സിദ്ധ ചികിത്സ കോവിഡ് രോഗത്തിന് ഫലപ്രദമാണെന്ന വാദവുമായി തമിഴ്നാട് സര്‍ക്കാര്‍ രംഗത്ത്. സംസ്ഥാനത്ത് കോവിഡ് രോഗികളുടെ എണ്ണം 64,000 കടന്ന സാഹചര്യത്തിലാണ് സിദ്ധചികിത്സയെ അനുകൂലിച്ചുകൊണ്ട് സര്‍ക്കാര്‍ രംഗത്തെത്തിയിരിക്കുന്നത്. രോഗലക്ഷണങ്ങള്‍ പ്രകടിപ്പിക്കാത്ത രോഗികള്‍ക്കും രോഗലക്ഷണങ്ങള്‍ കുറവുള്ളവര്‍ക്കും സിദ്ധചികിത്സയിലൂടെ നൂറു ശതമാനം രോഗമുക്തിയാണു ലഭിക്കുന്നതെന്നാണ് സര്‍ക്കാര്‍ ഭാഷ്യം.

ശാസ്ത്രീയ അടിത്തറയില്ലാത്ത ചികിത്സാരീതികള്‍ പരീക്ഷിക്കുന്നതു രോഗികളുടെ ജീവനു ഭീഷണിയാകുമെന്ന വാദം മന്ത്രി പി. പാണ്ഡ്യരാജന്‍ തള്ളിക്കളഞ്ഞു. നൂറു ശതമാനമാണു വിജയനിരക്ക്. ആരുടെയും ജീവന്‍ അപകടത്തിലാക്കില്ല. സിദ്ധ, യോഗ, ആയുര്‍വേദം എന്നിവ സംയോജിപ്പിച്ചുള്ള ചികിത്സയാണിത്. ജനങ്ങള്‍ക്ക് വിശ്വാസമുണ്ട്. പല കേസുകളുടെയും വിവരങ്ങള്‍ രേഖപ്പെടുത്തി വരികയാണെന്നും മന്ത്രി പറഞ്ഞു. ചെന്നൈയിലെ ഒരു കേന്ദ്രത്തില്‍ 25 രോഗികള്‍ക്കു രോഗമുക്തി റിപ്പോര്‍ട്ട് ചെയ്തതിനെ തുടര്‍ന്ന് സിദ്ധചികിത്സ വ്യാപിപ്പിക്കാനുള്ള തീരുമാനത്തിലാണു സംസ്ഥാന സര്‍ക്കാര്‍.

രോഗികള്‍ ആവശ്യപ്പെടുന്ന മുറയ്ക്കു മാത്രമാണു സിദ്ധ ചികിത്സ നല്‍കുന്നതെന്ന് ആരോഗ്യവകുപ്പ് ഉദ്യോഗസ്ഥന്‍ പറഞ്ഞു. ചികിത്സ ലഭിച്ച എല്ലാവരും സംതൃപ്തരാണെന്നും അവര്‍ പറഞ്ഞു.വെന്റിലേറ്റര്‍ സഹായം ആവശ്യം വരുന്ന രോഗികള്‍ക്ക് അതു ലഭ്യമാക്കും. ആകെ രോഗികളില്‍ മൂന്നു ശതമാനത്തിനു മാത്രമാണ് അതു വേണ്ടിവരുന്നതെന്നും മന്ത്രി പറഞ്ഞു. മുന്‍പ് കഭാസുര കുടിനീര്‍ എന്ന സിദ്ധ കഷായം പ്രതിരോധശേഷി വര്‍ധിപ്പിക്കാനായി സര്‍ക്കാര്‍ നിര്‍ദേശിച്ചിരുന്നു. എല്ലാ വീടുകളിലും ഇത് എത്തിച്ചുനല്‍കുന്നുണ്ട്.