ലോക്ഡൗണ്‍ കാരണം മാറ്റിവച്ച രാജ്യസഭാ സീറ്റുകളിലേക്കുള്ള തിരഞ്ഞെടുപ്പ് ഇന്നു നടക്കും. 10 സംസ്ഥാനങ്ങളിലെ 24 സീറ്റുകളില്‍ കര്‍ണാടകയിലെ 4 സീറ്റുകളിലേക്ക് സ്ഥാനാര്‍ഥികള്‍ എതിരില്ലാതെ തിരഞ്ഞെടുക്കപ്പെട്ടിരുന്നു. 18 സീറ്റുകളിലേക്ക് മാര്‍ച്ച് 24-നു നടക്കേണ്ടിയിരുന്ന തിരഞ്ഞെടുപ്പാണ് മാറ്റിവച്ചത്. ഇന്നു തിരഞ്ഞെടുപ്പു നടക്കുന്ന സീറ്റുകളില്‍ പകുതിയോളം എന്‍ഡിഎ നേടുമെന്നുറപ്പാണ്.

ബിജെപികോണ്‍ഗ്രസ് പോരാട്ടമാണ് ഗുജറാത്ത് (4), രാജസ്ഥാന്‍ (3), മധ്യപ്രദേശ് (3), ജാര്‍ഖണ്ഡ് (2) എന്നിവിടങ്ങളില്‍ നടക്കുന്നത്. ഗുജറാത്തിലും രാജസ്ഥാനിലും ബിജെപി കുതിരക്കച്ചവടം നടത്തുന്നതായി കോണ്‍ഗ്രസ് ആരോപിച്ചിരുന്നു.

രാജസ്ഥാനില്‍ എഐസിസി ജനറല്‍ സെക്രട്ടറി കെ.സി. വേണുഗോപാലും ദലിത് നേതാവ് നീരജ് ഡാങ്കിയും മത്സരിക്കുമ്പോള്‍ ബിജെപി നിര്‍ത്തിയിരിക്കുന്നത് രാജേന്ദ്ര ഗെലോട്ടിനെയും ഓംകാര്‍ സിങ് ലെഖാവത്തിനെയുമാണ്. കുതിരക്കച്ചവടം ഭയന്നു കഴിഞ്ഞ കുറെ ദിവസമായി ഇരുപാര്‍ട്ടികളും ജയ്പുരിലെ റിസോര്‍ട്ടുകളിലാണ് എംഎല്‍എമാരെ പാര്‍പ്പിച്ചിരിക്കുന്നത്.

ഗുജറാത്തില്‍ ബിജെപിയുടെ അഭയ് ഭരദ്വാജ്, റാമില ബാര, കോണ്‍ഗ്രസിന്റെ ശക്തിസിങ് ഗോഹില്‍ എന്നിവര്‍ വിജയം ഉറപ്പാക്കി. രണ്ടാമത്തെ സ്ഥാനാര്‍ഥി ഭരത് സിങ് സോളങ്കിയെ ജയിപ്പിക്കാന്‍ കോണ്‍ഗ്രസിന് 4 വോട്ട് കൂടി വേണമെന്നിരിക്കെ, തങ്ങളുടെ മൂന്നാം സ്ഥാനാര്‍ഥി നര്‍ഹരി അമീന്‍ വിജയിക്കുമെന്ന പ്രതീക്ഷയിലാണു ബിജെപി.

രാവിലെ 9 മുതല്‍ 4 വരെയാണ് പോളിങ്. മുന്‍പ്രധാനമന്ത്രി എച്ച്.ഡി. ദേവെഗൗഡ കര്‍ണാടകയില്‍ നിന്ന് എതിരില്ലാതെ തിരഞ്ഞെടുക്കപ്പെട്ടു. ബിജെപി നേതാവ് ജ്യോതിരാദിത്യ സിന്ധ്യ (മധ്യപ്രദേശ്), കോണ്‍ഗ്രസ് നേതാവ് ദിഗ്വിജയ് സിങ് (മധ്യപ്രദേശ്), ജെഎംഎം നേതാവ് ഷിബു സോറന്‍ (ജാര്‍ഖണ്ഡ്) എന്നിവരാണ് മത്സരരംഗത്തുള്ള മറ്റു പ്രമുഖര്‍.

