ലിവിംഗ് ടുഗെദര്‍ കുറ്റകരമല്ലെന്ന് പഞ്ചാബ് ഹരിയാന ഹൈക്കോടതി വിധി. പ്രായപൂര്‍ത്തിയായവര്‍ വിവാഹം കഴിക്കാതെ ഒന്നിച്ചു ജീവിക്കുന്നതില്‍ കുറ്റകരമായി ഒന്നുമില്ല എന്ന് കോടതി വ്യക്തമാക്കി. ലിവിംഗ് ടുഗെദര്‍ എല്ലാവര്‍ക്കും അംഗീകരിക്കാന്‍ കഴിയില്ലായിരിക്കാം, എന്നാല്‍ ഇത് കുറ്റകരമല്ലെന്ന് കോടതി നിരീക്ഷിച്ചു.

ജയ്ശ്രീ താക്കൂര്‍ അധ്യക്ഷയായ ബഞ്ചിന്റെതാണ് നിരീക്ഷണം. പ്രായപൂര്‍ത്തിയായ സ്ത്രീയും പുരുഷനും ലിവിംഗ് ടുഗെദറിലാണെന്നും സ്ത്രീയുടെ കുടുംബത്തില്‍ നിന്ന് ഭീഷണിയുണ്ടെന്നും ഇതിനാല്‍ ഒരുമിച്ച് ജീവിക്കാന്‍ സുരക്ഷ വേണമെന്നും ആവശ്യപ്പെട്ട് കോടതിയെ സമീപിച്ചിരുന്നു.

ഗുല്‍സ കുമാരി (19), ഗുര്‍വിന്ദര്‍ സിംഗ് (22) എന്നിവര്‍ തങ്ങള്‍ ഒരുമിച്ച് താമസിക്കുന്നതായും താമസിയാതെ വിവാഹം കഴിക്കാന്‍ ഉദ്ദേശിക്കുന്നതായും പറഞ്ഞ് നല്‍കിയ ഹരജിയിലായിരുന്നു കോടതി പരാമര്‍ശം. ഗുല്‍സ കുമാരിയുടെ ബന്ധുക്കളില്‍ നിന്ന് ഇവര്‍ക്ക് ഭീഷണിയുള്ളതായും ഹര്‍ജിയില്‍ വ്യക്തമാക്കുന്നുണ്ട്. പുരുഷന് വിവാഹ പ്രായമാകുന്ന 21 വയസ്സുവരെ ഇവര്‍ക്ക് ഒരുമിച്ച് ജീവിക്കണമെന്നതായിരുന്നു ഇവരുടെ ആവശ്യം.

യുവതിക്കും യുവാവിനും ജീവന് ഭീഷണിയുണ്ടെന്ന് പൊലീസിന് ബോധ്യപ്പെട്ടാല്‍ അവര്‍ക്ക് സംരക്ഷണം നല്‍കണമെന്നും ഹൈക്കോടതി നിര്‍ദേശം നല്‍കി.'ലിവ് ഇന്‍ റിലേഷന്‍ഷിപ്പിന് സാമൂഹ്യമായി സ്വീകാര്യത കൂടുന്നുണ്ട്. ലിവിംഗ് ടുഗദര്‍ ഒരിക്കലും കുറ്റകൃത്യമല്ല. മറ്റെല്ലാ പൗരന്‍മാര്‍ക്കുമുള്ള അവകാശങ്ങള്‍ ലിവിംഗ് ടുഗദറായിട്ടുള്ള ദമ്പതികള്‍ക്കുമുണ്ട്,' കോടതി പറഞ്ഞു.

നേരത്തെ ലിവിംഗ് ടുഗദര്‍ അനുവദിക്കാനാവില്ലെന്ന് പഞ്ചാബ്-ഹരിയാന ഹൈക്കോടതിയുടെ മറ്റൊരു ബെഞ്ച് പറഞ്ഞിരുന്നു. വാസ്തവത്തില്‍ ഹര്‍ജി സമര്‍പ്പിച്ചവര്‍ ഉദ്ദേശിക്കുന്നത് അവരുടെ ലിവ് ഇന്‍ റിലേഷനുള്ള അംഗീകാരമാണെന്നും അത് ധാര്‍മ്മികമായും സാമൂഹികമായും സ്വീകാര്യമല്ലെന്നും പറഞ്ഞ കോടതി ഹര്‍ജിയില്‍ ഒരു സംരക്ഷണ ഉത്തരവും പാസാക്കാന്‍ കഴിയില്ലെന്ന് പറഞ്ഞ് കഴിഞ്ഞ ദിവസം തള്ളുകയായിരുന്നു. ജസ്റ്റിസ് എച്ച് എസ് മദാന്റെയായിരുന്നു ഉത്തരവ്.