കോവിഡ് പരിശോധനാ നിരക്ക് ഏകീകൃതമാക്കണമെന്ന് കേന്ദ്ര സര്ക്കാരിന് സുപ്രീംകോടതിയുടെ നിര്ദ്ദേശം
രാജ്യത്ത് കോവിഡ് പരിശോധനയ്ക്ക് ഏകീകൃത നിരക്കു നിശ്ചയിക്കാന് കേന്ദ്ര സര്ക്കാരിനു സുപ്രീംകോടതി നിര്ദേശം നല്കി. സ്വകാര്യ സ്ഥാപനങ്ങളുമായി സംസ്ഥാന സര്ക്കാരുകള് ഇക്കാര്യത്തില് ചര്ച്ച നടത്തുകയാണെന്ന് കേന്ദ്രം മറുപടി നല്കിയെങ്കിലും കോടതി വഴങ്ങിയില്ല. പരമാവധി നിരക്ക് കേന്ദ്രം നിശ്ചയിക്കണമെന്നും തുക അതിലും കുറയ്ക്കാന് കഴിയുമോയെന്നു സംസ്ഥാനങ്ങള് നോക്കട്ടെയെന്നുമായിരുന്നു കോടതിയുടെ മറുപടി.
കോവിഡ് പരിശോധന സര്ക്കാര് ആശുപത്രികളില് സൗജന്യമാണെങ്കിലും സ്വകാര്യ സ്ഥാപനങ്ങളില് 4500 രൂപ വരെ ഈടാക്കുന്നുണ്ടെന്നും ഇതു ഗൗരവമുള്ളതാണെന്നും ജസ്റ്റിസുമാരായ അശോക് ഭൂഷണ്, എസ്.കെ.കൗള്, എം.ആര്.ഷാ എന്നിവരുടെ ബെഞ്ച് നിരീക്ഷിച്ചു.
കോവിഡ് വ്യാപനത്തിന്റെ തുടക്കത്തില് പരിശോധനാ കിറ്റുകളുടെ ലഭ്യതക്കുറവും ഇറക്കുമതിച്ചെലവും പരിഗണിച്ചാണ് സ്വകാര്യ ലാബുകളില് 4500 രൂപ വരെ ഈടാക്കാന് ഇന്ത്യന് കൗണ്സില് ഓഫ് മെഡിക്കല് റിസര്ച് (ഐസിഎംആര്) അനുമതി നല്കിയത്. എന്നാല്, തദ്ദേശീയ കിറ്റുകള് ലഭ്യമായിട്ടും പഴയ നിരക്കു തന്നെയാണു മിക്കയിടത്തും. നിരക്കു കുറയ്ക്കണമെന്നു കാട്ടി സംസ്ഥാനങ്ങള്ക്ക് ഐസിഎംആര് കത്തയച്ചെങ്കിലും നടപടിയുണ്ടായില്ല.
https://www.facebook.com/Malayalivartha