നമുക്കും രാജ്യത്തിനും എന്തെങ്കിലും നന്‍മചെയ്യും എന്നു കരുതി വോട്ടുനല്‍കി ജയിപ്പിച്ച എം പിമാര്‍ ആഡംബര ഹോട്ടലുകളില്‍ സുഖിക്കുന്നു. ആ വകയില്‍ അവര്‍ ഖജനാവിന് നല്‍കിയത് 35 കോടിയുടെ അധിക ബാധ്യത. രാജ്യതലസ്ഥാനത്ത് വീടില്ലാത്ത എം.പിമാര്‍ തമ്പടിക്കുന്ന ഹോട്ടല്‍ മുറികളുടെ വാടകയിനത്തില്‍ കേന്ദ്രസര്‍ക്കാര്‍ കൊടുത്തുതീര്‍ക്കാനുള്ളത് 35 കോടി രൂപ. ഇതോടെ പാര്‍ലമെന്റ് സമ്മേളനം നടക്കാത്ത സമയങ്ങളിലെ ഹോട്ടല്‍ സുഖവാസം അവസാനിപ്പിക്കാനുള്ള നിയമനിര്‍മ്മാണത്തിന് കേന്ദ്രം ഒരുങ്ങുന്നു.
ഏപ്രില്‍ ആറുവരെയുള്ള കണക്ക് അനുസരിച്ച് പതിനാറാം ലോക്‌സഭയിലെ 543 അംഗങ്ങളില്‍ 35 പേര്‍ ഒരു വര്‍ഷമായി അശോക ഹോട്ടലിലാണ് മുറിയെടുത്ത് താമസിക്കുന്നത്. 2014 മെയ് 16 മുതലാണ് ഇവര്‍ ഇവിടം താവളമാക്കിയത്. ഇവരുടെ വാടകതന്നെ കോടികള്‍ വരും. ഹോട്ടലില്‍ സ്ഥിരം മുറിയെടുക്കുന്ന ഇവര്‍ പാര്‍ലമെന്റ് ചേരാത്ത സമയങ്ങളില്‍ മുറി പൂട്ടിയിടുകയാണ് പതിവ്. അല്ലെങ്കില്‍ എം.പിമാരുടെ സുഹൃത്തുക്കളോട ബന്ധുക്കളോ സഹായികളോ മുറി സ്വന്തമാക്കും. ഈ സമയത്തുള്ള വാടകയും സര്‍ക്കാര്‍ നല്‍കണം.
ഈ കണക്ക് ലഭ്യമായതോടെയാണ് എം.പിമാരുടെ സുഖവാസം അവസാനിപ്പിക്കാന്‍ കേന്ദ്ര നഗരവികസന മന്ത്രി വെങ്കയ്യ നായിഡു തീരുമാനിച്ചത്. പാര്‍ലമെന്റ് സമ്മേളനമില്ലാത്ത സമയത്തെ വാടക ഒഴിവാക്കാന്‍ ചട്ടങ്ങളില്‍ മാറ്റം കൊണ്ടുവരാന്‍ വെങ്കയ്യ നായിഡു നീക്കം തുടങ്ങി. അധിക ചെലവ് സര്‍ക്കാര്‍ വഹിക്കേണ്ട കാര്യമില്ലെന്നും ചട്ടങ്ങളില്‍ മാറ്റങ്ങള്‍ വേണമെങ്കില്‍ മാറ്റം വരുത്തുക തന്നെ വേണമെന്നാണ് നായിഡുവിന്റെ വാദം. ചട്ടങ്ങളില്‍ മാറ്റം വേണമെന്ന് ഹൗസ് കമ്മിറ്റി ചെയര്‍മാന്‍ അര്‍ജുന്‍ രാം മെഹ്‌വാളിനോട് നായിഡു ആവശ്യപ്പെട്ടു. ധനമന്ത്രി അരുണ ജെയ്റ്റ്‌ലി, ആഭ്യന്തരമന്ത്രി രാജ്‌നാഥ് സിംഗ്, ഉപരിതലപാത മന്ത്രി നിതിന്‍ ഗഡ്കരി എന്നിവരും സമിതിയിലുണ്ട്.
ആഡംബര ഹോട്ടലായ അശോകയിലെ സ്യൂട്ടിന് 12,000 രൂപയും മുറിക്ക് 9,000 രൂപയുമാണ് പ്രതിദിന വാടക. ഹോട്ടലില്‍ തങ്ങുന്നവരില്‍ അധികവും ആദ്യമായി ലോക്‌സഭയില്‍ എത്തിയവരാണ്. മറ്റുള്ളവര്‍ തങ്ങള്‍ക്ക് അനുവദിച്ച വീടുകളിലേക്ക് മാറിക്കഴിഞ്ഞൂ. അവശേഷിക്കുന്ന 35 പേര്‍ക്കും വീട് അനുവദിച്ചുവെങ്കിലും അറ്റകുറ്റപ്പണിയുടെ പേരില്‍ ഹോട്ടലില്‍ തന്നെ തങ്ങുകയാണിവര്‍. ചിലര്‍ കുറച്ചുകൂടി സൗകര്യമുള്ള വീടാണ് ആവശ്യപ്പെട്ടിരുക്കുന്നത്.
ലോക്‌സഭാംഗങ്ങള്‍ക്ക് താമസിക്കാന്‍ നഗരത്തിന്റെ ഹൃദയഭാഗത്തു യന്നെ എം.പി ഫഌറ്റുകളുണ്ട്. രാഷ്ട്രപതി ഭവനു സമീപമാണ് നോര്‍ത്ത് അവന്യൂ, സൗത്ത് അവന്യൂ ഫഌറ്റുകള്‍.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha