നെറ്റ് ന്യൂട്രാലിറ്റിക്ക് നിയന്ത്രണം ഏര്‍പ്പെടുത്താനുള്ള നീക്കത്തിനെതിരെ വ്യാപക പ്രതിഷേധം ഉയരുന്നതിനിടെ എയര്‍ടെല്ലുമായുള്ള സീറോ പ്‌ളാന്‍ കരാറില്‍ നിന്ന് ഇകോമേഴ്‌സ് വെബ്‌സൈറ്റായ ഫ്‌ളിപ്പ് കാര്‍ട്ട് പിന്മാറി. നെറ്റ് ന്യൂട്രാലിറ്റിക്ക് തങ്ങള്‍ പൂര്‍ണ പിന്തുണ നല്‍കുകയാണെന്നും അതിനാല്‍ തന്നെ കരാറുമായി മുന്നോട്ട് പോവില്ലെന്നും ഫ്‌ളിപ്കാര്‍ട്ട് സി.ഇ.ഒ സച്ചിന്‍ ബന്‍സല്‍ ട്വിറ്ററിലൂടെ വ്യക്തമാക്കി.

നെറ്റ് ന്യൂട്രാലിറ്റി ഇല്ലാതാക്കുന്നത് ചെറുകിട ആപ് ഡെവലപേഴ്‌സിനു വരെ ഭീഷണിയാണ്. അതിനാല്‍ തന്നെ നെറ്റ് ന്യൂട്രാലിറ്റി നിലനിര്‍ത്തണമെന്ന അഭിപ്രായമാണുള്ളത്. ട്രായിയുമായി ചേര്‍ന്നുള്ള സേവനദാതാക്കാളുടെ പുതിയ നീക്കത്തെ തങ്ങളും എതിര്‍ക്കുകയാണെന്നും സച്ചിന്‍ പറഞ്ഞു. നെറ്റ് ന്യൂട്രാലിറ്റി സമത്വം നിലനിര്‍ത്തണമെന്നാവശ്യപ്പെട്ട് ട്രായിക്ക് ഇതിനോടകം രണ്ടുലക്ഷത്തിലധികം ഇമെയിലുകള്‍ ലഭിച്ചു കഴിഞ്ഞു. നിലവില്‍ ഇന്റര്‍നെറ്റിലെ ഡാറ്റ ഉപയോഗത്തിനു മാത്രമാണ് ഉപഭോക്താക്കള്‍ സേവനദാതാക്കള്‍ക്ക് പണം നല്‍കുന്നത്.

ഒരു വെബ്‌സൈറ്റ് സന്ദര്‍ശിക്കാനോ, അതിലെ സേവനങ്ങള്‍ ഉപയോഗിക്കാനോ ഉപഭോക്താക്കള്‍ പ്രത്യേകം പണം നല്‍കേണ്ടതില്ല. ടെലികോം റെഗുലേറ്ററി അതോറിറ്റിയുടെ പുതിയ നയം നടപ്പായാല്‍ ഓരോ വെബ്‌സൈറ്റും സന്ദര്‍ശിക്കുന്നതിനും ആ വെബ്‌സൈറ്റ് വഴി വേഗതയേറിയ സേവനങ്ങള്‍ ലഭിക്കുന്നതിനും സേവനദാതാക്കള്‍ക്ക് പണം നല്‍കേണ്ടി വരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha