ഇന്ത്യയും അയൽ രാജ്യമായ ചൈനയും തമ്മിലുണ്ടായ അതിർത്തി തർക്കവും തുടർന്നുണ്ടായ സൈനീക നടപടികളും സൃഷ്ടിച്ച പ്രത്യാഘാതങ്ങൾ ചെറുതല്ല . ചൈനീസ് ഉത്പന്നങ്ങൾ ബഹിഷ്കരിക്കാൻ സമൂഹ മാധ്യമങ്ങളിൽ വമ്പൻ പ്രചാരണം ആണിപ്പോൾ നടക്കുന്നത്. ഇത് കൂടാതെ ചൈനയുമായി ബന്ധപ്പെട്ട അൻപത്തിരണ്ടോളം മൊബൈൽ ആപ്ലിക്കേഷനുകൾക്ക് വിലക്കേർപ്പെടുത്തുകയോ അല്ലെങ്കിൽ ഉപയോഗം നിർത്താൻ ജനങ്ങളെ പ്രേരിപ്പിക്കുകയോ ചെയ്യണമെന്ന് കേന്ദ്ര സര്‍ക്കാറിനോട് ഇന്ത്യന്‍ ഇന്റലിജന്‍സ് ഏജന്‍സികള്‍ ഉപദേശിച്ചതായി ഹിന്ദുസ്ഥാൻ ടൈംസ് റിപ്പോർട്ട് ചെയ്യുന്നു. ഈ 52 ആപ്പുകളുടെ കൂട്ടത്തിൽ കേരളത്തിൽ വമ്പൻ പ്രചാരമുള്ള ഹ്രസ്വ വീഡിയോ ആപ്പ് ടിക് ടോക്കുമുണ്ട് (TikTok). ചൈനീസ് ഇന്റർനെറ്റ് കമ്പനി ആയ ബൈറ്റ്ഡൻസ് ആണ് ടിക് ടോക് ആപ്പിന്റെ ഉടമകൾ. ഇന്റലിജന്‍സ് ഏജന്‍സികളുടെ നിർദ്ദേശമനുസരിച്ച് കേന്ദ്ര സർക്കാർ ടിക് ടോക് ആപ്പിനെ നിയന്ത്രിക്കുകയോ ഒഴിവാക്കാൻ ജനങ്ങളെ പ്രേരിപ്പിക്കുകയോ ചെയ്യുന്ന സാഹചര്യം ഉണ്ടായാൽ പകരം മറ്റൊരു ആപ്പുണ്ടോ? ടിക് ടോക് ആപ്പിന്റെ അത്രയും പ്രശസ്തമല്ലെങ്കിലും പകരം വയ്ക്കാവുന്ന 3 'ഇന്ത്യൻ' ഹ്രസ്വ വീഡിയോ ആപ്പുകൾ പരിചയപ്പെടാം.

ടിക് ടോക്കിനുള്ള ഇന്ത്യൻ ബദൽ എന്ന് ഏറ്റവും പ്രചാരം ലഭിച്ച ആപ്പ് ആണ് മിത്രോം ആപ്പ്. പോളിസി നിയമങ്ങൾ ലംഘിച്ചതിനാണ് ‌ഈ മാസത്തിന്റെ തുടക്കത്തിൽ ഗൂഗിൾ പ്ലെ സ്റ്റോറിൽ നിന്നും പുറത്തായെങ്കിലും രണ്ട് ദിവസത്തിനുള്ളിൽ മിത്രോം തിരിച്ചെത്തി. ഐഐടി റൂർക്കീ വിദ്യാത്ഥിയായ ശിവങ്ക് അഗർവാൾ നിർമ്മിച്ച് എന്ന് കരുതപ്പെടുന്ന മിത്രോം ആപ്പ് 50 ലക്ഷത്തിലധികം പേർ ഇതിനകം ഡൗൺലോഡ് ചെയ്തിട്ടുണ്ട്. ടിക് ടോക്കിന് സമാനമായ വീഡിയോ, ബാക്ക്ഗ്രൗണ്ട് മ്യൂസിക്, കാമറ ഡിസൈൻ എന്നിവയാണ് മിത്രോം ആപ്പിന്റെ പ്രചാരം വർധിപ്പിക്കുന്നത്. 'ബെംഗളൂരു ആസ്ഥാനമായ ഇന്ത്യയിൽ നിന്നുള്ള ഒരു സൗജന്യ ഹ്രസ്വ വീഡിയോ സോഷ്യൽ പ്ലാറ്റ്ഫോം' എന്നാണ് മിത്രോം ആപ്പിന്റെ പുത്തൻ വിവരണം.

ടിക് ടോക്കിനുള്ള മറ്റൊരു ബദൽ ആണ് ബോലോ ഇന്ത്യ. അടുത്തകാലത്താണ് ബോലോ ഇന്ത്യ ആപ്പ് പ്ലേയ് സ്റ്റോറിലും ഐഓഎസിലും പ്രത്യക്ഷപെട്ടു തുടങ്ങിയത്. ആപ്പിന്റെ സ്ഥാപനമായ വരുൺ സക്സേനയുടെ വാക്കുകളിൽ എന്തും എത്തും പോസ്റ്റ് ചെയ്യുവുന്ന ടിക് ടോക്കിന് പകരം നല്ല ഉള്ളടക്കം പോസ്റ്റ് ചെയ്യാനാണ് ബോലോ ഇന്ത്യ വികസിപ്പിച്ചത്. ഉപയോക്താക്കൾക്ക് വീഡിയോകൾ സൃഷ്ടിക്കാനും കാണാനും സൗകര്യമൊരുക്കുന്ന ബോലോ ഇന്ത്യ ആപ്പ് ഹിന്ദി, തമിഴ്, തെലുങ്ക്, ബംഗാളി, മലയാളം, കന്നഡ, മറാത്തി, പഞ്ചാബി, ഒഡിയ എന്നീ ഒൻപത് ഭാഷകളെ പിന്തുണയ്ക്കും. പ്ലേ സ്റ്റോറിൽ 4.6-സ്റ്റാർ റേറ്റിംഗ് ഉള്ള ആപ്പ് ആണ് ബോലോ ഇന്ത്യ. പ്ലേ സ്റ്റോറിൽ നിന്നുള്ള വിവരങ്ങൾ അനുസരിച്ച്, ബോലോ ഇന്ത്യ അപ്ലിക്കേഷന് 1 ലക്ഷത്തിലധികം ഡൗൺലോഡുകളുണ്ട്. ഉപഭോക്താക്കൾക്ക് മറ്റ് സോഷ്യൽ മീഡിയ ആപ്ലിക്കേഷനുകളിലും ബോലോ ഇൻഡ്യ ആപ്ലിക്കേഷൻ വീഡിയോകൾ പങ്കിടാം.