രാജ്യത്ത് കോവിഡ് വ്യാപനം രൂക്ഷമായിരിക്കുകയാണ്. രോഗവ്യാപനത്തിന്റെ പശ്ചാത്തലത്തില്‍ ഡല്‍ഹിയില്‍ ലോക്ക്ഡൗണ്‍ ഒരാഴ്ച കൂടി ദീര്‍ഘിപ്പിച്ചു.

പ്രതിദിന കൊവിഡ് കണക്കുകളില്‍ കുറവുവരുന്നുണ്ടെങ്കിലും ടെസ്റ്റ് പോസിറ്റിവിറ്റി നിരക്ക് അഞ്ച് ശതമാനത്തിന് താഴെയാക്കുകയാണ് ലക്ഷ്യമെന്ന് മുഖ്യമന്ത്രി അരവിന്ദ് കെജ്രിവാള്‍ പറഞ്ഞു. നിലവിലെ എല്ലാ നിയന്ത്രണങ്ങളും അതേപടി തുടരും.

മെട്രോ സര്‍വീസുകള്‍ അടഞ്ഞുകിടക്കും. ലോക്ക്ഡൗണിനെ തുടര്‍ന്ന് രോഗവ്യാപനത്തില്‍ വലിയ കുറവ് വന്നിട്ടുണ്ടെന്ന് കെജ്രിവാള്‍ പറഞ്ഞു. കഴിഞ്ഞ ഏതാനും ദിവസങ്ങളിലായുണ്ടായ നേട്ടം കളഞ്ഞുകുളിക്കാനില്ല. അതിനാലാണ് ഒരാഴ്ച കൂടി ലോക്ക്ഡൗണ്‍ നീട്ടുന്നത്.

അടുത്ത തിങ്കളാഴ്ച പുലര്‍ച്ചെ അഞ്ച് മണിവരെയാണ് ലോക്ക്ഡൗണ്‍ നീട്ടിയത്. നേരത്തേ ദീര്‍ഘിപ്പിച്ച ലോക്ക്ഡൗണ്‍ നാളെ രാവിലെ അവസാനിക്കേണ്ടതായിരുന്നു. ഏപ്രില്‍ പകുതിയില്‍ ഡല്‍ഹിയിലെ പോസിറ്റിവിറ്റി നിരക്ക് 35 ശതമാനമായിരുന്നെങ്കില്‍ ഇപ്പോഴത് പത്ത് ശതമാനത്തിലേക്ക് താഴ്ന്നിട്ടുണ്ട്.

അതേസമയം, രാജ്യത്ത് കൊറോണ വൈറസ് രോഗ വ്യാപനം രൂക്ഷമായി തുടരുകയാണ്. എന്നാൽ കഴിഞ്ഞ ദിവസത്തെ കേസുകളിൽ നേരിയ കുറവ് . കഴിഞ്ഞ 24 മണിക്കൂറിനിടെ മൂന്ന് ലക്ഷത്തിലധികം പേര്‍ക്കാണ് കൊറോണ വൈറസ് രോഗ ബാധ റിപ്പോര്‍ട്ട് ചെയ്തിരിക്കുന്നത്.

3,11,170 പേര്‍ക്കാണ് കോവിഡ് രോഗബാധ ഉണ്ടായിരിക്കുന്നത്. ഇതോടെ രോഗബാധിതരുടെ ആകെ എണ്ണം 2,46,84,077 ആയി ഉയര്‍ന്നതായി കേന്ദ്രസര്‍ക്കാര്‍ കണക്കുകള്‍ സൂചിപ്പിക്കുകയാണ്.

കഴിഞ്ഞ 24 മണിക്കൂറിനിടെ 3,890 പേരാണ് കോവിഡ് ബാധിച്ച്‌ മരിച്ചിരിക്കുന്നത്. ഇതോടെ മരണസംഖ്യ 2,66,207 ആയി ഉയര്‍ന്നിരിക്കുന്നു. 3,53,299 പേര്‍ രോഗമുക്തരായതോടെ നിലവില്‍ കോവിഡ് ചികിത്സയിലുള്ളവര്‍ 36,73,802 പേരാണ്. രാജ്യത്ത് ഇതുവരെ 2,04,32,898 പേര്‍ കോവിഡ് രോഗത്തില്‍ നിന്നും രോഗമുക്തരായി.