"കൊവിഷീൽഡ്" കയ്യെത്തും ദൂരത്ത്; 73 ദിവസത്തിനുള്ളിൽ ഇന്ത്യക്കാർക്ക് കൊവിഡ് വാക്സിൻ ലഭ്യമാകുമെന്ന് ഏറ്റവും പുതിയ റിപ്പോർട്ടുകൾ
ഓക്സ്ഫഡ് യൂണിവേഴ്സിറ്റി-ആസ്ട്ര സെനേക എന്നിവർ ചേർന്ന് വികസിപ്പിച്ച 'കൊവിഷീൽഡ് വാക്സിൻ' 73 ദിവസത്തിനകം ലഭ്യമായി തുടങ്ങുമെന്ന് ഏറ്റവും പുതിയ റിപ്പോർട്ടുകൾ. നിലവിൽ വാക്സിന്റെ മൂന്നാംഘട്ട പരീക്ഷണം പുരോഗമിക്കുകയാണെന്നും 73 ദിവസത്തിനകം രാജ്യത്ത് വാക്സിൻ ലഭ്യമാക്കാനാകുമെന്നും സെറം ഇൻസ്റ്റിറ്റ്യൂട്ട് ഓഫ് ഇന്ത്യയിലെ ഉന്നത ഉദ്യോഗസ്ഥൻ വ്യകത്മാക്കിയതായി ഇന്ത്യ ടുഡേ റിപ്പോർട്ട് ചെയ്യുന്നു.
കൊവിഷീൽഡിൻറെ മൂന്നാംഘട്ട പരീക്ഷണം വിജയിക്കുന്നതോടെ രാജ്യത്ത് വാണിജ്യ ഉൽപ്പാദനം ആരംഭിക്കുന്ന ആദ്യത്തെ കോവിഡ് വാക്സിൻ സെറം ഇൻസ്റ്റിറ്റ്യൂട്ടിന്റേതാകുമെന്നാണ് റിപ്പോർട്ട്. 58 ദിവസത്തിനുള്ളിൽ പരീക്ഷണം പൂർത്തിയാക്കാനുള്ള അനുമതിയും ഉൽപ്പാദന മുൻഗണന നൽകുന്ന ലൈസൻസും സെറം ഇൻസ്റ്റിറ്റ്യൂട്ടിനു നൽകിയതായും ബിസിനസ് ടുഡേ റിപ്പോർട്ട് ചെയ്യുന്നു.
അതേസമയം രാജ്യത്ത് സൗജന്യമായി വാക്സിൻ ലഭ്യമാക്കാനാണ് കേന്ദ്ര സർക്കാർ തയാറെടുക്കുന്നെന്നും റിപ്പോർട്ടുകൾ വ്യക്തമാക്കുന്നു. വാക്സിന്റെ മൂന്നാംഘട്ട പരീക്ഷണം രണ്ട് ഘട്ടമായാണ് നടക്കുന്നത്. ആദ്യ ഡോസ് നൽകി 29 ദിവസത്തിന് ശേഷമാണ് രണ്ടാമത്തെ ഡോസ് നൽകുന്നത്. ഇന്നലെ (ഓഗസ്റ്റ് 22 ശനിയാഴ്ച) മൂന്നാംഘട്ട പരീക്ഷണത്തിലെ ആദ്യ വാക്സിൻ ഡോസ് നൽകിയെന്നാണ് റിപ്പോർട്ടുകൾ. രണ്ടാമത്തെ ഡോസ് 29 ദിവസം കഴിഞ്ഞ് നൽകും. രണ്ടാമത്തെ ഡോസ് നൽകിയതിന്റെ റിപ്പോർട്ട് ലഭിക്കാൻ 58 ദിവസം സമയമെടുക്കും. ഫൈനൽ റിപ്പോർട്ട് തയാറാകാൻ വീണ്ടും 15 ദിവസത്തെ സമയമെടുക്കും. ഈ ഘട്ടമെല്ലാം പൂർത്തിയാകുന്നതോടെ വാണിജ്യോൽപാദനം ആരംഭിക്കാനാണ് ഉദ്ദേശിക്കുന്നതെന്നാണ് ഉദ്യോഗസ്ഥർ അറിയിച്ചു.
രാജ്യത്തെ 20 കേന്ദ്രങ്ങളിലാണ് കൊവിഷീൽഡിൻറെ മൂന്നാംഘട്ട പരീക്ഷണം നടക്കുന്നത്. 1600 പേർക്കാണ് ഈ ഘട്ടത്തിൽ വാക്സിൻ നൽകുക. ആസ്ട്രസെനേകയുമായി സെറം ഇൻസ്റ്റിറ്റ്യൂട്ടും ധാരണയിലെത്തിയതായി ഉന്നതോദ്യോഗസ്ഥൻ പറയുന്നു. ഇന്ത്യക്കാർക്ക് സൗജന്യമായി വാക്സിൻ ലഭ്യമാക്കാൻ കേന്ദ്ര സർക്കാർ തയാറാണെന്നും റിപ്പോർട്ടിൽ പറയുന്നു. 2021 ജൂണോടെ 68 കോടി ഡോസ് വാക്സിൻ ഇന്ത്യക്ക് വേണ്ടി നിർമിക്കാനാണ് കേന്ദ്രം നിർദേശം കൊടുത്തിരിക്കുന്നത്.
ഐ.സി.എം.ആർ-ഭാരത് ബയോടെക് എന്നിവരുടെ 'കോവാക്സിൻ', സൈദൂസ് കാഡിലയുടെ 'സൈകോവ്-ഡി' എന്നീ വാക്സിനുകളും അണിയറയിൽ ഒരുങ്ങുന്നുണ്ട്. ഇവയുടെ ഒന്ന്, രണ്ട് ഘട്ട പരീക്ഷണമാണ് ഇപ്പോൾ നടക്കുന്നത്.
അതേസമയം ഈ വര്ഷം അവസാനത്തോടെ ഇന്ത്യയിൽ കൊവിഡ്-19 വാക്സിൻ ഉണ്ടാകുമെന്ന് കേന്ദ്ര ആരോഗ്യമന്ത്രി ഹര്ഷ് വര്ധനും വ്യക്തമാക്കിയിട്ടുണ്ട്. രാജ്യത്തെ ഒരു പരീക്ഷണ വാക്സിൻ മൂന്നാം ഘട്ട ക്ലിനിക്കൽ പരീക്ഷണ ഘട്ടത്തിലാണെന്നും ഒരു വാക്സിൻ വര്ഷാവസാനത്തോടെ വികസിപ്പിച്ചെടുക്കാൻ കഴിയുമെന്നുമാണ് കേന്ദ്ര ആരോഗ്യമന്ത്രി പറഞ്ഞത്.
'നമ്മുടെ പരീക്ഷണ വാക്സിനുകളിലൊന്ന് ക്ലിനിക്കൽ പരീക്ഷണത്തിന്റെ മൂന്നാം ഘട്ടത്തിലാണ്. ഈ വര്ഷം അവസാനത്തോടെ ഒരു വാക്സിൻ വികസിപ്പിക്കാൻ കഴിയുമെന്ന് ഞങ്ങൾക്ക് നല്ല ആത്മവിശ്വാസമുണ്ട്' അദ്ദേഹം പറഞ്ഞു.
https://www.facebook.com/Malayalivartha