പൈലറ്റുമാര്‍ ഇങ്ങനെയായാല്‍ യാത്രക്കാരുടെ കാര്യം എന്താകും. യാത്രക്കാരുടെ ജീവനും സുരക്ഷക്കും പ്രാധാന്യം കല്‍പ്പിക്കേണ്ട പൈലറ്റുമാര്‍ തമ്മില്‍ തല്ലുക പതിവായിരിക്കുകയാണ്. കഴിഞ്ഞമാസമാണ് ക്യാപ്റ്റനെ കോക്പിറ്റില്‍നിന്ന് പുറത്താക്കി സഹ പൈലറ്റ് ജര്‍മന്‍ വിമാനം ആല്‍പ്‌സ് പര്‍വതനിരകളിലേക്ക് ഇടിച്ചിറക്കിയത്. തുടര്‍ന്ന് പൈലറ്റുമാരുടെ മാനസികാവസ്ഥ വിമാനയാത്രയുടെ സുരക്ഷയെ എത്രത്തോളം ബാധിക്കുന്നുണ്ടെന്ന ചര്‍ച്ച വ്യോമയാന രംഗത്ത് സജീവമായിരുന്നു. കോക്പിറ്റില്‍ രണ്ട് പൈലറ്റുമാരും ഇല്ലാത്ത സാഹചര്യമുണ്ടാകരുതെന്ന് യൂറോപ്പിലെയും ഓസ്‌ട്രേലിയയിലെയും വിമാനക്കമ്പനികള്‍ കര്‍ശന നിര്‍ദ്ദേശം പ്രകടിപ്പിക്കുകയും ചെയ്തു.
ഞായറാഴ്ച ജയ്പ്പുരില്‍നിന്നും ഡല്‍ഹിയിലേക്ക് പറക്കാനായി തയ്യാറായിനിന്ന എയര്‍ ഇന്ത്യ വിമാനത്തിന്റെ സഹ പൈലറ്റ് പ്രധാന പൈലറ്റിനെ കോക്പിറ്റില്‍വച്ച് മര്‍ദിച്ചടാണ് സംഭവം. എയര്‍ ഇന്ത്യ 611 വിമാനത്തിലാണ് വിവാദ സംഭവം അരങ്ങേറിയത്.ക്യാപ്റ്റനെ സഹ പൈലറ്റ് ചീത്തവിളിക്കുകയും മര്‍ദിക്കുകയുമായിരുന്നു. എന്നാല്‍, ഇരുവരും തമ്മില്‍ വാദപ്രതിവാദമുണ്ടായതിനപ്പുറം മറ്റൊന്നും സംഭവിച്ചിട്ടില്ലെന്നാണ് എയര്‍ ഇന്ത്യയുടെ വാദം.
വിമാനം യാത്രപുറപ്പെടുംമുമ്പ് രേഖപ്പെടുത്തേണ്ട വിവരങ്ങള്‍ എഴുതാന്‍ പൈലറ്റ് ആവശ്യപ്പെട്ടതോടെയാണ് സംഘര്‍ഷത്തിന് ഇടയാക്കിയത്. യാത്രക്കാരുടെ എണ്ണം, ഇന്ധനത്തിന്റെ വിവരം തുടങ്ങിയ കാര്യങ്ങള്‍ പൈലറ്റുമാര്‍ക്ക് മുന്നില്‍ പ്രദര്‍ശിപ്പിച്ചിരിക്കണമെന്നാണ് ചട്ടം. ഇതാവശ്യപ്പെട്ട പൈലറ്റിനെ സഹപൈലറ്റ് ചീത്തവിളിക്കുകയും മര്‍ദിക്കുകയുമായിരുന്നു.
സംഭവം റിപ്പോര്‍ട്ട് ചെയ്ത് യാത്ര റദ്ദാക്കി യാത്രക്കാരെ ബുദ്ധിമുട്ടിക്കേണ്ടെന്ന് വിചാരിച്ച പൈലറ്റ്, കോക്പിറ്റില്‍ നടന്ന സംഭവം ജയ്പ്പുരില്‍ ആരെയും അറിയിക്കാതെ ഡല്‍ഹിയിലേക്ക് വിമാനം പറത്തി. ഡല്‍ഹിയിലെത്തിയശേഷം സംഭവം പൈലറ്റ് റിപ്പോര്‍ട്ട് ചെയ്യുകയായിരുന്നു. പൈലറ്റുമാര്‍ക്കിടയില്‍ വാഗ്വാദമുണ്ടായതായും അതവര്‍തന്നെ പറഞ്ഞുതീര്‍ത്തുവെന്നുമാണ് എയര്‍ ഇന്ത്യ അധികൃതരുടെ ഭാഷ്യം.
ഇപ്പോള്‍ പൈലറ്റിനെ മര്‍ദിച്ച കോ പൈലറ്റ് പ്രശ്‌നക്കാരനാണെന്ന് എയര്‍ ഇന്ത്യയിലെ മുതിര്‍ന്ന പൈലറ്റുമാര്‍ പറയുന്നു. മൂന്നുവര്‍ഷം മുമ്പ് വിമാനത്തിന്റെ ക്യാപ്റ്റനെ കോക്പിറ്റില്‍നിന്ന് പുറത്തിറക്കിയശേഷം അദ്ദേഹത്തിന്റെ കുപ്പായത്തിലെ സ്റ്റാറുകള്‍ നീക്കം ചെയ്യുകയും മര്‍ദിക്കുകയും ചെയ്തുവെന്ന പരാതി ഇയാള്‍ക്കെതിരെ നിലനില്‍ക്കുന്നുണ്ട്. രണ്ടുവര്‍ഷം മുമ്പ് മറ്റൊരു സംഭവത്തില്‍ കോക്പിറ്റിലെ ഇയാളുടെ സ്വഭാവത്തെക്കുറിച്ച് മറ്റൊരു പൈലറ്റും പരാതിപ്പെട്ടിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha