നടന്‍ ജയറാമിനെതിരെ പരാതിയുമായി ആനപ്രേമികള്‍ പ്രധാനമന്ത്രി നരേന്ദ്രമോഡിക്ക് കത്തെഴുതി.ജയറാമിന്റെ കണ്ണന്‍ എന്ന ആനയുടെ വിയോഗത്തെ തുടര്‍ന്ന് അതിന്റെ കൊമ്പുകള്‍ ജയറാമിനു തന്നെ നല്‍കിയ സര്‍ക്കാര്‍ നടപടിക്കെതിരെയാണ് ആനപ്രേമികള്‍ പ്രധാനമന്ത്രിക്ക് കത്തെഴുതിയത്.
ആനയുടെ കൊമ്പുകള്‍ ജയറാമിനു തിരികെ നല്‍കിയ സര്‍ക്കാര്‍ നടപടിക്കെതിരെ തൃശൂര്‍ ഹെറിറ്റേജ് അനിമല്‍ ടാസ്‌ക് ഫോഴ്‌സാണ് രംഗത്തെത്തിയത്. ഇവര്‍ ഇക്കാര്യമുന്നയിച്ചു പ്രധാനമന്ത്രിക്കും പരാതി അയച്ചിട്ടുണ്ട്. ജയറാമിന് ആനയെ ലഭിച്ചതു പാരമ്പര്യമായല്ലന്നാണു പരാതിക്കാര്‍ പറയുന്നത്. അതിനാല്‍ തന്നെ ആനയുടെ കൊമ്പുകള്‍ തിരികെ നല്‍കിയ സര്‍ക്കാര്‍ നടപടി നിയമവിരുദ്ധമാണെന്നാണു പരാതിയില്‍ വ്യക്തമാക്കുന്നു. ആനക്കൊമ്പു തിരികെ നല്‍കിയ നടപടി റദ്ദാക്കണമെന്നും കൊമ്പു തിരികെ വാങ്ങാന്‍ നടപടി സ്വീകരിക്കണമെന്നും സംഘടന പ്രധാനമന്ത്രിയോട് ആവശ്യപ്പെട്ടിട്ടുണ്ട്.
മുമ്പ് ആനക്കൊമ്പു കൈവശം വച്ച കേസില്‍ സൂപ്പര്‍ താരം മോഹന്‍ലാലിനെതിരെയും നടപടികള്‍ ഉണ്ടായിട്ടുണ്ട്. മോഹന്‍ലാല്‍ ആനക്കൊമ്പു കൈവശം വച്ചത് നിയമവിരുദ്ധമെന്നു വനം വകുപ്പ് ഹൈക്കോടതിയെ അറിയിക്കുകയും ചെയ്തിരുന്നു. ഉടമസ്ഥാവകാശം തെളിയിക്കുന്ന രേഖകള്‍ മോഹന്‍ലാലിന്റെ പക്കലില്ലെന്നും ശാസ്ത്രീയ പരിശോധനയില്‍ യഥാര്‍ഥ ആനക്കൊമ്പുകളാണ് കണ്ടെടുത്തതെന്ന് വ്യക്തമായതായും മലയാറ്റൂര്‍ ഡി.എഫ്.ഒ. കെ. വിജയനാഥന്‍ കോടതിയില്‍ അറിയിച്ചു. പിടിച്ചെടുത്ത ആനക്കൊമ്പുകള്‍ മജിസ്‌ട്രേറ്റ് മുമ്പാകെ ഹാജരാക്കാതെ വിട്ടുനല്‍കിയതിനെതിരേ പാലക്കാട്ടെ ഓള്‍ കേരള ആന്റി കറപ്ഷന്‍ ആന്‍ഡ് ഹ്യൂമന്‍ റൈറ്റ്‌സ് പ്രോട്ടക്ഷന്‍ കൗണ്‍സിലാണ് ഹര്‍ജി സമര്‍പ്പിച്ചിരുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha