സാതന്ത്ര്യ ദിനത്തോട് അനുബന്ധിച്ച് ഇന്ത്യന്‍ സേനയെ ശക്തിപ്പെടുത്തുന്നത് സംബന്ധിച്ച് പ്രധാനമന്ത്രി നരേന്ദ്ര മോദി രാജ്യത്തെ അഭിസംബോധന ചെയ്തു നടത്തിയ പ്രസംഗത്തിനിടെ പറഞ്ഞിരുന്നു. ഇന്ത്യയുടെ അതിര്‍ത്തിയിലേക്ക് ലക്ഷ്യം വയ്ക്കുന്നവര്‍ക്ക് സായുധസേന അര്‍ഹിക്കുന്ന ഭാഷയില്‍ മറുപടി നല്‍കുമെന്നാണ് മോദി പറഞ്ഞിരുന്നത്. ചൈനയുടെ പേരെടുത്ത് പറയാതെ ലഡാക്ക് അതിര്‍ത്തി വിഷയങ്ങളെ പറ്റി പരാമര്‍ശിക്കുകയായിരുന്നു അദ്ദേഹം. ഇന്ത്യയുടെ സമഗ്രത ഞങ്ങള്‍ക്ക് പരമപ്രധാനമാണ്. ഞങ്ങള്‍ക്ക് എന്തും ചെയ്യാന്‍ കഴിയും, നമ്മുടെ സൈനികര്‍ക്ക് ചെയ്യാന്‍ കഴിയുന്നത് എല്ലാവരും ലഡാക്കില്‍ കണ്ടതാണെന്നും മോദി പറഞ്ഞിരുന്നു.
അതിനുപിന്നാലെ പരസ്പര വിശ്വാസം വര്‍ദ്ധിപ്പിക്കുന്നതിനും തര്‍ക്കങ്ങള്‍ ഒത്തുതീര്‍പ്പാക്കുന്നതിനും ഇന്ത്യയുമായി ചേര്‍ന്ന് പ്രവര്‍ത്തിക്കാന്‍ തയ്യാറാണെന്ന് വ്യക്തമാക്കി ചൈന. പരസ്പരം ബഹുമാനിച്ച് മുന്നോട്ട് പോകാന്‍ ഇരുരാജ്യങ്ങള്‍ക്കും ഇതാണ് ഉചിതമായ സമയമെന്നും ചൈനീസ് വിദേശകാര്യ മന്ത്രാലയം കഴിഞ്ഞ ദിവസം അറിയിച്ചു.
'പ്രധാനമന്ത്രി മോദിയുടെ പ്രസംഗം ഞങ്ങള്‍ ശ്രദ്ധിച്ചു. ഞങ്ങള്‍ അടുത്ത അയല്‍വാസികളാണ്. ഇരു രാജ്യങ്ങളും ജനസംഖ്യയില്‍ ഏറെ മുന്നിലാണ് അതിനാല്‍ ഇരു രാജ്യങ്ങളുടെയും സമാധാനവും സ്ഥിരതയും ഉറാപ്പാക്കാന്‍ ഉഭയകക്ഷി ബന്ധം ശക്തമാക്കണം.പരസ്പ്പരം ബഹുമാനിച്ച് മുന്നോട്ട് പോകാന്‍ ഇരുരാജ്യങ്ങള്‍ക്കും ഇതാണ് ഉചിതമായ സമയം.' ചൈനീസ് വിദേശകാര്യ മന്ത്രാലയ വക്താവ് ഷാവോ ലിജിയാന്‍ പറഞ്ഞു. ഉഭയകക്ഷി ബന്ധം സംരക്ഷിക്കുന്നതിനായി ഇന്ത്യയുമായിയോജിച്ച് പ്രവര്‍ത്തിക്കാന്‍ ചൈന തയ്യാറാണെന്നും അദ്ദേഹം അറിയിച്ചു.