നാരദ ഒളിക്യാമറ കേസ്; സി.ബി.ഐ അറസ്റ്റ് ചെയ്ത തൃണമൂല് കോണ്ഗ്രസ് മന്ത്രിമാര്ക്കും എംഎല്എയ്ക്കും ജാമ്യം
നാരദ ഒളിക്യാമറ കേസുമായി ബന്ധപ്പെട്ട് അറസ്റ്റിലായ തൃണമൂല് കോണ്ഗ്രസ് മന്ത്രിമാര്ക്കും എംഎല്എയ്ക്കും ജാമ്യം. കൊല്ക്കത്തയിലെ പ്രത്യേക സിബിഐ കോടതിയാണ് അറസ്റ്റിലായ നാലു പേര്ക്കും ജാമ്യം അനുവദിച്ചത്. മന്ത്രിമാരായ ഫിര്ഹാദ് ഹക്കീം, സുബ്രതാ മുഖര്ജി, എംഎല്എ മദന് മിത്ര, മുന്മന്ത്രി സോവന് ചാറ്റര്ജി എന്നിവരെയാണ് സിബിഐ ഇന്ന് അറസ്റ്റു ചെയ്തത്.
നാരദ ഒളിക്യാമറ ഓപ്പറേഷന്റെ ഭാഗമായി സാങ്കല്പ്പിക കമ്ബനിയുടെ പ്രതിനിധികളെന്ന ഭാവത്തില് എത്തിയവരില് നിന്ന് കൈക്കൂലി വാങ്ങിയ കേസിലായിരുന്നു സിബിഐയുടെ നടപടി. ഇന്ന് രാവിലെ ഒന്പത് മണിയോടെയായിരുന്നു അറസ്റ്റ്. ഇവക്കെതിരെ അന്വേഷണം നടത്താന് ഗവര്ണര് ജഗദീപ് ധന്കര് സിബിഐക്ക് അനുമതി നല്കിയിരുന്നു.
എന്നാല് തൃണമൂല് നേതാക്കളെ അറസ്റ്റ് ചെയ്തതിന് പിന്നാലെ സിബിഐ ഓഫീസിന് മുന്നില് നാടകീയ രംഗങ്ങളാണ് അരങ്ങേറിയത്. തൃണമൂല് അനുകൂലികള് സിബിഐ ഓഫീസിന് നേരെ കല്ലെറിയുകയും മുദ്രാവാക്യം മുഴക്കുകയും ചെയ്തു.
കേന്ദ്രസര്ക്കാര് അന്വേഷണ ഏജന്സികളെ ഉപയോഗിച്ച് നാടകം കളിക്കുകയാണെന്നായിരുന്നു തൃണമൂല് കോണ്ഗ്രസിന്റെ ആരോപണം. മന്ത്രിമാരെയും നേതാക്കളെയും ചോദ്യം ചെയ്യുന്നതിന് പിന്നില് രാഷ്ട്രീയ ലക്ഷ്യങ്ങള് ഉണ്ടെന്നും ഇതിനോട് യാതൊരു യോജിപ്പുമില്ലെന്നും മുഖ്യമന്ത്രി മമത ബാനര്ജിയും പ്രതികരിച്ചിരുന്നു. സിബിഐ ഓഫീസിലെത്തിയ മമത തന്നെയും അറസ്റ്റ് ചെയ്യണമെന്ന് ആവശ്യപ്പെട്ടിരുന്നു.
https://www.facebook.com/Malayalivartha
