ഈ മഹാമാരി ലോകത്തെ വരിഞ്ഞുമുറുക്കിയിട്ട് മാസങ്ങളായി. എന്നിട്ടും ഒന്നും ചെയ്യാനാകാതെ പകച്ചുനില്‍ക്കുകയാണ് ലോകം. ഓരോദിവസവും കൊവിഡ് 19 വൈറസ് കൂടുതല്‍ പേരിലേക്ക് പടര്‍ന്നു പിടിച്ചുകൊണ്ടേ ഇരിക്കുന്നു. ലോകത്തെ നിലവില്‍ 7,731,662 പേര്‍ക്കാണ് കൊവിഡ് 19 വൈറസ് ബാധ സ്ഥിരീകരിച്ചത്. ഇന്നലെ മാത്രം 140,917 പേര്‍ക്ക് കൂടി പുതുതായി രോഗം പകര്‍ന്നു. ആകെ മരണസംഖ്യ 428,210 ആയി. ഇന്നലെയും യുഎസിലും ബ്രസീലിലും തന്നെയാണ് കൂടുതല്‍ കൊവിഡ് കേസുകള്‍ സ്ഥിരീകരിച്ചത്.

മൂന്നാം സ്ഥാനത്ത് ഇന്ത്യയാണ്. യുഎസില്‍ ഇതുവരെ 2,116,922 പേര്‍ക്ക് രോഗം വന്നപ്പോള്‍ 116,825 പേര്‍ക്കാണ് ജീവന്‍ നഷ്ടമായത്. ഇന്നലെയും 27,221 പേര്‍ക്ക് രോഗം ബാധിച്ചു. 791 പേര്‍ മരിക്കുകയും ചെയ്തു. ബ്രസീലില്‍ ആകെ 829,902 പേരെ വൈറസ് ബാധിച്ചപ്പോള്‍ 41,901 പേരെയാണ് മരണം കീഴടക്കിയത്. ഇന്നലെ 24,253 പേര്‍ക്ക് കൂടി വൈറസ് ബാധയേറ്റു. 843 പേര്‍ മരിക്കുകയും ചെയ്തു.

ചൈനയില്‍ നിന്ന് അപ്രത്യക്ഷമായി എന്നാണ് ചൈനീസ് അധികൃതരുടെ അവകാശവാദം എ്നാല്‍ കൊറോണ വൈറസ് വീണ്ടും തിരിച്ചുവരുന്നു എന്ന് വ്യക്തമാകുകയാണ്. രണ്ട് കോവിഡ് കേസുകളാണ് കഴിഞ്ഞ 24 മണിക്കൂറിനുള്ളില്‍ ബെയ്ജിങ്ങില്‍ റിപ്പോര്‍ട്ടു ചെയ്യപ്പെട്ടതിരിക്കുന്നത്. ചൈന ശരിയായ കണക്കുകളല്ല പുറത്തുവിടുന്നത് എന്ന വിമര്‍ശനത്തിനിടെയാണ് വീണ്ടും രോഗ ബാധ റിപ്പോര്‍ട്ട് ചെയ്യുന്നത്. നഗരത്തില്‍ പ്രഖ്യാപിച്ചിരുന്ന ഔട്ട്ബ്രേക്ക് എമര്‍ജന്‍സി മൂന്നില്‍നിന്ന് രണ്ടിലേക്ക് താഴ്ത്തിയതിനു പിന്നാലെയാണ് പുതിയ മൂന്നു കേസുകള്‍ ചൈനയില്‍ റിപ്പോര്‍ട്ട് ചെയ്യപ്പെടുന്നതെന്നാണ് ലോക മാധ്യമങ്ങള്‍ റിപ്പോര്‍ട്ട് ചെയ്യുന്നത്. 55 ദിവസങ്ങള്‍ തുടര്‍ച്ചയായി ഒരു പുതിയ കേസുകള്‍ പോലും റിപ്പോര്‍ട്ട് ചെയ്യാതിരുന്നതിനു പിന്നാലെയാണ് ഇപ്പോള്‍ മൂന്നുപേര്‍ക്ക് രോഗം സ്ഥിരീകരിച്ചിരിക്കുന്നത്.

ചൈനയിലെ മീറ്റ് ഫുഡ് കോംപ്രിഹെന്‍സീവ് റിസര്‍ച്ച് സെന്ററിലെ രണ്ടു ഉദ്യോഗസ്ഥര്‍ക്കാണ് രോഗം സ്ഥിരീകരിച്ചിരിക്കുന്നത്. 37ഉം 25ഉം വയസ്സുള്ള ഇവരെ ആശുപത്രിയിലേക്കു മാറ്റി. ഇവരുടെ സമ്പര്‍ക്കവഴി കണ്ടെത്താനും ബന്ധുക്കളെ തിരിച്ചറിയാനുമുള്ള ശ്രമത്തിലാണ് അധികൃതര്‍. ഇവരില്‍ ഒരാള്‍ ക്വിങ്ഡാവോ നഗരത്തിലേക്ക് കഴിഞ്ഞ ആഴ്ചയില്‍ യാത്ര ചെയ്തിരുന്നു.

അതേസമയം, കൊവിഡ് വലിയ പ്രതിസന്ധികള്‍ സൃഷ്ടിച്ചിരുന്ന സ്പെയിന്‍, ഇറ്റലി എന്നീ രാജ്യങ്ങള്‍ക്ക് കണക്കുകള്‍ ആശ്വാസമായി വരികയാണ്. ലോകാരോഗ്യ സംഘടനയുടെ കണക്കനുസരിച്ച് ഇന്നലെ സ്പെയിനില്‍ കൊവിഡ് ബാധിച്ച് ഒരു മരണം പോലും റിപ്പോര്‍ട്ട് ചെയ്യപ്പെട്ടിട്ടില്ല. 502 പേര്‍ക്കാണ് ഇന്നലെ രോഗം സ്ഥിരീകരിച്ചത്.

ഇറ്റലിയില്‍ ഇന്നലെ 163 പേര്‍ക്ക് മാത്രമാണ് പുതുതായി രോഗം വന്നത്. അതേസമയം, കൊവിഡ് മരണങ്ങളില്‍ ബ്രസീല്‍ അമേരിക്കയുടെ തൊട്ടുപിന്നിലെത്തി. രാജ്യത്ത് 41,901 പേരാണ് മരിച്ചത്. ഇതുവരെ രണ്ടാമതായിരുന്ന ബ്രിട്ടനില്‍ 41,481 പേരും. 116,825 പേരാണ് അമേരിക്കയില്‍ മരിച്ചത്. ആഫ്രിക്കയിലെ രോഗവ്യാപനത്തോതിലും മുന്നറിയിപ്പ് നല്‍കിയിരിക്കയാണ് ലോകാരോഗ്യസംഘടന.

രണ്ട് ലക്ഷമാണ് രോഗബാധിതര്‍. രോഗികളുടെ എണ്ണം ഇരട്ടിക്കാന്‍ എടുത്തത് 18 ദിവസം മാത്രമാണ്. ദക്ഷിണാഫ്രിക്കയിലാണ് രോഗബാധിതര്‍ കൂടുതല്‍. ആരോഗ്യരംഗം അപ്പാടെ തകര്‍ന്നിരിക്കുന്ന യെമനിലും കൊവിഡ് പടരുകയാണ്. ശരിയായ കണക്കുകളല്ല പുറത്തുവരുന്നത് എന്നാണ് ലോകാരോഗ്യസംഘടനയുടെ മുന്നറിയിപ്പ്.