'വാക്സീന് സ്വീകരിച്ചശേഷം രണ്ടാമതും കോവിഡ് ബാധിച്ചവരില് ഒരാള് പോലും മരിച്ചിട്ടില്ല'; പഠന റിപ്പോര്ട്ട് പുറത്തുവിട്ട് ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ്
വാക്സീന് സ്വീകരിച്ചശേഷം രണ്ടാമതും കോവിഡ് ബാധിച്ചവരില് ഒരാള് പോലും ഏപ്രില്- മേയ് മാസങ്ങളില് മരിച്ചിട്ടില്ലെന്ന് പഠന റിപ്പോര്ട്ട്. വാക്സീന് സ്വീകരിച്ചവര്ക്കും രണ്ടാം തരംഗത്തില് കോവിഡ് ബാധിക്കുന്ന ബ്രേക് ത്രൂ വ്യാപനത്തെക്കുറിച്ചുള്ള സൂക്ഷ്മ പഠനത്തിനായി ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ് (എയിംസ്) നടത്തിയ ജീനോം സീക്വന്സിങ്ങിലാണ് ഈ കണ്ടെത്തല്.
വാക്സിന് സ്വീകരിച്ചവര്ക്ക് രണ്ടാമതും കോവിഡ് ബാധിക്കുന്നതിനെക്കുറിച്ച് ഏപ്രില്-മേയ് മാസത്തിലാണ് എയിംസ് പഠനം നടത്തിയത്. രണ്ടാം തരംഗത്തില് ഈ വിഷയത്തില് നടക്കുന്ന ആദ്യപഠനമായിരുന്നു ഇത്. ശരീരത്തില് വൈറസ് വ്യാപനത്തിന്റെ തോതു കൂടുതലാണെങ്കിലും വാക്സിന് സ്വീകരിച്ച ശേഷം വീണ്ടും രോഗം ബാധിച്ചവരില് ഒരാള് പോലും ഇക്കാലയളവില് മരിച്ചിട്ടില്ല എന്ന് പഠനത്തില് കണ്ടെത്തി.
63 ബ്രേക് ത്രൂ ഇന്ഫക്ഷന് കേസുകളാണ് പഠനവിധേയമാക്കിയത്. ഇതില് 36 പേര് രണ്ട് ഡോസ് വാക്സിനും 27 പേര് ഒരു ഡോസും സ്വീകരിച്ചവരായിരുന്നു. ഇതില് 53 പേര് കോവാക്സിനും 10 പേര് കോവിഷീല്ഡുമാണ് എടുത്തത്. കോവിഡിനെ പ്രതിരോധിക്കാനുള്ള ആന്റിബോഡി ശരീരത്തില് ഉണ്ടായിട്ടും രോഗബാധിതരായവരാണ് ഇവര്.
ഇവരില് ചിലരെ അത്യാഹിത വിഭാഗത്തില് പ്രവേശിപ്പിക്കേണ്ടിവന്നതോടെ വാക്സിന് നല്കുന്ന സുരക്ഷയെ സംബന്ധിച്ചു ആശങ്കയുയര്ന്നിരുന്നെന്നും ഈ സാഹചര്യത്തിലാണ് പഠനം നടത്തിയതെന്നും എയിംസ് അധികൃതര് വ്യക്തമാക്കി. വാക്സിന് സ്വീകരിച്ച ആളുകള്ക്കു പോലും വീണ്ടും കോവിഡ് ബാധിക്കാനും മരിക്കാനും നേരിയ സാധ്യതകളുണ്ടെന്ന് യു.എസ് ആരോഗ്യ ഏജന്സിയായ സെന്റര് ഫോര് ഡിസീസ് കണ്ട്രോള് ആന്ഡ് പ്രിവന്ഷന് (സി.ഡി.സി) പറഞ്ഞിരുന്നു.
എന്നാല്, എയിംസ് പഠനവിഷയമാക്കിയെടുത്തവരില് ഒരാള്ക്കു പോലും ഗുരുതരമായ രോഗബാധ കണ്ടെത്തിയില്ല. മിക്കവര്ക്കും അഞ്ച് മുതല് ഏഴ് ദിവസം വരെ കടുത്ത പനി ഉണ്ടായി. മറ്റു രോഗങ്ങള് ഇല്ലാത്തവരെയാണ് പഠനവിധേയരാക്കിയത്. 21നും 92നും ഇടക്ക് പ്രായമുള്ള 63 പേരിലാണ് പഠനം നടത്തിയത്. ഇതില് 41 പേര് പുരുഷന്മാരും 22 പേര് സ്ത്രീകളുമായിരുന്നു.
https://www.facebook.com/Malayalivartha