ആകാശും ബ്രഹ്മോസും സജ്ജം; ചൈനക്ക് മുന്നറിയിപ്പ് ,ഇന്ത്യയുടേത് ചില്ലറ കളിയല്ല
ചൈനയുമായി തര്ക്കം നിലനില്ക്കുന്ന ഗല്വാന് താഴ്വരയിലെ നദിക്ക് കുറുകെ പാലം പണി പൂര്ത്തിയാക്കി ഇന്ത്യ. ഗല്വാന് നദിക്ക് കുറുകെയുള്ള പാലത്തിന്റെ പണി സൈന്യമാണ് പൂര്ത്തിയാക്കിയത്. ചൈനയുടെ ശക്തമായ എതിര്പ്പ് വകവെയ്ക്കാതെയാണ് ഇന്ത്യ പാലം നിര്മിച്ചത്. തിങ്കളാഴ്ചയുണ്ടായ സംഘര്ഷത്തിന് ശേഷവും നിര്മാണം തടയാന് ചൈനക്ക് സാധിച്ചില്ല.
കഴിഞ്ഞ കുറേ വര്ഷങ്ങളായി അതിര്ത്തിയില് ഇന്ത്യ നടത്തിയിട്ടുള്ള അടിസ്ഥാനസൗകര്യ വികസന പ്രവര്ത്തനങ്ങള് സേനാ നീക്കത്തിനു കരുത്തുപകരും. മുന്നിരയില് അഡ്വാന്സ്ഡ് ലാന്ഡിങ് ഗ്രൗണ്ടുകളും സജ്ജമാക്കിയിട്ടുണ്ട്. അടിയന്തരഘട്ടത്തില് അതിര്ത്തി സംരക്ഷിക്കാനുള്ള എല്ലാ സജ്ജീകരണങ്ങളും ഒരുക്കിയിട്ടുണ്ടെന്നാണ് സൈനിക അധികൃതര് വ്യക്തമാക്കുന്നത്. ടി-71 ടാങ്ക് റെജിമെന്റ്, ലഡാക്കിലെ ആര്ട്ടിലറി യൂണിറ്റ്, സുഖോയ്-30 എംകെഐ പോര്വിമാനങ്ങള്, കരയില്നിന്ന് ആകാശത്തേക്ക് തൊടുക്കാവുന്ന ആകാശ് മിസൈലുകള്, വടക്കു-കിഴക്കന് ഭാഗത്ത് ബ്രഹ്മോസ് സൂപ്പര്സോണിക് ക്രൂസ് മിസൈലുകള് എന്നിവയെല്ലാം സജ്ജമാക്കിയിട്ടുണ്ട്. 1962 ലെ പോലെ ചൈനയ്ക്ക് കാര്യങ്ങള് അത്ര എളുപ്പമാവില്ല ഇക്കുറി. അന്ന് വ്യോമസേന രംഗത്തുണ്ടായിരുന്നില്ല.
സമ്പൂര്ണയുദ്ധം എന്നത് ആരും നിര്ദേശിക്കുന്നില്ല. എന്നാല് കീഴടങ്ങുന്നവരല്ല ഇന്ത്യന് സേന എന്നു ചൈനയെ ഈ ഘട്ടത്തിലെങ്കിലും ബോധ്യപ്പെടുത്തേണ്ടതുണ്ട്. അതിര്ത്തിയിലെ തല്സ്ഥിതി ഏകപക്ഷീയമായി മാറ്റാനും ഇന്ത്യന് മണ്ണ് കൈവശമാക്കാനും കഴിയില്ലെന്ന ഉത്തമബോധ്യം ചൈനയ്ക്കുണ്ടാകണം.
അതിര്ത്തിയില് ഇന്ത്യ യുദ്ധസമാനമായ ഒരുക്കങ്ങളാണ് നടത്തിക്കൊണ്ടിരിക്കുന്നത്. ചൈനയുമായുള്ള വടക്കന് അതിര്ത്തിയില് വ്യോമതാവളങ്ങള് ഉള്പ്പെടെ എല്ലാ സൈനികകേന്ദ്രങ്ങളും ഒരുങ്ങിക്കഴിഞ്ഞു. ഗല്വാന് താഴ്വര, ദൗലത് ബേഗ് ഓള്ഡി എന്നിവിടങ്ങളില് ചൈനയുടെ സന്നാഹങ്ങള് കൃത്യമായി നിരീക്ഷിക്കുന്നുണ്ട്. സാറ്റലൈറ്റ്, ഡ്രോണുകള്, ദീര്ഘദൂര നാവിക വിമാനവാഹിനികള് എന്നിവയിലെ റഡാറുകള് എന്നിവ ഉപയോഗിച്ചാണ് പിഎല്എയുടെ നീക്കങ്ങള് സസൂക്ഷ്മം നിരീക്ഷിക്കുന്നത്. ടിബറ്റിലെ ചൈനയുടെ വ്യോമകേന്ദ്രങ്ങളും നിരീക്ഷണത്തിലാണ്.
അതിനിടെ ഗല്വാന് താഴ്വരയിലുണ്ടായ ഇന്ത്യ-ചൈന സംഘര്ഷത്തിന്റെ പശ്ചാത്തലത്തില് വ്യോമസേന മേധാവി എയര്ചീഫ് മാര്ഷല് ആര്കെഎസ് ബദൗരിയ ലഡാക്കിലെത്തി. ശ്രീനഗറിലെ ബേസ് ക്യാമ്ബിലെത്തി സ്ഥിതിഗതികള് നിരീക്ഷിച്ച അദ്ദേഹം മുതിര്ന്ന സൈനികോദ്യാഗസ്ഥരുമായി ചര്ച്ച നടത്തി. ലേയിലേയും ശ്രീനഗറിലെയും ബേസ് ക്യാമ്ബുകളിലാണ് ബദൗരിയ എത്തിയത്.
വ്യോമസേന പോര് വിമാനങ്ങളും ആയുധങ്ങളുമെല്ലാം അതിര്ത്തിയിലേക്ക് അടുപ്പിക്കുന്നതായി നേരത്തെ റിപ്പോര്ട്ടുകളുണ്ടായിരുന്നു. യുദ്ധ വിമാനങ്ങള് അതിര്ത്തിയില് വിന്യസിച്ചതായും വിവരമുണ്ട്. പോര് വിമാനങ്ങളായ സുഖോയ് 30 എംകെഐ, മിറാഷ് 2000, ജാഗ്വാര് എന്നിവയെല്ലാം പൂര്ണ്ണ സജ്ജമാക്കിയതായി വ്യോമസേന വൃത്തങ്ങള് വ്യക്തമാക്കി.
അതിര്ത്തിയില് ഇന്ത്യന് സേന കനത്ത ജാഗ്രത തുടരുകയാണ്. ബോഡി പ്രോട്ടക്ടീവ് സ്യൂട്ടുകളും ബാറ്റണുകളുമായി കൂടുതല് സൈന്യത്തെ അതിര്ത്തിയില് വിന്യസിച്ചിട്ടുണ്ട്. തിങ്കളാഴ്ച ചൈനീസ് സൈന്യം കമ്ബി വടികളും കല്ലുകളും മറ്റും ഉപയോഗിച്ച് ആക്രമിച്ചതിന്റെ പശ്ചാത്തലത്തിലാണ് സുരക്ഷാ കവചങ്ങളോടെ സൈന്യത്തെ വിന്യസിച്ചത്.
https://www.facebook.com/Malayalivartha
