സംഘര്‍ഷമുണ്ടായ ഗല്‍വാന്‍ താഴ്വരയില്‍നിന്ന് ഇന്ത്യ ചൈന സേനകള്‍ കുറച്ചു പിന്നോട്ടു പോയതായി പ്രതിരോധ മന്ത്രാലയ വൃത്തങ്ങള്‍ അറിയിച്ചു. ഗല്‍വാനിലെ പട്രോള്‍ പോയിന്റ് 14ല്‍നിന്ന്, ഇരു സേനകള്‍ തമ്മിലുണ്ടായ ചര്‍ച്ചകളിലെ ധാരണപ്രകാരമാണ് പിന്‍മാറ്റം. ഏകദേശം രണ്ടു കിലോമീറ്ററോളം പിന്‍വാങ്ങിയെന്നാണ് വിവരം. ഇരു സേനകളും മുഖാമുഖം നില്‍ക്കുന്ന അവസ്ഥ ഒഴിവാക്കാനുള്ള മാറ്റം മാത്രമാണിതെന്നാണ് പ്രതിരോധ വൃത്തങ്ങള്‍ നല്‍കുന്ന സൂചന.
ഗല്‍വാന്‍ നദി കവിഞ്ഞൊഴുകുകയാണ്. ഇതു ചൈനീസ് സേന നില്‍ക്കുന്ന പ്രദേശത്തു ബുദ്ധിമുട്ടുണ്ടാക്കുന്നുണ്ട്. ഇതും പിന്മാറ്റത്തിനു കാരണമാണ്. അതേസമയം, നേരത്തേയും ചൈന പിന്മാറിയിരുന്നെങ്കിലും വീണ്ടും വന്നതിനെത്തുടര്‍ന്നാണ് ജൂണ്‍ 15ന് സംഘര്‍ഷമുണ്ടാവുകയും 20 സൈനികര്‍ വീരമൃത്യു വരിക്കുകയും ചെയ്തത്.

ഈ സാഹചര്യത്തെത്തുടര്‍ന്ന് ഇന്ത്യന്‍ സേന മേഖലയില്‍ അതീവ ജാഗ്രത പുലര്‍ത്തുന്നുണ്ട്. എന്നാല്‍ പാംഗോങ്ങിലും മറ്റും ചൈനീസ് സേന പിന്‍വാങ്ങിയിട്ടില്ല.
സേനാതല ചര്‍ച്ചയിലെ ധാരണപ്രകാരം ഘട്ടംഘട്ടമായുള്ള പിന്മാറ്റം ചൈനീസ് സേന ആരംഭിച്ചോയെന്ന് ഉറപ്പാക്കാന്‍ അതിര്‍ത്തിയില്‍ ഇന്ത്യയുടെ പരിശോധന. യഥാര്‍ഥ നിയന്ത്രണ രേഖയില്‍ നേരിട്ടെത്തി ഇക്കാര്യം പരിശോധിക്കാന്‍ ഗല്‍വാന്‍, ഹോട് സ്പ്രിങ്‌സ് എന്നിവിടങ്ങളിലേക്ക് ഇന്ത്യയുടെ പട്രോള്‍ സംഘങ്ങള്‍ നീങ്ങിയതായി സേനാ വൃത്തങ്ങള്‍ പറഞ്ഞു.
സമാനരീതിയില്‍ പരിശോധനയ്ക്കു പോയപ്പോഴാണു ജൂണ്‍ 15നു ഗല്‍വാനില്‍ ഇന്ത്യന്‍ സേന ആക്രമണത്തിനിരയായത്. അതിനാല്‍, പട്രോളിങ്ങില്‍ അതീവ ജാഗ്രത പാലിക്കാന്‍ സേനാംഗങ്ങള്‍ക്കു നിര്‍ദേശം നല്‍കിയിട്ടുണ്ട്. ചൈനീസ് സേന ആദ്യം പിന്‍മാറിയ ശേഷമേ അതിര്‍ത്തിയിലെ സേനാ സന്നാഹങ്ങള്‍ പിന്‍വലിക്കൂ എന്നാണ് ഇന്ത്യയുടെ നിലപാട്.

കഴിഞ്ഞയാഴ്ച നടന്ന സേനാതല ചര്‍ച്ചയില്‍ പാംഗോങ് ഒഴികെയുള്ള സ്ഥലങ്ങളില്‍ നിന്നു ഘട്ടംഘട്ടമായുള്ള പിന്‍മാറ്റത്തിന് ഇരു സേനകളും രൂപരേഖ തയാറാക്കിയിരുന്നു. സേനാ വാഹനങ്ങള്‍, ടെന്റുകള്‍, സേനാംഗങ്ങള്‍ എന്നിവ പല ഘട്ടങ്ങളിലായി പിന്നോട്ടു നീങ്ങി, അതിര്‍ത്തിയില്‍ സേനകള്‍ മുഖാമുഖം നില്‍ക്കുന്ന സ്ഥിതി ഒഴിവാക്കുകയാണു ലക്ഷ്യം. ഓരോ ഘട്ടത്തിനു ശേഷവും 3 ദിവസ ഇടവേള നല്‍കും. ധാരണപ്രകാരമുള്ള പിന്‍മാറ്റം എതിര്‍പക്ഷം നടത്തിയിട്ടുണ്ടോയെന്നു പരിശോധിക്കാന്‍ വേണ്ടിയാണിത്.