രാജ്യസഭയില്‍ നിലവില്‍ എന്‍ഡിഎയ്ക്ക് 90 അംഗങ്ങളുണ്ട്. കര്‍ണാടകയില്‍ നിന്ന് 2 പേരെ എതിരില്ലാതെ തിരഞ്ഞെടുത്തു കഴിഞ്ഞു. എന്‍ഡിഎ ഘടകകക്ഷികളും സര്‍ക്കാരിനെ പിന്തുണയ്ക്കുന്ന കക്ഷികളും വടക്കു കിഴക്കന്‍ സംസ്ഥാനങ്ങള്‍, ആന്ധ്ര എന്നിവിടങ്ങളില്‍ നിന്നെത്തും. രാജസ്ഥാന്‍, ജാര്‍ഖണ്ഡ്, മധ്യപ്രദേശ് എന്നിവിടങ്ങളില്‍ നിന്നാണ് കോണ്‍ഗ്രസിനു സാധ്യത.

ഇന്നു തിരഞ്ഞെടുപ്പ് നടക്കുന്ന സംസ്ഥാനങ്ങളും സീറ്റും: ആന്ധ്രപ്രദേശ് 4, ഗുജറാത്ത് 4, മധ്യപ്രദേശ് 3, രാജസ്ഥാന്‍ 3, ജാര്‍ഖണ്ഡ് 2, മണിപ്പുര്‍ 1, മേഘാലയ 1, മിസോറം 1

കോണ്‍ഗ്രസ് നേതാവ്, രാജ്യസഭാ തിരഞ്ഞെടുപ്പില്‍ തപാല്‍ വോട്ട് ഏര്‍പ്പെടുത്താനുള്ള തിരഞ്ഞെടുപ്പ് കമ്മിഷന്റെ തീരുമാനം റദ്ദാക്കണമെന്നാവശ്യപ്പെട്ട് സമര്‍പ്പിച്ച ഹര്‍ജിയില്‍ വാദം കേള്‍ക്കാന്‍ സുപ്രീംകോടതി തീരുമാനിച്ചു. വേനല്‍ അവധിക്കുശേഷം ഹര്‍ജി പരിഗണിക്കും. ഗുജറാത്തിലെ പ്രതിപക്ഷ നേതാവ് പരേഷ് ധനാനി നല്‍കിയ ഹര്‍ജിയുടെ പകര്‍പ്പ് തിരഞ്ഞെടുപ്പു കമ്മിഷനു നല്‍കാനും മറുപടി തേടാനും ചീഫ് ജസ്റ്റിസ് എസ്.എ. ബോബ്‌ഡെ ഉള്‍പ്പെടുന്ന ബെഞ്ച് നിര്‍ദേശിച്ചു.

ഇന്നു രാജ്യസഭാ തിരഞ്ഞെടുപ്പു നടക്കാനിരിക്കുന്ന സാഹചര്യത്തില്‍ മുതിര്‍ന്ന അഭിഭാഷകനായ അഭിഷേക് സിങ്വിയാണ് വിഷയം കോടതിയുടെ ശ്രദ്ധയില്‍ പെടുത്തിയത്. കോവിഡ് ബാധിതരായ എംഎല്‍എമാരെ തപാല്‍ വോട്ട് ചെയ്യാന്‍ അനുവദിച്ചുകൊണ്ടുള്ള തിരഞ്ഞെടുപ്പു കമ്മിഷന്റെ തീരുമാനത്തിന് എതിരെയാണ് കോണ്‍ഗ്രസ് കോടതിയെ സമീപിച്ചത്.