'ഡോക്ടറുടെ നിര്ദേശപ്രകാരമല്ലാതെ ആവി പിടിക്കരുത്'; മുന്നറിയിപ്പുമായി തമിഴ്നാട് ആരോഗ്യമന്ത്രി മാ സുബ്രഹ്മണ്യന്
കോവിഡില് നിന്ന് രക്ഷ നേടാനായി ഡോക്ടറുടെ നിര്ദേശപ്രകാരമല്ലാതെ ആവി പിടിക്കരുതെന്ന് തമിഴ്നാട് ആരോഗ്യമന്ത്രി മാ സുബ്രഹ്മണ്യന്. ആവിയോ മര്ദമുള്ള വായുവോ ശ്വസിക്കുന്നത് ശ്വാസകോശത്തിന് കേടു വരുത്തുക മാത്രമാണ് ചെയ്യുകയെന്നും അദ്ദേഹം മുന്നറിയിപ്പ് നല്കി.
ആവി പിടിക്കുന്നത് കോവിഡിനെ അകറ്റാന് സഹായകമാണെന്ന് അവകാശപ്പെട്ടുകൊണ്ട് സമൂഹ മാധ്യമങ്ങളില് സന്ദേശം പ്രചരിക്കുന്നുണ്ടെന്നും ഇതേത്തുടര്ന്ന് പലരും ഇത് ചെയ്തു തുടങ്ങിയിട്ടുണ്ടെന്നും അദ്ദേഹം പറഞ്ഞു.
റെയില്വെ പൊലീസ് ആവി പിടിക്കുന്നതിനായി സെന്ട്രല് റെയില്വെ സ്റ്റേഷനില് നിരവധി നെബുലൈസറുകള് സ്ഥാപിച്ചിട്ടുണ്ട്. ഒരേ നെബുലൈസര് പലരും ഉപയോഗിക്കുന്നത് വൈറസ് ബാധയേല്ക്കാന് സാധ്യത വര്ധിപ്പിക്കുമെന്ന് ആരോപിച്ച് ആരോഗ്യ വിദഗ്ധര് ഇതിനെ അപലപിച്ചുകൊണ്ട് രംഗത്തു വന്നു കഴിഞ്ഞു.
ലക്ഷണങ്ങളില്ലാത്ത കോവിഡ് രോഗികളില് നിന്ന് മറ്റുള്ളവരിലേക്ക് രോഗം പടരാന് ഇത്തരം പ്രവര്ത്തനങ്ങള് ഇടയാക്കുമെന്നും അതിനാല് വിവിധ സംഘടനകളോടും സര്ക്കാര് ഇതര സംഘടനകളോളും പൊതു ഇടങ്ങളില് ഒരിടത്തും ഇത്തരത്തില് നെബുലൈസറുകള് സ്ഥാപിക്കരുതെന്ന് മാ സുബ്രഹ്മണ്യന് അഭ്യര്ഥിച്ചു.
https://www.facebook.com/Malayalivartha
