തങ്ങളുടെ പ്രിയപ്പെട്ടവരെ നഷ്ടമായ ആ കുഞ്ഞുങ്ങളുടെ വളര്ത്തച്ഛന് ആകേണ്ടത് സര്ക്കാറിന്റെ ഉത്തരവാദിത്വം! അനാഥ കുഞ്ഞുങ്ങളെ ഏറ്റെടുത്ത് പഞ്ചാബ് ; പ്രതിമാസം 1500 രൂപയും ബിരുദതലം വരെ സൗജന്യ വിദ്യാഭ്യാസവും
കോവിഡ് വ്യാപനം മൂലം മാതാപിതാക്കളെ നഷ്ടമായ കുട്ടികള്ക്ക് പ്രതിമാസം 1500 രൂപ സാമൂഹ്യ സുരക്ഷ പെന്ഷനായി നല്കാന് പഞ്ചാബ് സര്ക്കാര് തീരുമാനിച്ചു.കുഞ്ഞുങ്ങള്ക്ക് ബിരുദതലം വരെ സൗജന്യ വിദ്യാഭ്യാസവും സര്ക്കാര് നല്കും. തങ്ങളുടെ പ്രിയപ്പെട്ടവരെ നഷ്ടമായ ആ കുഞ്ഞുങ്ങളുടെ വളര്ത്തച്ഛന് ആകേണ്ടത് സര്ക്കാറിന്റെ ഉത്തരവാദിത്വമാണെന്ന് മുഖ്യമന്ത്രി അമരീന്ദര് സിങ് കൂട്ടിച്ചേര്ത്തു
കൂടാതെ നാഥനെ നഷ്ടപ്പെട്ട കുടുംബങ്ങള്ക്ക് സാമ്പത്തിക സഹായം നല്കാനും തീരുമാനമായി. ജൂലായ് ഒന്ന് മുതല് ആനുകൂല്യങ്ങള് നല്കി തുടങ്ങും.കോവിഡ് മഹാമാരി മൂലം അനാഥരായ കുഞ്ഞുങ്ങള്ക്കും ഗൃഹനാഥനെ നഷ്ടമായ കുടുംബത്തിലെ കുഞ്ഞുങ്ങള്ക്കും സര്ക്കാര് സ്ഥാപനങ്ങളിലാകും വിദ്യാഭ്യാസ സൗകര്യം തയ്യാറാക്കുന്നത്.
അനാഥര്ക്ക് 21 വയസ്സ് തികയുന്നതുവരെയും ഗൃഹനാഥരെ നഷ്ടമായവരുടെ കുടുംബങ്ങള്ക്ക് മൂന്ന് വര്ഷത്തേക്കും ആനുകൂല്യങ്ങള് ലഭ്യമാക്കും. തുടര്ന്ന് സ്ഥിതിഗതികള് വിലയിരുത്തി തീരുമാനമെടുക്കുമെന്നും മുഖ്യമന്ത്രിയുടെ ഓഫീസ് അറിയിച്ചു.
ദരിദ്ര കുടുംബാംഗങ്ങള്ക്ക് ‘ഘര് ഘര് റോസ്ഗാര് ടെ കരോബാര് മിഷന്’ കീഴില് അനുയോജ്യമായ ജോലി കണ്ടെത്താന് സര്ക്കാര് സഹായിക്കും.കോവിഡ് ബാധിതര്ക്ക് 51,000 രൂപ ഗ്രാന്റ് നല്കുന്ന ആശീര്വാദ് പദ്ധതിക്ക് ജൂലൈ ഒന്നിന് ആരംഭം കുറിക്കും .ഇവര്ക്ക് സംസ്ഥാന സ്മാര്ട്ട് റേഷന് കാര്ഡ് പദ്ധതി പ്രകാരം സൗജന്യ റേഷനും സര്ബത്ത് സേഹത്ത് ബിമ യോജനയ്ക്ക് കീഴില് ഇന്ഷൂറന്സ് കവറേജ് ലഭിക്കുമെന്നും സര്ക്കാര് വ്യക്തമാക്കുകയുണ്ടായി.
https://www.facebook.com/Malayalivartha
