രാജ്യത്തു വ്യാപകമായി വ്യക്തികള്‍ക്കും സ്ഥാപനങ്ങള്‍ക്കും നേരെ ഇമെയില്‍ വഴി ഫിഷിങ് ആക്രമണങ്ങള്‍ക്ക് (സൈബര്‍ ആക്രമണം) സാധ്യതയുണ്ടെന്നു കേന്ദ്രസര്‍ക്കാരിന്റെ മുന്നറിയിപ്പ്. .മറ്റൊരു വെബ് സൈറ്റാണെന്ന് തെറ്റിദ്ധരിപ്പിച്ച് ഉപഭോക്താക്കളില്‍ നിന്നു പണവും വിവരങ്ങളും ചോര്‍ത്തുന്ന സൈബര്‍ തട്ടിപ്പ്. പേരില്‍ ചെറിയ സ്പെല്ലിങുകളില്‍ മാറ്റം വരുത്തി വെബ് സൈറ്റുകളുടെ വ്യാജനെ സൃഷ്ടിച്ചാണു തട്ടിപ്പ്.

ഹോംപേജും ഫോണ്ട് സ്റ്റൈലും ഗ്രാഫിക്സുമെല്ലാം ഒരു പോലെ. ബാങ്കുകളുടെയും മറ്റു പണമിടപാട് സ്ഥാപനങ്ങളുടെയും വെബ് സൈറ്റുകളുടെ മാതൃക സൃഷ്ടിച്ചാണു പണവും വിവരങ്ങളും ചോര്‍ത്തുക. കോവിഡ് 19നു സഹായം എന്ന പേരിലെത്തുന്ന ഇമെയിലിലൂടെയാണ് ഫിഷിങ് ആക്രമണം ഉണ്ടാവുകയെന്നു കേന്ദ്ര ഇലക്ട്രോണിക്, ഇന്‍ഫര്‍മേഷന്‍ ടെക്‌നോളജിയുടെ കീഴിലുള്ള ഇന്ത്യന്‍ കംപ്യൂട്ടര്‍ എമര്‍ജന്‍സി ടീം (സിഇആര്‍ടിഇന്‍) മുന്നറിയിപ്പു നല്‍കി. രാജ്യത്തു സൈബര്‍ ആക്രമണം നേരിടാനായി രൂപം നല്‍കിയതാണ് സിഇആര്‍ടിഇന്‍. ഞായറാഴ്ച തന്നെ പല ബാങ്കുകളും ഉപഭോക്താക്കള്‍ക്കു മുന്നറിയിപ്പു നല്‍കിത്തുടങ്ങി.ഡല്‍ഹി, മുംബൈ, ഹൈദരാബാദ്, ചെന്നൈ, അഹമ്മദാബാദ് എന്നിവിടങ്ങളിലായിരിക്കും കൂടുതല്‍ ആക്രമണം.

എന്നാല്‍ രാജ്യം മുഴുവനായി 20 ലക്ഷം ഇമെയിലുകള്‍ക്കു ഭീഷണിയുണ്ട്. കോവിഡ് 19 രോഗത്തിനു പല വിധത്തിലുമുള്ള സഹായം നല്‍കുന്നു എന്ന പേരിലായിരിക്കും ഇമെയില്‍ ലഭിക്കുക. ഉദാഹരണമായി കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ പേരിലായിരിക്കും സന്ദേശം വരിക. കോവിഡ് പരിശോധനയ്ക്കു പണം നല്‍കുമെന്നും ടെസ്റ്റിങ്ങിനായി ആരോഗ്യ പ്രവര്‍ത്തകന്‍ വീട്ടില്‍ വരുമെന്നായിരിക്കും സന്ദേശം. താഴെ നല്‍കിയിരിക്കുന്ന ലിങ്കില്‍ നിങ്ങളുടെ വിവരങ്ങള്‍ നല്‍കണമെന്നും ആവശ്യപ്പെടും. മിക്കവാറും ncov2019(@) gov.in  എന്ന മാതൃകയിലുള്ള സന്ദേശമായിരിക്കും ലഭിക്കുക.

ഇത്തരം മെയിലുകള്‍ വന്നാല്‍ തുറക്കരുത്. ഇവയുടെ യുആര്‍എല്ലില്‍ ക്ലിക് ചെയ്യരുത്. നിങ്ങള്‍ അറിയുന്ന വ്യക്തിയോ സ്ഥാപനമോ അയച്ച ഇമെയിലാണെങ്കിലും തുറക്കരുത്. കംപൂട്ടറില്‍ അസാധാരണമായ പ്രവര്‍ത്തനങ്ങള്‍ കാണുകയോ ആക്രമണം നടക്കുകയോ ചെയ്താല്‍   incident@cert-in.org.in  എന്ന ഇമെയിലിലേക്കു വിവരങ്ങള്‍ അറിയിക്കുക.


അതെ സമയം ഇന്ത്യ - ചൈന അതിര്‍ത്തി പ്രശ്നങ്ങള്‍ രൂക്ഷമായി തുടരുമ്പോള്‍ ഇന്ത്യയ്ക്ക് നേരെ സെബര്‍ ആക്രമണത്തിന് ഒരുങ്ങുകയാണ് ചൈന. സൈബര്‍ ആക്രമണ സാധ്യതയെക്കുറിച്ച് സൈ ഫേര്‍മ എന്ന സ്ഥാപനം കംപ്യൂട്ടര്‍ എമര്‍ജന്‍സി റെസ്പോണ്‍സ് ടീമിനെ കഴിഞ്ഞ ദിവസം അറിയിച്ചിരുന്നു. ചൈനയിലെ സമൂഹമാധ്യമങ്ങളില്‍ ഇതുസംബന്ധിച്ച ചര്‍ച്ചകള്‍ നടക്കുകയാണെന്നും ഇവര്‍ മുന്നറിയിപ്പ് നല്‍കുന്നുണ്ട്.

ശത്രു രാജ്യങ്ങള്‍ക്കെതിരെ ചൈന പലപ്പോഴും സൈബര്‍ ആക്രമണം നടത്തിയ ചരിത്രമാണ് ചൈനയുടേത്. നമ്മുടെ കരസേന കഴിഞ്ഞ വര്‍ഷം 23 തവണ സൈബര്‍ ആക്രമണത്തിനു വിധേയമായെന്നു കേന്ദ്രസര്‍ക്കാര്‍ തന്നെ പാര്‍ലമെന്റില്‍ വെളിപ്പെടുത്തിയിരുന്നു. ഓസ്ട്രേലിയ, വിയറ്റ്നാം, ഫിലിപ്പീന്‍സ്, ജപ്പാന്‍ എന്നീ രാജ്യങ്ങള്‍ക്കെതിരേയും ചൈന(ഇവശിമ) പലപ്പോഴായി സൈബര്‍ ആക്രമണം നടത്തിയിരുന്നു.