കൊവിഡ് ബാധിച്ച് മരിച്ചയാളുടെ മൃതദേഹം സംസ്കരിച്ചു, 18 ദിവസത്തിന് ശേഷം മരിച്ചയാള് തിരികെ വീട്ടിലെത്തി; അപ്പോള് കെട്ടിപ്പൊതിഞ്ഞ് ആശുപത്രി അധികൃതര് നല്കിയ മൃതദേഹം ആരുടേത്? വീഴ്ച തിരിച്ചറിയാതെ ആശുപത്രി അധികൃതര്
കൊവിഡ് ബാധിച്ച് ആശുപത്രിയില് പ്രവേശിപ്പിച്ചയാള് മരിച്ചെന്ന് ആശുപത്രി അധികൃതര്. ആശുപത്രി അധികൃതര് നല്കിയ മൃതദേഹം കൊവിഡ് പ്രോട്ടോക്കോള് പ്രകാരം സംസ്കരിച്ചു. തുടര്ന്നാണ് നാട്ടുകാരെയും വീട്ടുകാരെയും ഞെട്ടിച്ചുകൊണ്ട് ആ സംഭവമുണ്ടായി. 18 ദിവസത്തിന് ശേഷം മരിച്ചയാള് തിരിച്ചുവന്നു. ആന്ധ്രപ്രദേശിലെ വിജയവാഡയിലാണ് സംഭവം.
70 കാരിയായ തന്റെ ഭാര്യ ഗിരിജ്ജമ്മയെ കൊവിഡ് ബാധിച്ച് ആശുപത്രിയില് പ്രവേശിപ്പിച്ചതായിരുന്നു മുത്യാല ഗദ്ദയ്യ. കൊവിഡ് ബാധിച്ച ഭാര്യ വിജയവാഡയിലെ ആശുപത്രിയില് വച്ച് മരിച്ചുവെന്ന് അറിയിപ്പു വന്നു. മെയ് 15ന് മൂടിക്കെട്ടി കിട്ടിയ ഭാര്യയുടെ മൃതദേഹം ഗദ്ദയ്യ കൊവിഡ് പ്രോട്ടോക്കോള് പ്രകാരം സംസ്കരിച്ചു. എന്നാല് 18-ാം ദിവസം മരിച്ചെന്ന് കരുതിയ 70 കാരി ഗിരിജ്ജമ്മ തിരിച്ചുവരുകയായിരുന്നു.
ആന്ധ്രാപ്രദേശിലെ ജഗയ്യപ്പേട്ട് മണ്ഡാലിലിലെ ക്രിസ്റ്റീനപേട്ട് ഗ്രാമത്തിലാണ് വിചിത്രമായ അനുഭവം ഉണ്ടായത്. മെയ് 12നാണ് വിജയവാഡയിലെ സര്ക്കാര് ആശുപത്രിയില് വൃദ്ധയെ പ്രവേശിപ്പിച്ചത്. മെയ് 15ന് ആശുപത്രിയിലെത്തി അന്വേഷിച്ചപ്പോള് ഭാര്യ മരിച്ചുപോയെന്നാണ് ഗദ്ദയ്യക്ക് ലഭിച്ച വിവരം. കെട്ടിപ്പൊതുഞ്ഞ ഒരു മൃതദേഹവും അയാള് ആശുപത്രിയില് നിന്ന് ഏറ്റുവാങ്ങി. തകര്ന്നുപോയ ആ വൃദ്ധന്, മൃതദേഹം തന്റെ ഗ്രാമത്തിലെത്തിക്കുകയും ആചാരപ്രകാരം സംസ്കരിക്കുകയും ചെയ്തു.
ദിവസങ്ങള് കഴിഞ്ഞ് മെയ് 23ന് അവരുടെ 35കാരന് മകന് മുത്യാല രമേശും കൊവിഡ് ബാധിച്ച് മരിച്ചു. ഇതോടെ പൂര്ണ്ണമായി തകര്ന്ന കുടുംബം മകന്റെ സംസ്കാര ചടങ്ങുകളും നടത്തി. എന്നാല് ഗിരിജമ്മ വീട്ടിലെത്തിയപ്പോഴാണ് ഞെട്ടിക്കുന്ന സത്യം കുടുംബം മനസിലാക്കിയത്. ഗിരിജമ്മയ്ക്ക് പകരം ആശുപത്രി കൈമാറിയത് മറ്റൊരു മൃതദേഹമായിരുന്നു.
രോഗം മാറിയ തന്നെ കൂട്ടാന് ആരും ആശുപത്രിയിലേക്ക് വരാത്തതില് മനംനൊന്തിരുന്ന ഗിരിജമ്മയ്ക്ക് ആശുപത്രി അധികൃതര് വീട്ടിലെത്താന് 3000 രൂപ നല്കി. ഇതുമായി വീട്ടിലെത്തിയപ്പോഴാണ് നടന്നതെല്ലാം ഗിരിജ്ജമ്മയും അറിയുന്നത്. കെട്ടിപ്പൊതിഞ്ഞ് തന്നതിനാല് മൃതദേഹം മറ്റാരുടേതെങ്കിലുമാണോ എന്ന് ഗിരിജ്ജമ്മയുടെ കുടുംബമോ, നാട്ടുകാരോ നോക്കിയിരുന്നില്ല. കൊവിഡ് ബാധ ഭയന്ന് ഇവര് പെട്ടന്ന് സംസ്കരിക്കുകയായിരുന്നു.
https://www.facebook.com/Malayalivartha