സിനിമ ലോകത്തെ ലഹരി മരുന്ന് ബന്ധത്തെ കുറിച്ച് പാര്‍ലമെന്റിലെ പ്രസംഗം: ജയ ബച്ചന്റെ വീടിന്റെ സുരക്ഷ വര്‍ധിപ്പിച്ചു
സിനിമ ലോകത്തെ ലഹരി മരുന്ന് ബന്ധത്തെ കുറിച്ച് ബി.ജെ.പി എം.പി രവി കിഷന്‍ നടത്തിയ പരാമര്‍ശത്തിന് മറുപടി നല്‍കിയതിനു പിന്നാലെ സമാജ്വാദി പാര്‍ട്ടി രാജ്യസഭാംഗം ജയ ബച്ചന്റെ വീടിനു സുരക്ഷ വര്‍ധിപ്പിച്ചു. മുംബൈ ജൂഹുവിലെ ബച്ചന്‍ കുടുംബത്തിന്റെ വസതിയായ ജല്‍സയുടെ സുരക്ഷയാണ് വര്‍ധിപ്പിച്ചത്.
ജയ ബച്ചന്റെ പ്രസംഗത്തിനെതിരെ സമൂഹ മാധ്യമങ്ങളില്‍ മോശമായ ട്രോളുകള്‍ പ്രചരിക്കുന്നതിനാല്‍ മുന്‍കരുതല്‍ എന്ന രീതിയിലാണ് സുരക്ഷ ഏര്‍പ്പെടുത്തുന്നതെന്നാണ് പോലീസ് നിലപാട്.
നടന്‍ സുശാന്ത് സിംഗ് രജ്പുത്തിന്റെ മരണവുമായി ബന്ധപ്പെട്ട് ബോളിവുഡിലെ ലഹരി സ്വാധീനത്തെ കുറിച്ച് രവി കിഷന്‍ നടത്തിയ പ്രസംഗത്തിന് മറുപടിയായി ഏതാനും പേരുടെ പേരില്‍ സിനിമ മേഖലയെ ഒന്നടങ്കം താറടിക്കരുതെന്നായിരുന്നു ജയ പറഞ്ഞത്. ബോളിവുഡില്‍ ജയയ്ക്ക് വലിയ പിന്തുണ ലഭിച്ചുവെങ്കിലും 'ഷെയിം ഓണ്‍ജയബച്ചന്‍' എന്ന ഹാഷ്ടാഗോടെ ട്വിറ്ററില്‍ ട്രെന്‍ഡിംഗ് തുടരുകയാണ്.
നിങ്ങളുടെ മകള്‍ക്കോ മകനോ ആണ് ഈ സ്ഥിതി വരുന്നതെങ്കില്‍ എന്തായിരിക്കും പ്രതികരണമെന്ന് ചോദിച്ചുകൊണ്ട് ജയയ്ക്കെതിരെ കടുത്ത വിമര്‍ശനവുമായി നടി കങ്കണ റണൗത്ത് രംഗത്തെത്തി. രവി കിഷന്‍ ഇന്ന് ജയയെ കടന്നാക്രമിച്ച് രംഗത്തെത്തിയിരുന്നു.
https://www.facebook.com/Malayalivartha
