിലും ഇവിടേക്ക് രക്ഷാപ്രവര്‍ത്തനത്തിന് അധികൃതര്‍ എത്താന്‍ പോലും ഏറെ സമയമെടുത്തു. ഗുരുതരമായി പരിക്കേറ്റ ഒരാള്‍ തൊട്ടടുത്തുള്ള സിവില്‍ ആശുപത്രിയില്‍ ചികിത്സയിലുണ്ട്. ഇദ്ദേഹത്തിന് സംസാരിക്കാനായാല്‍ മാത്രമേ ഇവര്‍ എവിടെ നിന്ന് വരികയായിരുന്നുവെന്നും, എങ്ങോട്ട് പോവുകയായിരുന്നുവെന്നും വ്യക്തമാകൂ.

ജല്‍നയിലെ ഒരു പ്രാദേശിക ഇരുമ്പ് ഫാക്ടറിയില്‍ ജോലി ചെയ്യുന്നവരായിരുന്നു ഇവരെന്ന വിവരവും പുറത്തുവരുന്നുണ്ട്. ജല്‍നയില്‍ നിന്ന് മധ്യപ്രദേശിലെ ഭുവസാല്‍ എന്നയിടത്തേക്ക്, ഏതാണ്ട് 170 കിലോമീറ്റര്‍ നടക്കാനായിരുന്നു ഈ സംഘം തീരുമാനിച്ചതെന്നാണ് പ്രാഥമിക വിവരമെന്ന് ഔറംഗബാദ് എസ്പി മോക്ഷദ പാട്ടീല്‍ പറയുന്നു. അവിടെ നിന്ന് നാട്ടിലേക്ക് തീവണ്ടി കിട്ടുമെന്ന് ആരോ പറഞ്ഞതനുസരിച്ചാണ് ഇവര്‍ യാത്ര പുറപ്പെട്ടത്. എന്നാല്‍ അവിടെ നിന്ന് എവിടേക്ക് പോവുകയായിരുന്നു ഇവര്‍ എന്നതില്‍ വ്യക്തതയില്ല.

സംഭവത്തില്‍ റെയില്‍വേ വിശദമായ അന്വേഷണം പ്രഖ്യാപിച്ചു. ''രാവിലെ തൊഴിലാളികള്‍ ട്രാക്കില്‍ കിടക്കുന്നത് കണ്ട്, ചരക്ക് തീവണ്ടിയുടെ ലോക്കോ പൈലറ്റ് ട്രെയിന്‍ നിര്‍ത്താന്‍ ശ്രമിച്ചെങ്കിലും കഴിഞ്ഞില്ല. സംഭവം നടന്നത് ബദ്‌നാപൂര്‍ - കര്‍മാദ് സ്റ്റേഷനുകള്‍ക്കിടയിലാണ്. ഇത് പര്‍ഭാനി - മന്‍മാദ് സെക്ഷനില്‍ പെടുന്നതാണ്'', റെയില്‍വേ മന്ത്രാലയം പുറത്തുവിട്ട വാര്‍ത്താക്കുറിപ്പില്‍ പറയുന്നു.