കൊറോണ വ്യാപനത്തിന്റ രണ്ടാം തരംഗം രാജ്യത്ത് അലയടിക്കവേ മരണനിരക്കും ഏവരെയും ആശങ്കയിലാഴ്ത്തുകയാണ്. ഇപ്പോഴിതാ നാടിന് നൊമ്പരമായിരിക്കുകയാണ് യുവ ഡോക്ടറുടെ മരണം. കോവിഡ്​ സ്​ഥിരീകരിച്ച്‌​ മണിക്കൂറുകള്‍ പിന്നിടുന്നതിന്​ മുമ്പേ യുവ ഡോക്​ടര്‍ മരണത്തിന്​ കീഴടങ്ങുകയുണ്ടായി. ജി.ടി.ബി ആശുപത്രിയില്‍ ജൂനിയര്‍ റസിഡന്‍റ്​ ഡോക്​ടര്‍ ആയിരുന്ന അനസ്​ മുജാഹിദ്​ ആണ്​ ഇത്തരത്തിൽ മരിച്ചത്​. 26 വയസായിരുന്നു ഇദ്ദേഹത്തിന്.

ഡല്‍ഹി യൂണിവേഴ്​സിറ്റി കോളജ്​ ​ഓഫ്​ മെഡിക്കല്‍ സയന്‍സസില്‍ നിന്ന്​ എം.ബി.ബി.എസ്​ ബിരുദം നേടിയ ഡോ. അനസ്​ ശനിയാഴ്​ച ഉച്ച വരെ ആശുപത്രിയില്‍ ഡ്യൂട്ടിയിൽ ഉണ്ടായിരുന്നതായി സഹപ്രവർത്തകർ പറഞ്ഞു. രാത്രി എട്ടുമണിയോടെയാണ്​ രോഗബാധ സ്​ഥിരീകരിച്ചത് തന്നെ​. തലച്ചോറിലെ രക്​താസ്രവത്തെ തുടര്‍ന്നായിരുന്നു മരണം എന്നാണ് വിലയിരുത്തൽ​. മറ്റ്​ രോഗങ്ങളൊന്നും അദ്ദേഹത്തിനില്ലായിരുന്നുവെന്ന്​ ഡോക്​ടര്‍മാര്‍ പറയുകയുണ്ടായി.

'ചുറുചുറുക്കാര്‍ന്ന ഒരു മിടുക്കനായ ഡോക്ടറെ നഷ്​ടപ്പെടുന്നത് ഹൃദയഭേദകമാണ്. ക്ലാസുകളില്‍ അധികം സംസാരിക്കാത്ത ഒരു വിദ്യാര്‍ഥിയായിരുന്നുവെങ്കിലും ഇടനാഴിയില്‍ എന്നെ അവന്‍ എപ്പോഴും അഭിവാദ്യം ചെയ്യുമായിരുന്നു. അവന്‍റെ പുഞ്ചിരി എനിക്ക് മിസ്സ്​ ചെയ്യു​ം. കഴിഞ്ഞ മൂന്ന് മാസമായി അവന്‍ ജോലി ചെയ്യുന്ന ഗൈനക്കോളജി വിഭാഗത്തിലെ സീനിയേഴ്​സിനോട്​ ഞാന്‍ സംസാരിച്ചിരുന്നു. അവന്‍റെ പ്രകടനത്തെ കുറിച്ച്‌​ അവര്‍ക്കെല്ലാം നല്ല മതിപ്പാണ്​. ഞാന്‍ അവനെ കുറിച്ചോര്‍ത്ത്​ അഭിമാനിക്കുന്നു. ഇന്നലെ നിരവധി കോവിഡ് രോഗികള്‍ക്ക് അവന്‍റെ സേവനം ലഭിച്ചു. അവനൊരു രക്തസാക്ഷിയാണ്' - എന്നാണ് യു.സി.എം.എസിലെ ഫിസിയോളജി വിഭാഗത്തിലെ പ്രഫസറായ ഡോ. സത്യേന്ദ്ര സിങ്​ പറഞ്ഞത്​.

അതേസമയം കുടുംബം ഡല്‍ഹിയിലുണ്ടെങ്കിലും കോവിഡ്​ ഡ്യൂട്ടിയുള്ളതിനാല്‍ തന്നെ ആശുപത്രി അധികൃതര്‍ ഒരുക്കിയ ലീല പാലസ്​ ഹോട്ടലിലെ റൂമിലായിരുന്നു താമസിച്ചുവന്നിരുന്നത്. മാതാപിതാക്കളെ കൂടാതെ അനസിന്​ നാല്​ സഹോദരങ്ങളുണ്ട്​. എന്‍ജിനിയറായ പിതാവ്​ മുമ്പ്​ ഗള്‍ഫിലാണ് ജോലി ചെയ്​തിരുന്നത്​. ശനിയാഴ്ച വൈകീട്ട്​ കുടുംബത്തോടൊപ്പമാണ്​ നോമ്പ്​ തുറന്നത്​. സുഖമില്ലാത്തതായി തോന്നിയതോടെ ഹോട്ടലിലേക്ക്​ മടങ്ങുന്നതിന്​ മുമ്പ് തന്നെ​ കോവിഡ്​ പരിശോധനക്ക്​ വിധേയനാവുകയായിരുന്നു.

'ശരീരവേദനയും ക്ഷീണവും അനുഭവപ്പെട്ടതിനാല്‍ രാത്രി എട്ടുമണിയോടെ പരിശോധന നടത്തി. ആന്‍റിജന്‍ പരിശോധനയില്‍ കോവിഡ് സ്​ഥിരീകരിച്ചു. കടുത്ത തലവേദനയാണെന്ന് അനസ് പറഞ്ഞപ്പോള്‍ ഡോക്ടര്‍ കുറിപ്പടി എഴുതുകയായിരുന്നു. പെ​ട്ടെന്ന്​ അദ്ദേഹം കുഴഞ്ഞു വീണു. ഡോക്ടര്‍ മാസ്​ക്​ നീക്കിയപ്പോള്‍ മുഖത്തിന്‍റെ ഒരു വശം തളര്‍ന്നു പോയിരുന്നു' - എന്നും അനസിന്‍റെ സുഹൃത്തും സഹപാഠിയുമായ ഡോ. ഷാസ്​ ബേഗ്​ പറഞ്ഞു.

സി.ടി സ്​കാനില്‍ തല്ലച്ചേറില്‍ രക്​തം കട്ടപിടിച്ചതായി കണ്ടെത്തി. പുലര്‍ച്ചെ 2.30 ഓടെ വെന്‍റിലേറ്റര്‍ ഘടിപ്പിച്ചെങ്കിലും അരമണിക്കൂറിന്​ ശേഷം അനസ്​ മരിച്ചു. ഞായറാഴ്ച ഉച്ചക്ക്​ ശേഷം മൃതദേഹം ശാസ്​ത്രി പാര്‍ക്കില്‍ സംസ്​കരിച്ചു.