തമിഴ്നാട്ടിലും മഹാരാഷ്ട്രയിലും കൊവിഡ് രോഗികളുടെ എണ്ണം കുത്തനെ ഉയരുന്നു. തമിഴ്‌നാട്ടില്‍ കൊവിഡ് രോഗികളുടെ എണ്ണം അരലക്ഷം കടന്നു. ഇതുവരെ 50,193 പേര്‍ക്കാണ് സംസ്ഥാനത്ത് രോഗബാധ സ്ഥിരീകരിച്ചത്. 24 മണിക്കൂറിനുള്ളില്‍ തമിഴ്‌നാട്ടില്‍ 2,174 പേര്‍ക്കാണ് കൊവിഡ് ബാധിച്ചത്. 48 മരണവും റിപ്പോര്‍ട്ട് ചെയ്തു. ഇതോടെ തമിഴ്‌നാട്ടിലെ ആകെ കൊവിഡ് മരണം 576 ആയി. 21,990 പേരാണ് നിലവില്‍ സംസ്ഥാനത്ത് ചികിത്സയിലുള്ളത്. 27,624 പേര്‍ ഇതുവരെ രോഗമുക്തരായി ആശുപത്രിവിട്ടു.

മഹാരാഷ്ട്രയില്‍ ഇതുവരെ 1,16,752 പേര്‍ക്കാണ് കൊവിഡ് സ്ഥിരീകരിച്ചത്. 24 മണിക്കൂറിനുള്ളില്‍ 3307 പേര്‍ക്ക് രോഗം പിടിപെട്ടു. 114 പേര്‍ മരിച്ചു. ഇതോടെ സംസ്ഥാനത്തെ ആകെ മരണം 5,651 ആയി.. ഇതുവരെ 59,166 പേര്‍ രോഗമുക്തരായി. 51,921 പേരാണ് നിലവില്‍ മഹാരാഷ്ട്രയില്‍ ചികിത്സയില്‍ തുടരുന്നത്.

അതേസമയം ഇന്ത്യയില്‍ കൊവിഡ് ബാധിച്ച്‌ മരിച്ചവര്‍ 12,000 കടന്നു. 24 മണിക്കൂറിനിടെ 2003 പേരാണ് മരിച്ചത്. 10,974 പേര്‍ക്കാണ് പുതുതായി രോഗം സ്ഥിരീകരിച്ചത്. ആകെ കേസുകള്‍ 3.63 ലക്ഷം പിന്നിട്ടു. മഹാരാഷ്ട്ര, ഡല്‍ഹി സംസ്ഥാനങ്ങളില്‍ നേരത്തെ റിപ്പോര്‍ട്ട് ചെയ്യപ്പെടാതെ പോയ മരണങ്ങള്‍ കൂടി ഉള്‍പ്പെടുത്തിയതോടെയാണ് മരണസംഖ്യ കുതിച്ചുയര്‍ന്നത്. മഹാരാഷ്ട്രയില്‍ റിപ്പോ‌ര്‍ട്ട് ചെയ്യാതിരുന്ന 1328 മരണങ്ങളും,ഡല്‍ഹിയില്‍ 344 മരണങ്ങളും പുതുതായി ചൊവ്വാഴ്ച ഉള്‍പ്പെടുത്തുകയായിരുന്നു. രാജ്യത്തെ രോഗമുക്തി നിരക്ക് 52.80 ശതമാനമായി ഉയര്‍ന്നു. 24 മണിക്കൂറിനിടെ 6922 പേര്‍ക്ക് രോഗം ഭേദമായി. ഇതുവരെ 1,86,934 രോഗമുക്തി.