സെന്റര് ഫോര് പബ്ലിക് ഇന്ററസ്റ്റ് ലിറ്റിഗേഷന് നല്കിയ ഹര്ജി: പിഎം കെയേഴ്സ് ഫണ്ടിലെ പണം ദേശീയ ദുരന്ത പ്രതികരണ നിധിയിലേക്ക് മാറ്റണമെന്ന ഹര്ജി സുപ്രീം കോടതി തള്ളി
സെന്റര് ഫോര് പബ്ലിക് ഇന്ററസ്റ്റ് ലിറ്റിഗേഷന്, കോവിഡ് പശ്ചാത്തലത്തില് പ്രധാനമന്ത്രി നരേന്ദ്ര മോദി രൂപീകരിച്ച പിഎം കെയേഴ്സ് ഫണ്ടിലെ പണം ദേശീയ ദുരന്ത പ്രതികരണ നിധിയിലേക്ക് (എന്ഡിആര്എഫ്) മാറ്റണമെന്ന് ആവശ്യപ്പെട്ടുകൊണ്ട് നല്കിയ ഹര്ജി സുപ്രീം കോടതി തള്ളി. കേന്ദ്ര സര്ക്കാരിന്റെ പണം എങ്ങനെ വിനിയോഗിക്കണമെന്നു കോടതിയും പൊതുതാല്പര്യ ഹര്ജിക്കാരുമല്ല തീരുമാനിക്കേണ്ടതെന്നു ബെഞ്ച് വ്യക്തമാക്കി.
കോവിഡ് നിയന്ത്രണ നടപടികള്ക്ക് എന്ഡിആര്എഫില് നിന്ന് പണം നല്കാന് തടസ്സമില്ല. ഈ നിധിയിലേക്ക് വ്യക്തികള്ക്കും പണം നല്കാമെന്നും ജസ്റ്റിസ് അശോക് ഭൂഷണ് അധ്യക്ഷനായ ബെഞ്ച് വ്യക്തമാക്കി. ദുരന്ത നിവാരണത്തിനു സംസ്ഥാനങ്ങളുടെ പക്കലുണ്ടായിരുന്നതില് കൂടുതല് പണം ഇതുവരെ ചെലവായിട്ടില്ല. അതിനാല് ദേശീയ നിധിയില്നിന്നു പണം ആവശ്യപ്പെടേണ്ട സാഹചര്യമുണ്ടായിട്ടില്ല.
പിഎം കെയേഴ്സ് കഴിഞ്ഞ മാര്ച്ച് 27-ന് റജിസ്റ്റര് ചെയ്ത പൊതു ചാരിറ്റബിള് ട്രസ്റ്റാണ്, സര്ക്കാര് നിധിയല്ല. സര്ക്കാരിന്റെ പണമല്ല നിധിയിലുള്ളത്, വ്യക്തികളും മറ്റും നല്കുന്ന സംഭാവനയാണ്. ട്രസ്റ്റിമാരാണ് നടത്തിപ്പുകാര് എന്നതുകൊണ്ട് പൊതുസ്വഭാവം ഇല്ലാതാകുന്നില്ല. നിധിയിലെ പണം പൊതു ആവശ്യത്തിനാണ് ഉപയോഗിക്കേണ്ടത്. പൊതു ചാരിറ്റബിള് ട്രസ്റ്റുകള് കണ്ട്രോളര് ആന്ഡ് ഓഡിറ്റര് ജനറലിന്റെ പരിശോധനയ്ക്കു വിധേയമാകില്ല.
കോവിഡ് നേരിടാന് ദേശീയ ദുരന്ത മാനേജ്മെന്റ് പ്രകാരം പ്രത്യേക പദ്ധതിയും കോവിഡ് മൂലവും ലോക്ഡൗണ് പ്രശ്നങ്ങളാലും മരിച്ചവരുടെ കുടുംബത്തിനു സഹായത്തിനു വ്യവസ്ഥയും വേണമെന്ന ആവശ്യവും കോടതി തള്ളി.
പിഎം കെയേഴ്സ് ഫണ്ടിനെ അവഹേളിക്കാന് ശ്രമിച്ചവര്ക്കെല്ലാം ഇപ്പോള് കാര്യങ്ങള് മനസ്സിലായിട്ടുണ്ടാകുമെന്ന് പാര്ട്ടി പ്രസിഡന്റ് ജെ.പി.നഡ്ഡയും കേന്ദ്ര ഐടി മന്ത്രി രവിശങ്കര് പ്രസാദും പറഞ്ഞു. പിഎം കെയേഴ്സ് ഫണ്ട് തുടരുന്നതില് അപാകതയില്ലെന്നു സുപ്രീം കോടതി നിരീക്ഷിച്ചത് രാഹുല് ഗാന്ധിക്കും അനുയായികള്ക്കുമുള്ള വന് അടിയാണെന്ന് ബിജെപി.
https://www.facebook.com/Malayalivartha
