കോവിഡിനെ തുടര്‍ന്ന് അടച്ച ആരാധനാലയങ്ങള്‍ തുറക്കുന്നതുമായി ബന്ധപ്പെട്ട് ്മഹാരാഷ്ട്ര ഗവര്‍ണര്‍ ഭഗത്സിങ് കോഷിയാരിയും മുഖ്യമന്ത്രി ഉദ്ധവ് താക്കറെയും കൊമ്പുകോര്‍ത്തു. 'താങ്കള്‍ മതനിരപേക്ഷവാദി ആയോ' എന്നു മുനവച്ചു കത്തെഴുതി മഹാരാഷ്ട്ര ഗവര്‍ണര്‍ ഭഗത്സിങ് കോഷിയാരി. 'എന്റെ ഹിന്ദുത്വത്തിന് ആരുടെയും സര്‍ട്ടിഫിക്കറ്റ് വേണ്ട' എന്നു തിരിച്ചടിച്ച് മുഖ്യമന്ത്രി ഉദ്ധവ് താക്കറെ.

താങ്കളൊരു കടുത്ത ഹിന്ദുത്വ വാദിയായിരുന്നല്ലോ. മുഖ്യമന്ത്രി സ്ഥാനം ഏറ്റെടുത്ത ശേഷം അയോധ്യ സന്ദര്‍ശിച്ച് അതു പരസ്യമാക്കുകയും ചെയ്തു.  പിന്നീടു ക്ഷേത്രങ്ങളില്‍ പൂജയും നടത്തി. ആരാധനാലയങ്ങള്‍ തുറക്കുന്നതു നീട്ടാന്‍ എന്തെങ്കിലും ദൈവിക നിര്‍ദേശം ലഭിക്കുന്നുണ്ടോ? അതോ ഒരിക്കല്‍ വെറുത്തിരുന്ന, 'മതനിരപേക്ഷവാദി' ആയി താങ്കള്‍ മാറിയോ? ബാര്‍ വരെ തുറന്നിട്ടും ദേവീദേവന്മാരെ അടച്ചിട്ടിരിക്കുന്നതു വൈരുധ്യമാണ്.

നേരത്തേ, മുംബൈയെ കങ്കണ പാക്ക് അധിനിവേശ കശ്മീരിനോട് ഉപമിച്ചതിനെ തുടര്‍ന്നുള്ള പ്രശ്‌നത്തില്‍ ഗവര്‍ണര്‍ കങ്കണയ്ക്ക് അനുകൂലമായ നിലപാടാണ് എടുത്തത്. ഉത്തരാഖണ്ഡ് മുന്‍ മുഖ്യമന്ത്രിയും സംസ്ഥാന ബിജെപി പ്രസിഡന്റുമായിരുന്നു ഗവര്‍ണര്‍ കോഷിയാരി.

എന്റെ ഹിന്ദുത്വത്തിന് ഗവര്‍ണറുടെയോ മറ്റാരുടെയെങ്കിലുമോ സര്‍ട്ടിഫിക്കറ്റ് വേണ്ട. കോവിഡ് വ്യാപനം വിലയിരുത്തിയശേഷം ആരാധനാലയങ്ങള്‍ തുറക്കും. അങ്ങേയ്ക്കു ദൈവിക നിര്‍ദേശം കിട്ടുന്നുണ്ടാകാം. ഞാന്‍ അത്രയും വലിയവനല്ല. മുംബൈയെ പാക്ക് അധിനിവേശ കശ്മീരിനോട് ഉപമിക്കുന്നവരെ അടുത്തു വിളിച്ചിരുത്തിരുത്തുന്നതു ഹിന്ദുത്വത്തിന്റെ ഭാഗമല്ല. സത്യപ്രതിജ്ഞ ചെയ്യുമ്പോള്‍, 'മതനിരപേക്ഷതയില്‍ ഉറച്ചുനില്‍ക്കുമെന്ന്' പറഞ്ഞത് അങ്ങു മറന്നോ? ബിജെപി അജന്‍ഡ നടപ്പാക്കാനാണു താങ്കള്‍ ശ്രമിക്കുന്നത് എന്നു  മുഖ്യമന്ത്രി ഉദ്ധവ് താക്കറെ തിരിച്ചടിച്ചു.