ഇന്ത്യയുടെ വിമാനവാഹക യുദ്ധകപ്പലായ ഐഎന്‍എസ് വിക്രമാദിത്യയില്‍ തീപിടിത്തം. കര്‍ണാടകയിലെ കാര്‍വാര്‍ തുറമുഖത്ത് വച്ച് ഇന്ന് രാവിലെയാണ് കപ്പലില്‍ നിന്നും പുക ഉയരുന്നത് കണ്ടെത്തിയത്. കപ്പലില്‍ നാവികരുടെ താമസത്തിനായി ഒരുക്കിയിരുന്ന ഭാഗത്താണ് തീ പിടിച്ചത്.

ഉടന്‍ തന്നെ ഡ്യൂട്ടിയിലുണ്ടായിരുന്ന നാവികര്‍ ചേര്‍ന്ന് തീയണച്ചതായും ആര്‍ക്കും സംഭവത്തില്‍ പരിക്കില്ലെന്നും നാവികസേന വൃത്തങ്ങള്‍ അറിയിച്ചു.സംഭവത്തില്‍ അന്വേഷണം നടത്തുമെന്നും നാവികസേന അധികൃതര്‍ അറിയിച്ചു.



പരമാവധി 1600ഓളം പേരെ ഉള്‍ക്കൊളളുന്ന വലിയ വിമാനവാഹക കപ്പലാണ് ഐഎന്‍എസ് വിക്രമാദിത്യ. 2013ല്‍ റഷ്യയില്‍ നിന്നാണ് ഇന്ത്യ ഈ കപ്പല്‍ വാങ്ങിയത്. 1987ല്‍ റഷ്യ തദ്ദേശീയമായി നിര്‍മ്മിച്ച് ബകു എന്ന് നാമകരണം ചെയ്ത യുദ്ധ കപ്പലാണ് ഇന്ത്യ 2013ല്‍ വാങ്ങിയത്.

ഒഴുകുന്ന എയര്‍ഫീല്‍ഡ് എന്നറിയപ്പെടുന്ന കപ്പലിന് നീളം 284 മീറ്ററാണ്. കപ്പലിന്റെ ബീമിന് 60 മീറ്ററാണ് വലുപ്പം. ആകെ മൂന്ന് ഫുട്ബാള്‍ കളിസ്ഥലങ്ങളുടെയത്ര വലുപ്പമാണ് കപ്പലിന്റെ മുകള്‍തട്ടിനുളളത്.

ഇന്ത്യന്‍ ഇതിഹാസങ്ങളിലെ വിക്രമാദിത്യ ചക്രവര്‍ത്തിയുടെ പേരാണ് ഈ കപ്പലിന് നല്‍കിയിരിക്കുന്നത്. ഐഎന്‍എസ് വിക്രമാദിത്യന് പുറമേ ഐഎന്‍എസ് വിരാട് എന്നൊരു വിമാനവാഹക കപ്പലും ഇന്ത്യയ്ക്കുണ്ട്.