ഐസിഎസ്ഇ 10, ഐഎസ്സി 12, സിബിഎസ്ഇ 12 പരീക്ഷകള് റദ്ദാക്കി, സ്കൂളില് നടത്തിയ പരീക്ഷകളുടെ മാര്ക്ക് നോക്കി ഗ്രേഡ് നിശ്ചയിക്കും
സിബിഎസ്ഇ ഐസിഎസ്ഇ ഐഎസ്സി ബോര്ഡുകള് ജൂലൈ 1 മുതല് 15 വരെ നടത്താന് നിശ്ചയിച്ചിരുന്ന 10, 12 ക്ലാസ്സുകളുടെ പരീക്ഷകള് കോവിഡ് മൂലം റദ്ദാക്കി. ഈ പേപ്പറുകള്ക്ക് സ്കൂളില് നടത്തിയ 3 പരീക്ഷകളുടെ മാര്ക്ക് നോക്കി ഗ്രേഡ് നിശ്ചയിക്കുമെന്നു സിബിഎസ്ഇ സുപ്രീം കോടതിയെ അറിയിച്ചു. ഇതേ മാതൃക പിന്തുടരുമെന്ന് ഐസിഎസ്ഇ, ഐഎസ്സി പരീക്ഷകള് നടത്തുന്ന സിഐഎസ്സിഇയും വ്യക്തമാക്കി. പരീക്ഷ ഒഴിവാക്കാനും പകരം ഇന്റേണല് മാര്ക്ക് കണക്കിലെടുക്കാനും ഇവര് നേരത്തേ തന്നെ ഓപ്ഷന് അനുവദിച്ചിരുന്നു.
ഫലം പ്രഖ്യാപനം ഓഗസ്റ്റ് പകുതിയോടെ ആയിരിക്കുമെന്ന് സിബിഎസ്ഇ അറിയിച്ചു. ഐസിഎസ്ഇ, ഐഎസ്സി ഫലത്തിനും ഓഗസ്റ്റ് വരെ കാത്തിരിക്കേണ്ടി വന്നേക്കും. അസെസ്മെന്റ് സ്കീം അപര്യാപ്തമെന്നു തോന്നുന്ന 12-ാം ക്ലാസ് വിദ്യാര്ഥികള്ക്കായി സാഹചര്യം അനുകൂലമാകുമ്പോള് പരീക്ഷ നടത്തുമെന്ന് സിബിഎസ്ഇ അറിയിച്ചു. മറ്റുള്ളവര്ക്ക് ഈ അവസരമില്ല. വടക്കുകിഴക്കന് ഡല്ഹിയില് മാത്രമാണ് സിബിഎസ്ഇ 10-ാം ക്ലാസ് പരീക്ഷകള് ശേഷിച്ചിരുന്നത്.
അസെസ്മെന്റ് സ്കീം, അതിന്റെ സമയക്രമം, പിന്നീടു ലഭ്യമാക്കുന്ന പരീക്ഷാസൗകര്യം എന്നിവയെല്ലാം വ്യക്തമാക്കി വിശദവിജ്ഞാപനം സിബിഎസ്ഇ ഇന്നു പുറത്തിറക്കണം. ഓരോ സംസ്ഥാനത്തും സ്ഥിതി വ്യത്യസ്തമെന്നതും പരിഗണിക്കണം. ഫലനിര്ണയ രീതിയില് ആശയക്കുഴപ്പം പാടില്ലെന്നു ജസ്റ്റിസ് എ.എം. ഖാന്വില്ക്കര് അധ്യക്ഷനായ ബെഞ്ച് ഓര്മിപ്പിച്ചു.
അസെസ്മെന്റ് സ്കീമില് പ്രശ്നമുണ്ടെങ്കില് കോടതിയെ സമീപിക്കാമെന്നും ജസ്റ്റിസ് ഖാന്വില്ക്കര് അറിയിച്ചു. ബോര്ഡ് പരീക്ഷ നടത്താത്ത പേപ്പറുകളില് സ്കൂളില് നടന്ന രണ്ടു ടേം പരീക്ഷകളുടെയും മോഡല് പരീക്ഷയുടെയും മാര്ക്കാകും പരിഗണിക്കുകയെന്നു സൂചനയുണ്ട്. സിബിഎസ്ഇ നല്കുന്ന വിവരങ്ങള് പരിശോധിച്ച ശേഷം കോടതി ഇന്നു 10.30-ന് അന്തിമ വിധി പറയും.
മെഡിക്കല് പ്രവേശനത്തിനുള്ള 'നീറ്റ്' ജൂലൈ 26-നും ദേശീയ എന്ജിനീയറിങ്/ ആര്ക്കിടെക്ചര് പ്രവേശനത്തിനുള്ള ജെഇഇ മെയിന് ജൂലൈ 18 മുതല് 23 വരെയുമാണു നടക്കേണ്ടത്. ഈ പ്രവേശന പരീക്ഷകളുടെ തീയതിയിലും ഉചിതമാറ്റം കൊണ്ടുവരണമെന്നു കേന്ദ്ര സര്ക്കാരിനു സുപ്രീം കോടതി നിര്ദേശം നല്കി.
ജൂലൈ 16-നുള്ള കേരള എന്ജിനീയറിങ്-ഫാര്മസി പ്രവേശന പരീക്ഷയ്ക്കുള്ള ഒരുക്കങ്ങള് മുന്തീരുമാന പ്രകാരം തുടരുകയാണ്.
https://www.facebook.com/Malayalivartha
