തലസ്ഥാന നഗരത്തിലെ ഭരണസിരാകേന്ദ്രങ്ങളില്‍ കോവിഡ് പടരുന്നു. ഡല്‍ഹിയില്‍ നൂറിലധികം കേന്ദ്രസര്‍ക്കാര്‍ ജീവനക്കാര്‍ക്ക് രോഗബാധ കണ്ടെത്തിയതായാണ് റിപ്പോര്‍ട്ട്. ഇതേ തുടര്‍ന്ന് പല മന്ത്രാലയങ്ങളിലും ജീവനക്കാര്‍ വീട്ടിലിരുന്ന് ജോലി ചെയ്യുകയാണ്. പലരും ക്വാറന്റൈനിലാണ്.ആദായനികുതി വകുപ്പിലെ ഒട്ടേറെ ഉന്നത ഉദ്യോഗസ്ഥര്‍ക്ക് കോവിഡ് ബാധിച്ചിട്ടുണ്ട്.

ഒരു കേന്ദ്രമന്ത്രിയുടെ അഡീഷണല്‍ പ്രൈവറ്റ് സെക്രട്ടറിക്കും രോഗബാധ സ്ഥിരീകരിച്ചു. വിവിധ വകുപ്പുകളിലെ മൂന്നു ജോയിന്റ് സെക്രട്ടറിമാര്‍ക്കും കോവിഡ് പിടിപെട്ടു. പ്രധാനപ്പെട്ട പല മന്ത്രാലയങ്ങളും കോവിഡ് പിടിയിലാണ്. കൃഷി ഭവന്‍, ശ്രാം ശക്തി ഭവന്‍, ശാസ്ത്രി ഭവന്‍, നിര്‍മന്‍ ഭവന്‍, റെയില്‍ ഭവന്‍, നോര്‍ത്ത്, സൗത്ത് ബ്ലോക്കുകള്‍ തുടങ്ങി പ്രധാന ഭരണകേന്ദ്രങ്ങളിലെല്ലാം കോവിഡ് റിപ്പോര്‍ട്ടു ചെയ്തിട്ടുണ്ട്. ഭവന-നഗരകാര്യ മന്ത്രാലയയത്തില്‍ ആറു പേര്‍ക്ക് കോവിഡ് ബാധിക്കുകയും രണ്ടു പേര്‍ മരിക്കുകയും ചെയ്തു.