ജമ്മു കശ്മീരില്‍ ഭീകര താവളം തകര്‍ത്തെറിഞ്ഞ് സുരക്ഷാ സേന. വന്‍ ആയുധ ശേഖരം പിടിച്ചെടുത്തു. ജമ്മു കശ്മീരിലെ പൂഞ്ചില്‍ സുരക്ഷാ സേന നടത്തിയ നിര്‍ണായക നീക്കത്തിനൊടുവിലാണ് ഭീകര താവളം ഇല്ലാതാക്കിയത്.

പൂഞ്ചിലെ ഫാഗ്ലാ മേഖലയിലെ ഭീകര താവളമാണ് തകര്‍ത്തത്. ദേശീയപാത 144 എയില്‍ വിന്യസിച്ചിട്ടുള്ള സുരക്ഷാ സേനയ്ക്ക് നേരെ ഭീകരാക്രമണ സാദ്ധ്യതയുള്ളതായി പൂഞ്ച് പോലീസിന് രഹസ്യവിവരം ലഭിച്ചിരുന്നു. ഇതേ തുടര്‍ന്ന് സുരക്ഷാ സേനയുമായി നടത്തിയ നിര്‍ണായക നീക്കത്തിനൊടുവിലാണ് ഭീകരതാവളം കണ്ടെത്തിയത്. തുടര്‍ന്ന് നശിപ്പിക്കുകയായിരുന്നു.

19 ഹാന്‍ഡ് ഗ്രനേഡുകള്‍, തോക്കുകള്‍, സ്ഫോടക വസ്തുക്കള്‍ എന്നിവയാണ് പിടിച്ചെടുത്തത്. ഇത് പിന്നീട് നിര്‍വ്വീര്യമാക്കി. ഇതിന് പുറമേ ചില രാജ്യവിരുദ്ധ രേഖകളും പിടിച്ചെടുത്തിട്ടുണ്ട്. ജമ്മു കശ്മീരിന്റെ അതിര്‍ത്തി മേഖലകളില്‍ ഭീകരാക്രമണങ്ങള്‍ നടത്താന്‍ ഭീകരര്‍ ലക്ഷ്യമിട്ടിരുന്നതായും പോലീസ് പറഞ്ഞു.