കൊറോണ വൈറസിന്റെ വ്യാപനത്തിന്റെ പശ്ചാത്തലത്തില്‍ രാജ്യസഭാ തെരഞ്ഞെടുപ്പ് അടക്കം നീട്ടിവെക്കേണ്ട സാഹചര്യമാണ് ഉള്ളത് . എന്നാല്‍, ഏറെ കാലം തെരഞ്ഞെടുപ്പ് നീട്ടിവെക്കാൻ സർക്കാരിന് കഴിയില്ല ..സാമൂഹിക അകലം പാലിച്ച് വോട്ടിങ്ങ് നടത്തുക എന്നതാണ് ചെയ്യാവുന്നതായുള്ളു. ഈ സാഹചര്യത്തിൽ ഓണ്‍ലൈന്‍ വോട്ടിങ്ങിന്റെ സാധ്യതകളെക്കുറിച്ചുള്ള ആശയം മുന്നോട്ട് വച്ചിരിക്കുകയാണ് അഡീഷണല്‍ സോളിസിറ്റര്‍ ജനറല്‍ സത്യ പാല്‍ ജെയ്ന്‍.

നിലവിലെ സാഹചര്യത്തില്‍ ആളുകള്‍ ഒത്തുകൂടുന്നതിനും പോളിങ്ങ് ബൂത്തില്‍ ചെന്ന് വോട്ട് നടത്തുന്നതും നടക്കില്ല. ഈ ജനക്കൂട്ടത്തെ ഒഴിവാക്കുന്നതിന് സര്‍ക്കാര്‍ ഓണ്‍ലൈന്‍ വോട്ടിങ്ങോ അല്ലെങ്കില്‍ പോസ്റ്റല്‍ വോട്ടിങ്ങിന്റെ സാധ്യതയോ പരിശോധിക്കേണ്ടതുണ്ട് എന്ന് അദ്ദേഹം അഭിപ്രായപ്പെട്ടു.

പഞ്ചാബ് സര്‍വകലാശാലയിൽ സംഘടിപ്പിച്ച വെബ്ദിനാറിൽ ഇന്ത്യയിലെ തെരഞ്ഞെടുപ്പ് ചട്ടങ്ങള്‍ എന്ന വിഷയത്തിൽ സംസാരിക്കുകയായിരുന്നു സത്യ പാല്‍ ജെയ്ൻ. മുതര്‍ന്ന് ബിജെപി നേതാവ് കൂടിയായ ജെയിന്റെ വാദത്തോട് എത്രമാത്രം ആളുകള്‍ പിന്തുണയ്ക്കുമെന്ന് കണ്ടറിയേണ്ടതാണ്.

ഭരണഘടന പ്രകാരം ഉദ്ധവ് താക്കറെയ്ക്ക് ഈ മാസം 27ന് മുന്‍പായി എംഎല്‍എ സ്ഥാനത്തോ എഎല്‍സി സ്ഥാനത്തോ എത്തേണ്ടതുണ്ട്. ചില രാഷ്ട്രീയ നീക്കങ്ങളുടെ ഭാഗമായി 2019 നവംബാര്‍ മാസം 28നാണ് മഹാരാഷ്ട്ര മുഖ്യമന്ത്രിയായി ഉദ്ധവ് താക്കറെ സത്യപ്രതിജ്ഞ ചെയ്ത് അധികാരത്തില്‍ എത്തുന്നത്. എന്നാല്‍, ഇതുവരെ അദ്ദേഹം ഒരു നിയോജക മണ്ഡലത്തില്‍ നിന്നും മത്സരിച്ച് വിജയിച്ച് എംഎല്‍എയോ എംഎല്‍സിയോ ആയിട്ടില്ല.

അതേസമയം, ഭരണഘടനയുടെ ആര്‍ട്ടിക്കിള്‍ 164 പ്രകാരം ഒരു മന്ത്രിയോ മുഖ്യമന്ത്രിയോ എംഎല്‍എ ആകാതെയാണ് അധികാരത്തില്‍ എത്തുന്നത് എങ്കില്‍ ആറുമാസത്തിനകം മത്സരിച്ച് എംഎല്‍എ ആകേണ്ടതുണ്ട് അല്ലാത്തപക്ഷം സ്ഥാനം തന്നെ നഷ്ടപെടാനും ഇടയുണ്ട്. അതിനാല്‍ തന്നെ അദ്ദേഹത്തിനും ഈ തെരഞ്ഞെടുപ്പ് നിര്‍ണ്ണായകം തന്നെയാണ്.

പുതിയൊരു ആശയമാണ് മുന്നോട്ട് വച്ചത് എങ്കിലും ഇന്ത്യയില്‍ ഇത്തരത്തില്‍ ഓണ്‍ലൈന്‍ വോട്ടിങ് സാധ്യമാകുമോ എന്നാണ് ഇപ്പോഴും ഉയരുന്ന സംശയം. കാരണം, ഓരോ തെരഞ്ഞെടുപ്പ് അവസാനിക്കുമ്പോഴും വോട്ടിങ്ങ് യന്ത്രത്തിലെ തകരാറുകള്‍ വലിയ വിവാദമാകാറുണ്ട്. ഒരിക്കലും ഹാക്കിങ് സാധ്യമാകില്ലെന്ന് സാങ്കേതിക വിദഗ്ദ്ധര്‍ അവകാശപ്പെട്ടാലും രാഷ്ട്രീയക്കാര്‍ ഇത് പതിവ് പല്ലവിയാക്കാറുണ്ട്. അതിനാല്‍ തന്നെ പുതിയ സംവിധാനങ്ങള്‍ രാഷ്ട്രീയ പാര്‍ട്ടികള്‍ അടക്കം എതിര്‍ക്കാനാണ് സാധ്യതകള്‍ കൂടുതലും.