സ്വര്‍ണ പണയ വായ്പ എടുത്താൽ കൂടുതൽ തുക ലഭിയ്ക്കും..ആര്‍ബിഐ യുടെ പുതിയ നിരക്കനുസരിച്ച് 15 ശതമാനം അധിക തുകയാണ് ലഭിയ്ക്കുക. ആര്‍ബിഐ സ്വര്‍ണ വായ്പാ പരിധി ഉയര്‍ത്തിയതിനാലാണ് വായ്‌പ്പാ എടുക്കുന്നവർക്ക് കൂടുതൽ തുക ലഭിക്കുന്നത് .

ഒരു ലക്ഷം രൂപയുടെ സ്വര്‍ണ പണയ വായ്പ എടുത്താൽ 90,000 രൂപ വരെ ലഭിയ്ക്കും എന്നതാണ് പ്രത്യേകത..മുമ്പ് ഇത് 75,000 രൂപ വരെ മാത്രമായിരുന്നു. സ്വര്‍ണത്തിൻെറ മൂല്യം അനുസരിച്ച് 90 ശതമാനം തുക വരെ വായ്പയായി നൽകാനാണ് നിര്‍ദേശം. 2021 മാര്‍ച്ച് 31 വരെ ഇളവുകൾ തുടരും.

വീടുകളിൽ കുമിഞ്ഞു കൂടുന്ന സ്വര്‍ണ നിക്ഷേപം പുറത്ത് എത്തിയ്ക്കുക എന്ന ലക്ഷ്യം മുന്നിൽ കണ്ടാണ് ആർ ബി ഐ വായ്‌പ്പാ പരിധി ഉയർത്തിയത് .സര്‍വ്വകാല റെക്കോര്‍ഡുകളിൽ സ്വര്‍ണ വില ഉയരുന്നതിനാൽ ഉയര്‍ന്ന മൂല്യത്തിന് അനുസരിച്ച് ഇടപാടുകാര്‍ക്ക് നേട്ടം തരുന്നതാണ് തീരുമാനം. 10 ഗ്രാം സ്വര്‍ണത്തിന് 50,000വും കടന്ന് വില കുതിയ്ക്കുകയാണ്.

കൊവിഡ് കാലത്ത് ഏറ്റവുമധികം ആവശ്യക്കാരുള്ള റീട്ടെയ്ൽ ലോൺ സ്വര്‍ണ പണയ വായ്പയായിരുന്നു. സ്വര്‍ണ പണയ വായ്പയ്ക്ക് കീഴിൽ വിതരണം ചെയ്യുന്ന തുകയിൽ 30 ശതമാനം വരെ വര്‍ധന ഉണ്ടായതായി വിവിധ റിപ്പോര്‍ട്ടുകൾ സൂചിപ്പിയ്ക്കുന്നു.

റിസര്‍വ് ബാങ്കിൻെറ 24-ാമത് പണനയ അവലോകന യോഗത്തിൽ ആണ് ഗോൾഡ് ലോണിലേക്ക് കൂടുതൽ പേരെ ആകര്‍ഷിയ്ക്കുന്ന ഈ തീരുമാനം നിലവിൽ വന്നത് . റിപോ, റിവേഴ്സ് റിപ്പോ നിരക്കുകളിൽ മാറ്റമില്ലാതെ നിലനിര്‍ത്തിയ ആര്‍ബിഐ സ്വര്‍ണ പണയ വായ്പകളിൽ കൂടുതൽ ഇളവ് അനുവദിയ്ക്കുകയായിരുന്നു. ഇത് മൂലം കൂടുതൽ ആളുകൾ സ്വർണ പണയം എടുക്കാൻ മുന്നിലേക്ക് വരും എന്നാണു കണക്കുകൂട്ടൽ