കെ.സി വേണുഗോപാല് ഹൈകമാന്റിന്റെ പ്രിയപ്പെട്ടവന്; കേരളത്തിലെ കോണ്ഗ്രസ് സമവാക്യങ്ങള്ക്ക് മാറ്റം? മൂന്നാം ശക്തി കേന്ദ്രമോ ?
കോണ്ഗ്രസിന്റെ സംഘടനാ ചുമതലയുള്ള ജനറല് സെക്രട്ടറി സ്ഥാനത്തിനൊപ്പം രാജ്യസഭയില് കോണ്ഗ്രസിന്റെ ശബ്ദമായും കെ.സി വേണുഗോപാല് മാറുകയാണ്. കോണ്ഗ്രസ് ഹൈകമാന്റിന്റെ പ്രിയപ്പെട്ടവനായി മാറികഴിഞ്ഞ കെ.സി ഇപ്പോള് രാഹുല് ബ്രികേഡിന്റെ കൂടി ഭാഗമാണ്. അതുകൊണ്ടു തന്നെ രാഹുല്ഗാന്ധിയുമായി ഏറ്റവും അടുത്തു നില്ക്കുന്ന നേതാവ് എന്ന നിലയിലും കേണ്ഗ്രസ് നേതൃനിരയില് ശക്തമായ സാനിധ്യമായി കെ.സി വേണുഗോപാല് മാറിയിരിക്കുകയാണ്. ഇത് കേരളത്തിലെ കോണ്ഗ്രസ് സമവാക്യങ്ങളിലും വലിയമാറ്റമാണ് കൊണ്ടു വരാന് പോകുന്നതെന്ന സൂചനയുണ്ട്. കേരളത്തിന്റെ കോണ്ഗ്രസ് ശക്തി കേന്ദ്രങ്ങളായ രമേശ് ചെന്നിത്തലയും ഉമ്മന്ചാണ്ടിയുമല്ലാതെ മൂന്നാമതൊരു ശക്തികേന്ദ്രം വളര്ന്നു വരാന് ഇവര് അനുവദിച്ചിരുന്നില്ല. എന്നാല് ഇങ്ങനെയൊരു ശക്തി കേന്ദ്രമായി കെ.സി മാറാനുള്ള സാധ്യത തള്ളി കളയാല് സാധിക്കുന്നതല്ല.
2017 ലാണ് കേണ്ഗ്രസ് ഭരണത്തിലുള്ള കര്ണാടകയുടെ ചുമതലക്കാരനായി രാഹുല് ഗാന്ധി കെ.സി വേണുഗോപാലിനെ നിയോഗിക്കുന്നത്. ഇതിനെ ദേശീയ രാഷ്ട്രീയത്തിലുള്ള കെ.സിയുടെ വഴിതിരിവായും കണക്കാവുന്നതാണ്. എല്ലാ രാഷ്ട്രീയ മര്യാദകളെയും കാറ്റില് പറത്തി അധികാരം പിടിച്ചെടുക്കുന്ന ബി.ജെ.പിക്ക് കനത്ത തിരിച്ചടി നല്കി അദ്ദേഹം മുന്കൈയെടുത്ത് കര്ണാടകത്തില് ജനതാ ദള് - കോണ്ഗ്രസ് സഖ്യ സര്ക്കാരുണ്ടായി. ഈ മികച്ച ഇടപെടലാണ് കോണ്ഗ്രസ് പാര്ട്ടിയിലെ ഏറ്റവും ഭാരിച്ച ഉത്തരവാദിത്വമായ സംഘടനാ ചുമതലയുള്ള ജനറല് സെക്രട്ടറി എന്ന പദവിയിലേക്ക് അദ്ദേഹത്തെ എത്തിച്ചത്. രാജസ്ഥാനിലെയും മധ്യപ്രദേശിലെയും സര്ക്കാര് രൂപീകരണത്തില് നീര്ണായക ഇടപെടലുകള് നടത്തി കെ.സി വേണുഗോപാലിനെയാണ് മഹാരഷ്ട്ര തെരഞ്ഞെടുപ്പിനും ശേഷമുള്ള സര്ക്കാര് രൂപീകരണത്തിന്റെ ചുമതല കോണ്ഗ്രസ് പ്രസിഡന്റ് സോണിയാ ഗാന്ധി ഏല്പ്പിച്ചത്. മോദി സര്ക്കാരിന്റെ ജനവിരുദ്ധ നടപടികള്ക്കെതിരായ കോണ്ഗ്രസിന്റെ പ്രക്ഷോഭങ്ങള്ക്ക് നേതൃത്വം നല്കിയിരുന്നതും കെ.സി വേണുഗോപാലയിരുന്നു.
സംസ്ഥാന രാഷ്ട്രീയത്തില് നിന്നും ദേശീയ രാഷ്ട്രീയത്തിലേക്ക് ചുവടുമാറ്റം നടത്തിയിട്ടുണ്ടെങ്കിലും ഇനി മുതല് കേരളത്തിലെ കോണ്ഗ്രസിന് ഹൈകമാന്റില് നിന്നു ലഭിക്കുന്ന നിര്ദേശങ്ങള്ക്ക് കെ.സിയുടെ സ്വാധീനവുമുണ്ടാകുമെന്ന കാര്യത്തില് സംശയമില്ല. കേരളത്തിന്റെ കോണ്ഗ്രസിനെ സംബന്ധിച്ച് എല്ലായിപ്പോഴും അവസാന വാക്ക് ഹൈകമാന്റ് തന്നെയാണിപ്പോഴും. ഈ സാഹചര്യത്തില് എ.കെ ആന്റണിക്ക് ശേഷം ഹൈകമാന്റിന്റെ നിലപാടുകളെ സ്വാധീനിക്കാന് കഴിയുന്ന നേതാവായി കെ.സി മാറുമ്പോള് രമേശ് ചെന്നിത്തലയും ഉമ്മന്ചാണ്ടിയും കരുതിയിരിക്കേണ്ടി വരുമെന്ന കാര്യത്തില് സംശയമില്ല. നിലവിലെ സാഹചര്യത്തില് രാജ്യസഭയിലും കേണ്ഗ്രസിന്റെ ദേശീയ സംഘടനാ ചുമതലയുമായി തിരക്കിലാണെങ്കിലും അടുത്ത നിയമസഭാ തെരഞ്ഞെടുപ്പിന് ശേഷം രമേശ് ചെന്നിത്തലക്കും ഉമ്മന്ചാണ്ടിക്കുമിടയില് വടംവലിക്കൊരു അവസരമെരുങ്ങുകയും അന്തിമ തീരുമാനം ഹൈകമാന്റിനു വിടുകയും ചെയ്യുന്ന സാഹചര്യമുണ്ടായാല് കെ.സി വേണുഗോപാല് തിരികെ സംസ്ഥാന രാഷ്ട്രീയത്തിലേക്ക് എത്തിച്ചേരാനും സാധ്യതയുണ്ട്.
"
https://www.facebook.com/Malayalivartha
