ടി.ആര്‍.പി മീറ്ററുകള്‍ സ്ഥാപിച്ചിരിക്കുന്ന വീടുകളില്‍ ഒരേ ചാനല്‍ തന്നെ ഓഫാക്കാതെ വച്ച് കൃത്രിമ ടി.ആര്‍.പി റേറ്റിംഗ് സൃഷ്ടിക്കുന്നതായി പോലീസ് കണ്ടെത്തിയതിനെ തുടര്‍ന്ന് റിപ്പബ്ലിക് ടി.വി എം.ഡിയും എഡിറ്റര്‍ ഇന്‍ ചീഫുമായ അര്‍ണാബ് ഗോസ്വാമിയെ മുംബൈ പോലീസ് ചോദ്യം ചെയ്യും. മുംബൈ പോലീസ് കമ്മീഷണര്‍ പരംബീര്‍ സിംഗ് അറിയിച്ചതാണ് ഇക്കാര്യം.

ടി.ആര്‍.പി റേറ്റിംഗ് കൂട്ടുന്നതിനായി ടി.ആര്‍.പി മീറ്ററുകള്‍ സ്ഥാപിച്ചിട്ടുള്ള ചില വീടുകളില്‍ റിപ്പബ്ലിക് ടി.വി തുടര്‍ച്ചയായി വയ്ക്കാന്‍ നിര്‍ദ്ദേശിച്ചിട്ടുണ്ടെന്നും ഇതിനായി മാസം 4500 രൂപ വരെ പ്രതിഫലം നല്‍കുന്നതായും കണ്ടെത്തി. സംഭവുമായി ബന്ധപ്പെട്ട് രണ്ട് പേരെ അറസ്റ്റ് ചെയ്തിട്ടുണ്ട്.  ടി.ആര്‍.പി മീറ്ററുകളില്‍ കൃത്രിമം കാട്ടി, അനധികൃതമായി പരസ്യ വരുമാനം സമ്പാദിക്കുന്നതായി അന്വേഷണത്തില്‍ തെളിഞ്ഞു.

ഫക്ത് ഭാരതിന്റേയും  ബോക്സ് സിനിമയുടെയും ഉടമസ്ഥരെയാണ് പോലീസ് അറസ്റ്റ് ചെയ്തിരിക്കുന്നത്. റിപ്പബ്ലിക് ചാനല്‍ അധികൃതര്‍ക്ക് മുംബൈ പോലീസ് സമന്‍സ് അയച്ചിട്ടുണ്ട്.

അതേസമയം സുശാന്ത് സിംഗിന്റെ മരണവുമായി ബന്ധപ്പെട്ട് കേസില്‍ കമ്മീഷണറുടെ നടപടികളെ ചോദ്യം ചെയ്തതിലുള്ള വൈരാഗ്യം പരംബീര്‍ സിംഗ് തീര്‍ക്കുകയാണെന്ന് അര്‍ണാബ് ആരോപിച്ചു. ഇപ്രകാരം കമ്മീഷണര്‍ക്കെതിരെ ആരോപണം ഉന്നയിച്ച് വിഷയം വഴിതിരിച്ചുവിടാനാണ് അര്‍ണാബ് ഗോസ്വാമിയും റിപ്പബ്ലിക് ചാനലും ശ്രമിക്കുന്നത്.