വീണ്ടും രാഹുല് ഗാന്ധി... ചൈന പ്രധാനമന്ത്രി മോദിയെ പുകഴ്ത്തുന്നത് എന്തുകൊണ്ടെന്ന ചോദ്യവുമായി രാഹുല് ഗാന്ധി; ലഡാക്ക് സംഘര്ഷത്തിന്റെ പശ്ചാത്തലത്തിലും ചൈനീസ് മാധ്യമങ്ങള് മോദിയെ പുകഴ്ത്തുന്നതു സംബന്ധിച്ച റിപ്പോര്ട്ട് പങ്കുവച്ചാണ് രാഹുലിന്റെ വിമര്ശനം
ഇന്ത്യയും ചൈനയും തമ്മിലുള്ള പ്രശ്നങ്ങള് രൂക്ഷമാകുമ്പോഴും പ്രധാനമന്ത്രി നരേന്ദ്രമോദിയെ വിമര്ശിച്ച് കോണ്ഗ്രസ് നേതാവ് രാഹുല് ഗാന്ധി. ഇന്ത്യന് സൈനികര് കൊല്ലപ്പെട്ടിട്ടും ഇന്ത്യയുടെ ഭൂമി കൈയേറിയിട്ടും ചൈന എന്തുകൊണ്ടാണ് പ്രധാനമന്ത്രി നരേന്ദ്ര മോദിയെ പുകഴ്ത്തുന്നതെന്നാണ് രാഹുല് ഗാന്ധി ചോദിക്കുന്നത്. ലഡാക്ക് സംഘര്ഷത്തിന്റെ പശ്ചാത്തലത്തിലും ചൈനീസ് മാധ്യമങ്ങള് മോദിയെ പുകഴ്ത്തുന്നതു സംബന്ധിച്ച റിപ്പോര്ട്ട് പങ്കുവച്ചായിരുന്നു രാഹുലിന്റെ ട്വീറ്റ്.
ഇന്ത്യചൈന അതിര്ത്തി തര്ക്കത്തില് പ്രധാനമന്ത്രി നരേന്ദ്ര മോദിക്കെതിരേ ഇതാദ്യമായല്ല രാഹുല് വിമര്ശനം ഉന്നയിക്കുന്നത്. നരേന്ദ്ര മോദി യഥാര്ഥത്തില് 'സറണ്ടര് മോദി'യാണെന്ന് കഴിഞ്ഞ ദിവസം രാഹുല് പരിഹസിച്ചിരുന്നു. ചൈന വിഷയത്തില് ഇന്ത്യ ശക്തമായ നിലപാട് സ്വീകരിക്കുന്നില്ലെന്നു ചൂണ്ടിക്കാട്ടിയുള്ള അന്തര്ദേശീയ മാധ്യമത്തിന്റെ വാര്ത്ത പങ്കുവച്ചുകൊണ്ടായിരുന്നു രാഹുലിന്റെ പ്രതികരണം.
ലഡാക്കിലെ ഗാല്വന് താഴ്വരയിലുണ്ടായ സംഘര്ഷത്തില് ഇന്ത്യന് മണ്ണ് പ്രധാനമന്ത്രി ചൈനയ്ക്കു മുന്നില് അടിയറവച്ചെന്ന് നേരത്തെ രാഹുല് വിമര്ശിച്ചിരുന്നു. ഇന്ത്യന് മണ്ണില് ആരും കടന്നുകയറിയിട്ടില്ലെന്നു സര്വകക്ഷി യോഗത്തില് പ്രധാനമന്ത്രി നടത്തിയ പ്രസ്താവനയെയും രാഹുലും പ്രതിപക്ഷവും രൂക്ഷമായ ഭാഷയില് വിമര്ശിച്ചു.
https://www.facebook.com/Malayalivartha
