രാജ്യതലസ്ഥാനത്തെ എയര്‍ ക്വാളിറ്റി ഇന്‍ഡക്സ് വളരെ ശോചനീയമായ അവസ്ഥയിലെത്തി. അന്തീരീക്ഷ മലിനീകരണ തോത് ഉയര്‍ന്നതോടെ കര്‍ശന നിയന്ത്രണങ്ങളുമായി സര്‍ക്കാര്‍. ഡല്‍ഹി മലിനീകരണ നിയന്ത്രണ സമിതിയുടെ ഡാറ്റ പ്രകാരം വ്യാഴാഴ്ച രാവിലെ റെക്കോര്‍ഡ് ചെയ്ത മലനീകരണ തോത് ആര്‍.കെ പുരത്ത് 309-ഉം ആനന്ദ് വിഹാറില്‍ 313-ഉം വസീര്‍പുരില്‍ 339-ഉം ഐടിഒ യില്‍ 366-ഉം ആണ്.

ഡല്‍ഹിയില്‍ മലിനീകരണം കുറയ്ക്കുന്നതിനായി ഇന്നു മുതല്‍ ഡീസല്‍ ജനറേറ്റര്‍ ഉപയോഗിക്കുന്നതിന് വിലക്ക് ഏര്‍പ്പെടുത്തിയിട്ടുണ്ട്. കൂടാതെ അയല്‍സംസ്ഥാനങ്ങളില്‍ കാര്‍ഷിക വിള അവശിഷ്ടങ്ങള്‍ കത്തിക്കുന്നത് ഒഴിവാക്കാനുള്ള നടപടികളും സ്വീകരിക്കുമെന്ന് സര്‍ക്കാര്‍ വ്യക്തമാക്കി.

അന്തരീക്ഷ മലിനീകരണ തോത് സൂചികയില്‍ 0-50 വരെ നല്ലത്, 51-100 വരെ തൃപ്തികരണം, 101-200 വരെ മിതാവസ്ഥ, 201-300 മോശം, 301-400 വളരെ മോശം എന്നിങ്ങനെയാണ് കണക്കാക്കുന്നത്. ഇന്നലെ അന്തരീക്ഷ മലിനീകരണ തോത് സൂചികയില്‍ 276 ആയിരുന്നു.

മഞ്ഞുകാലം കൂടി എത്തുന്നതോടെ ഡല്‍ഹിയില്‍ മലിനീകരണ തോത് ഉയരും. പരിശോധനകള്‍ക്കായി 50 അംഗ പ്രത്യേക സംഘത്തെ നിയോഗിക്കുമെന്ന് മലിനീകരണ നിയന്ത്രണ ബോര്‍ഡ് വ്യക്തമാക്കി.

മുഖ്യമന്ത്രി അരവിന്ദ് കെജ്രിവാള്‍, പരിസ്ഥിതി മന്ത്രി ഗോപാല്‍ റായ് എന്നിവരുടെ നേതൃത്വത്തില്‍ മലിനീകരണ പ്രശ്നങ്ങള്‍ നേരിടാന്‍ വ്യാപക പ്രചാരണവും ആരംഭിച്ചിട്ടുണ്ട്. അയല്‍സംസ്ഥാനങ്ങളില്‍ല കാര്‍ഷിക അവശിഷ്ടങ്ങള്‍ കത്തിക്കുന്നത് തടയാന്‍ ലഫ്.ഗവര്‍ണര്‍ അനില്‍ ബെയ്ജാലും ഇടപെടല്‍ നടത്തുന്നുണ്ട്.