ഇന്ത്യചൈന അതിര്‍ത്തി സംഘര്‍ഷം ഓരോ ഭാരതീയനും ഏറ്റെടുത്തു കഴിഞ്ഞു. ഇതിന്റെ തുടര്‍ച്ചയായി രാജ്യത്ത് ചൈനാ വിരുദ്ധ പ്രചാരണം ശക്തമായിരിക്കുകയാണ്. ചൈനയെ ബഹിഷ്‌കരിക്കുകയെന്ന ആഹ്വാനം സമൂഹമാധ്യമങ്ങളില്‍ ശക്തമായതിനിടയിലും ചൈനയുടെ സാധനങ്ങള്‍ വാങ്ങിക്കൂട്ടുകയാണ് ആളുകള്‍. അതും മൊബൈലുകള്‍. ചൈനീസ് സ്മാര്‍ട്‌ഫോണ്‍ ബ്രാന്‍ഡായ വണ്‍പ്ലസിന്റെ പുതിയ ഫഌഗ്ഷിപ് സ്മാര്‍ട്‌ഫോണായ 'വണ്‍ പ്ലസ് 8പ്രോ' ഇന്ത്യയില്‍ വിറ്റുതീര്‍ന്നത് നിമിഷങ്ങള്‍ക്കുള്ളിലാണ്. ഫോണ്‍ കിട്ടാത്തതിനെ തുടര്‍ന്ന് പലരും ട്വിറ്ററില്‍ തന്നെ ഫോണ്‍ വാങ്ങാന്‍ സാധിക്കുന്നില്ലെന്ന പരാതിയുമായെത്തി.

ചൈനീസ് ബ്രാന്‍ഡുകളെ, പ്രത്യേകിച്ചും സ്മാര്‍ട്‌ഫോണ്‍ ബ്രാന്‍ഡുകളെ ആശ്രയിക്കുന്നത് കുറയ്ക്കാന്‍ ഇന്ത്യ ഇനിയും തയ്യാറെടുത്തിട്ടില്ലായിരിക്കാം എന്നതിന്റെ തെളിവാണ് ഇത് എന്ന് ബ്ലൂംബെര്‍ഗ് റിപ്പോര്‍ട്ട നിരീക്ഷിക്കുന്നു.

ഇന്ത്യയിലേക്ക് കയറ്റുമതി ചെയ്യുന്ന രാജ്യങ്ങളുടെ പട്ടികയില്‍ ചൈന മുന്നിലാണ്. സ്മാര്‍ട്‌ഫോണുകള്‍ ഉള്‍പ്പടെ നിരവധി ഇലക്ട്രോണിക് ഉപകരണങ്ങളും അനുബന്ധ ഉപകരണങ്ങളും നിര്‍മാണ സാമഗ്രികളും ചൈനയില്‍ നിന്നും ഇന്ത്യയിലേക്ക് വ്യാപകമായി ഇറക്കുമതി ചെയ്യുന്നുണ്ട്.

ചൈനയിലെ ബിബികെ ഇലക്ട്രോണിക്‌സ് എന്ന വന്‍കിട കമ്പനിയുടെ ഉടമസ്ഥതയിലുള്ള ബ്രാന്‍ഡ് ആണ് വണ്‍പ്ലസ്. ഓപ്പോ, വിവോ, റിയല്‍മി, ഐക്യൂ പോലുള്ള ബ്രാന്‍ഡുകളും ബിബികെ ഇലക്ട്രോണിക്‌സിന്റേതാണ്. ഇതില്‍ വണ്‍പ്ലസ്, ഓപ്പോ, റിയല്‍മി, വിവോ എന്നില ഇന്ത്യയില്‍ ഏറ്റവും അധികം വിറ്റഴിക്കപ്പെടുന്ന സ്മാര്‍ട്‌ഫോണ്‍ ബ്രാന്‍ഡുകളാണ്. ഇത് കൂടാതെ ചൈനയില്‍ നിന്നുള്ള ഷാവോമിയും ഇന്ത്യയിലെ സ്മാര്‍ട്‌ഫോണ്‍ വിപണിയിലെ മുന്‍നിര കമ്പനിയാണ്.

ചൈനയെ ബഹിഷ്‌കരിക്കണം എന്ന ആഹ്വാനം ഇപ്പോള്‍ ശക്തിപ്പെട്ടിരിക്കുകയാണ്. ചൈനയെ വിവിധ തലങ്ങളില്‍ ബഹിഷ്‌കരിക്കാനുലഌആഹ്വാനം കേന്ദ്ര സര്‍ക്കാരും നടത്തുന്നുണ്ട്. എന്നാല്‍ അതെല്ലാം ചൈനീസ് കമ്പനികളെ എങ്ങനെ സ്വാധീനിക്കുമെന്ന് കണ്ടറിയണം.

ചൈനീസ് കമ്പനികള്‍ക്കെതിരെ ഗുരുതരമായ സുരക്ഷാ ആശങ്കകള്‍ ഉന്നയിക്കപ്പെടുന്നുണ്ടെങ്കിലും വണ്‍പ്ലസ് പോലുള്ള ബ്രാന്‍ഡുകള്‍ക്ക് ഇപ്പോഴും ഇന്ത്യയില്‍ തങ്ങളുടെ ഉപകരണങ്ങള്‍ വിറ്റഴിക്കാനാവുന്നുണ്ട് എന്ന് പുതിയ റിപ്പോര്‍ട്ടുകള്‍ വ്യക്തമാക്കുന്നു.