ഇനി രണ്ട് ദിവസം മാത്രം.... സ്വാതന്ത്ര്യ ദിനം ആഘോഷിക്കാനായി ഇന്ത്യ ഒരുങ്ങി കഴിഞ്ഞു, കനത്ത സുരക്ഷയിലാകും സ്വാതന്ത്യ ദിനാഘോഷ ചടങ്ങുകള് നടക്കുക
ഇനി വെറും രണ്ട് ദിവസം മാത്രം. രാജ്യ തലസ്ഥാനം 69-ാമത് സ്വാതന്ത്ര്യദിനം ആഘോഷിക്കാനുള്ള തത്രപാടിലാണിപ്പോള്. എവിടെയും ആഘോഷിക്കാനുള്ള തിരക്ക്. മുംബൈ സ്ഫോടനക്കേസ് പ്രതി യാക്കൂബ് മേമനെ തൂക്കിലേറ്റിയതിനെ തുടര്ന്ന് കനത്ത സുരക്ഷയിലാകും സ്വാതന്ത്യ ദിനാഘോഷ ചടങ്ങുകള് നടക്കുക.
ആഘോഷങ്ങളുടെ മാറ്റ് കൂട്ടാന് രാജ്യത്തെ സ്വതന്ത്ര്യസമര സേനാനികളുടെ ചിത്രങ്ങള് ഉള്പ്പെടുത്തി ജഗ്മോഹന് കനോജിയ തയാറാക്കിയ പട്ടം കാഴ്ചകാരില് കൗതുകമുണര്ത്തി. സ്വാതന്ത്ര്യസമര സേനാനികളായ ഭഗത് സിംഗ്, റാണി ലക്ഷ്മി ഭായി, സുഭാഷ് ചന്ദ്ര ബോസ് എന്നിവര്ക്കു പുറമെ സ്വതന്ത്ര ഇന്ത്യയിലെ എല്ലാ പ്രധാനമന്ത്രിമാരുടേയും രാഷ്ട്രപതിമാരുടേയും ഫോട്ടോയുള്പ്പെടുത്തിയാണു സ്വാതന്ത്ര്യ ദിന സ്പെഷല് പട്ടം തയാറാക്കിയിരിക്കുന്നത്.
ഓഗസ്റ്റ് 15ന് ഡല്ഹിയില് ഭീകരവാദികളുടെ ആക്രമണമുണ്ടായേക്കുമെന്ന് രഹസ്യാന്വേഷണ ഏജന്സികള് മുന്നറിയിപ്പ് നല്കിയതിനാല് ഡല്ഹിയില് പഴുതടച്ച സുരക്ഷയാണ് പൊലീസ് ഒരുക്കുന്നത്. എയര്പോര്ട്ട്, റയില്വേ, മെട്രോ സ്റ്റേഷനുകളില് പരിശോധനകള് കര്ശനമാക്കി. മുംബൈ സ്ഫോടനക്കേസ് പ്രതി യാക്കൂബ് മേമന്റെ വധശിക്ഷ നടപ്പിലാക്കിയതിന്റെയും പഞ്ചാബിലെ ഗുര്ദാസ്പൂരിലും ജമ്മുകശ്മീരിലെ ഉധംപൂരിലും നടന്ന ഭീകരാക്രമണങ്ങളുടെ പശ്ചാത്തലത്തില് കനത്ത ജാഗ്രതയിലാണ് ഇത്തവണ രാജ്യം സ്വാതന്ത്യ ദിനം ആഘോഷിക്കുന്നത്.
പാക്ക് അധിനിവേശ കശ്മീരിലെ ലഷ്കറെ തയിബ ക്യാംപില് നിന്നും ഒന്പത് ഭീകരര് അതിര്ത്തിവഴി നുഴഞ്ഞുകയറിയിട്ടുണ്ടെന്നും ഇവര് ഡല്ഹിയിലെ വിവിധ ഇടങ്ങളില് സ്ഫോടനം നടത്താന് പദ്ധതിയിട്ടതായും രഹസ്യാന്വേഷണ വിഭാഗം മുന്നറിയിപ്പു നല്കിയിട്ടുണ്ട്. സ്വാതന്ത്ര്യ ദിനാഘോഷ ചടങ്ങുകള് നടക്കുന്ന ചെങ്കോട്ടയിലും പരിസരത്തുമായി 1,550 സിസിടിവി ക്യാമറകള് സ്ഥാപിക്കുന്നതിനൊപ്പം പതിനായിരം പോലീസുകാരെയും സുരക്ഷയ്ക്കായി വിന്യസിക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
