എല്ലാ ട്രെയിന് സര്വീസുകളും ആഗസ്റ്റ് 12 വരെ നിര്ത്തിവയ്ക്കാന് തീരുമാനിച്ച് റെയില്വെ; സ്പെഷ്യല് ട്രെയിനുകള് മുടങ്ങില്ലെന്ന് റെയില്വെ ബോര്ഡ്; ജൂലൈ ഒന്ന് മുതല് ആഗസ്റ്റ് 12 വരെ ബുക്ക് ചെയ്ത ടിക്കറ്റുകളുടെ തുകയാണ് മടക്കി നല്കുക
രാജ്യത്ത് തീവണ്ടി ഗതാഗതം ഉടനെ ഉണ്ടാകില്ലെന്ന് റെയില്വെ ബോര്ഡ്. സാധാരണ ട്രെയിന് ഗതാഗതം ഓഗസ്റ്റ് 12 വരെ റദ്ദാക്കി. പാസഞ്ചര് സര്വീസുകള്, മെയില്/ എക്സ്പ്രസ് തീവണ്ടികള്, സബര്ബന് സര്വീസുകള് എന്നിവയാണ് റദ്ദാക്കിയത്. എന്നാല്, പ്രത്യേക തീവണ്ടികളും രാജധാനി എക്സ്പ്രസും സര്വീസ് തുടരും. രാജ്യത്ത് കൊറോണവൈറസ് മഹാമാരി വ്യാപിക്കുന്നതിനെ തുടര്ന്നാണ് തീവണ്ടി ഗതാഗതം ഓഗസ്റ്റ് 12 വരെ റദ്ദാക്കിയത്.
ടിക്കറ്റ് ബുക്ക് ചെയ്തവര്ക്ക് പണം മടക്കി നല്കും. അതേസമയം, കൊറോണയുടെ പശ്ചാത്തലത്തില് സര്വീസ് നടത്തുന്ന സ്പെഷ്യല് ട്രെയിനുകള് മുടങ്ങില്ലെന്ന് റെയില്വെ ബോര്ഡ് അറിയിച്ചു. ജൂലൈ ഒന്ന് മുതല് ആഗസ്റ്റ് 12 വരെ ബുക്ക് ചെയ്ത ടിക്കറ്റുകളുടെ തുകയാണ് മടക്കി നല്കുക. രാജധാനി, മെയില്, എക്സ്പ്രസ് ട്രെയിനുകള് സര്വീസ് തുടരും.
മെയ് 12 മുതലാണ് സ്പെഷ്യല് ട്രെയിനുകള് സര്വീസ് ആരംഭിച്ചത്. കുടിയേറ്റ തൊഴിലാളികളെ നാട്ടിലെത്തിക്കുന്നതിനും മറ്റു സംസ്ഥാനങ്ങളില് കുടുങ്ങിപ്പോയവരെ സഹായിക്കുന്നതിനുമാണ് സ്പെഷ്യല് ട്രെയിനുകള് സര്വീസ് നടത്തുന്നത്. കൊറോണ രോഗം രാജ്യത്ത് അതിവേഗം വ്യാപിക്കുന്ന പശ്ചാത്തലത്തിലാണ് റെയില്വെയുടെ പുതിയ തീരുമാനം. ട്രെയിന് സര്വീസ് ആരംഭിച്ചാല് കൊറോണ വീണ്ടും ശക്തമാകുമെന്നാണ് വിലയിരുത്തല്.
നേരത്തെ ജൂണ് 30 വരെയുള്ള ട്രെയിനുകള് റെയില്വെ റദ്ദാക്കിയിരുന്നു. ബുക്ക് ചെയ്തവര്ക്ക് പണം മടക്കി നല്കുമെന്നും അറിയിച്ചിരുന്നു. നിയന്ത്രണങ്ങളില് ഇളവുകള് പ്രഖ്യാപിച്ചിട്ടുണ്ടെങ്കിലും ജൂലൈയിലും ട്രെയിന് സര്വീസ് വേണ്ട എന്നാണ് പുതിയ തീരുമാനം. ആളുകള് കൂട്ടത്തോടെ യാത്ര ചെയ്യുന്ന സാഹചര്യമുണ്ടാകുന്നത് മുന്കരുതല് നടപടികള് അവതാളത്തിലാക്കുമെന്ന നിഗമനത്തിന്റെ അടിസ്ഥാനത്തിലാണിത്
അതേസമയം, പുതിയ മാര്ഗ നിര്ദേശം കേന്ദ്രസര്ക്കാര് ജൂണ് 30ന് പുറത്തിറക്കുമെന്ന് റിപ്പോര്ട്ടുണ്ട്. അന്താരാഷ്ട്ര വിമാന സര്വീസുകള് ആരംഭിക്കുമെന്നാണ് സൂചന. തിരഞ്ഞെടുത്ത രാജ്യങ്ങളിലേക്ക് മാത്രമാകും ആദ്യഘട്ടത്തില് സര്വീസ് എന്ന് കേന്ദ്രസര്ക്കാര് വൃത്തങ്ങളെ ഉദ്ധരിച്ച് ഇന്ത്യ ടുഡെ റിപ്പോര്ട്ട് ചെയ്യുന്നു.
ദില്ലി ന്യൂയോര്ക്ക്, മുംബൈ ന്യൂയോര്ക്ക് വിമാന സര്വീസുകള് ആരംഭിച്ചേക്കും. കൂടാതെ ഗള്ഫ് രാജ്യങ്ങളിലേക്കും സര്വീസുണ്ടാകുമെന്നാണ് സൂചനകള്. ഗള്ഫിലേക്ക് സര്വീസ് നടത്താന് സ്വകാര്യ വിമാന കമ്പനികള്ക്ക് അനുമതി നല്കാനാണ് സാധ്യത. അതേസമയം, വിദ്യാഭ്യാസ സ്ഥാപനങ്ങളും മെട്രോ ട്രെയിന് സര്വീസുകളും ഉടന് ആരംഭിക്കാന് സാധ്യതയില്ല. സംസ്ഥാനങ്ങളുടെ അഭിപ്രായം കൂടി പരിഗണിച്ചായിരിക്കും ഇക്കാര്യത്തില് അന്തിമ തീരുമാനം കേന്ദ്രസര്ക്കാര് പ്രഖ്യാപിക്കുക.
https://www.facebook.com/Malayalivartha
