കഴിഞ്ഞ 24 മണിക്കൂറില്‍ 3390 പേര്‍ക്ക് രോഗം സ്ഥിരീകരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു. രാജ്യത്ത് തുടര്‍ച്ചയായ മൂന്നാം ദിവസവും പ്രതിദിന കോവിഡ് രോഗികളുടെ എണ്ണം മൂവായിരത്തിനു മുകളിലായതോടെ രാജ്യത്ത് കോവിഡ് രോഗികളുടെ ആകെ എണ്ണം 56,342 ആയി. കഴിഞ്ഞ 24 മണിക്കൂറില്‍ 103 മരണങ്ങളാണ് റിപ്പോര്‍ട്ട് ചെയ്തത്. ഇതോടെ ആകെ മരണം 1886 ആയി. 16,540 പേര്‍ രോഗമുക്തരായി. 29.36 ശതമാനം രോഗമുക്തി. 37,916 പേരാണ് നിലവില്‍ ചികിത്സയിലുള്ളത്.

രാജ്യത്തെ 216 ജില്ലകളെ ഇതുവരെ കോവിഡ് ബാധിച്ചിട്ടില്ലെന്നും ആരോഗ്യ മന്ത്രാലയ ജോയിന്റ് സെക്രട്ടറി ലവ് അഗര്‍വാള്‍ അറിയിച്ചു. 215 സ്റ്റേഷനുകളിലായി 5231 റെയില്‍വേ കോച്ചുകള്‍ കോവിഡ് കെയര്‍ സെന്ററുകളാക്കി മാറ്റും. ഗുരുതരമല്ലാത്ത് രോഗികളെ ഇവിടെ ചികിത്സിക്കുമെന്നും ലവ് അഗര്‍വാള്‍ പറഞ്ഞു. നേരത്തെ കോവിഡ് സ്ഥിരീകരിച്ച 42 ജില്ലകളില്‍ കഴിഞ്ഞ 28 ദിവസത്തിനുള്ളില്‍ പുതിയ കോവിഡ് കേസുകള്‍ റിപ്പോര്‍ട്ട് ചെയ്തിട്ടില്ല. 29 ജില്ലകളില്‍ കഴിഞ്ഞ 21 ദിവസത്തിനുള്ളിലും പുതിയ കേസുകളില്ല.

കോവിഡ് വ്യാപനത്തിലും മരണ നിരക്കിലും മഹാരാഷ്ട്ര, ഗുജറാത്ത് സംസ്ഥാനങ്ങളാണ് മുന്നില്‍. ഡല്‍ഹിയിലും രാജസ്ഥാനിലും രോഗികളുടെ എണ്ണം ക്രമാതീതമായി വര്‍ധിക്കുന്നു. മഹാരാഷ്ട്രയില്‍ വെള്ളിയാഴ്ച 1089 പേര്‍ക്കാണ് കോവിഡ് സ്ഥിരീകരിച്ചത്. ആകെ 19,063 രോഗികള്‍. 24 മണിക്കൂറിനിടെ 37 പേര്‍കൂടി മരിച്ചതോടെ മരണസംഖ്യ 694 ആയി ഉയര്‍ന്നു. രാജസ്ഥാനില്‍ കോവിഡ് മരണം നൂറായി. കൊല്‍ക്കത്തയില്‍ സിഐഎസ്എഫ് ജവാനും ആഗ്രയില്‍ മുതിര്‍ന്ന മാധ്യമ പ്രവര്‍ത്തകനും കോവിഡ് ബാധിച്ച് മരിച്ചു. രാജ്യത്താകെ 35 സിഐഎസ്എഫ് ജവാന്മാര്‍ക്കും 195 ബിഎസ്എഫ് ജവാന്മാര്‍ക്കും ഇതുവരെ കോവിഡ് സ്ഥിരീകരിച്ചു.

ഛത്തീസ്ഗഡിലെ അര്‍ണാപുരില്‍ 23 തൊഴിലാളികള്‍ നിരീക്ഷണ കേന്ദ്രത്തില്‍ നിന്നും ഓടിപ്പോയി. ഹോട്‌സ്‌പോട്ടുകളടങ്ങുന്ന 75 ജില്ലകളില്‍ കോവിഡ് സമൂഹവ്യാപനത്തില്‍ എത്തിയോ എന്നറിയാന്‍ 400 പേരെ ഐസിഎംആര്‍ പരിശോധനയ്ക്ക് വിധേയരാക്കും. കോവിഡ് രോഗിയുമായി സമ്പര്‍ക്കം പുലര്‍ത്തിയില്ലെങ്കിലും രോഗലക്ഷണങ്ങള്‍ കാണിക്കുന്നവരെയാണ് പരിശോധിക്കുക. ഇതിനായി പ്രത്യേക സംഘത്തെ നിയോഗിച്ചു. നോയിഡയിലും ആദ്യ കോവിഡ് മരണം റിപ്പോര്‍ട്ട് ചെയ്തു. 61-കാരനാണ് മരിച്ചത്.