ബീഹാറില്‍ കോടികള്‍ ചെലവഴിച്ചു നിര്‍മ്മിക്കുന്ന പാലങ്ങള്‍ തകരുന്നത് തുടര്‍ കഥയാകുകയാണ്. ഇതാ ഇപ്പോള്‍ ഉദ്ഘാടനത്തിനൊരുങ്ങിയ പാലം നദിയില്‍ വെള്ളം ഉയര്‍ന്നതിനെത്തുടര്‍ന്ന് നിലംപൊത്തി എന്ന വാര്‍ത്തയാണ് പുറത്ത് വരുന്നത്. ബീഹാറിലെ കൃഷ്മഗഞ്ചിലാണ് സംഭവം. കന്‍കൈ നദിക്കു കുറുകെ 1.42 കോടി രൂപ ചെലവഴിച്ചാണ് പാലം നിര്‍മ്മിച്ചത്. ഗോബവരി ഗ്രാമത്തില്‍ വ്യാഴാഴ്ചയാണ് സംഭവം. അടുത്തയിടെയാണ് പാലത്തിന്റെ നിര്‍മ്മാണം പൂര്‍ത്തിയായത്. ഉദ്ഘാടനവും നിശ്ചയിച്ചിരുന്നു. നദിയില്‍ വെള്ളം ഉയര്‍ന്നതാണ് പാലത്തിന്റെ തകര്‍ച്ചയ്ക്ക് കാരണം എന്നാണ് നിഗമനം.

പാലത്തിന്റെ നിര്‍മ്മാണത്തില്‍ അഴിമതി നടന്നതായി നാട്ടുകാര്‍ ആരോപിച്ചു. പ്രദേശത്ത് കുത്തൊഴുക്കും മണ്ണൊലിപ്പും ഉണ്ടായതിനാലാണ്പാലം തകര്‍ന്നത് എന്നാണ് റിപ്പോര്‍ട്ടുകള്‍ വ്യക്തമാക്കുന്നത്.മുഖ്യമന്ത്രി നിതീഷ് കുമാര്‍ ഉദ്ഘാടനം ചെയ്ത് വെറും 29 ദിവസം മാത്രമായ പാലം ജുലൈയില്‍ തകര്‍ന്നിരുന്നു. 2012 ല്‍ നിര്‍മ്മാണം ആരംഭിച്ച് എട്ട് വര്‍ഷങ്ങള്‍ക്ക് ശേഷം ജുണ്‍ 14 ന് യാത്രക്കാര്‍ക്കായി തുറന്നുകൊടുത്ത 1.4 കിലോമീറ്റര്‍ നീളമുള്ള പാലമാണ് തകര്‍ന്നത്. 264 കോടി ചെലവഴിച്ചായിരുന്നു പാലത്തിന്റെ നിര്‍മ്മാണം.