വിശക്കുന്ന മയിലിന് ഭക്ഷണം ലഭിച്ചുവെന്ന് ഉറപ്പാക്കാന്‍ മോദി പ്രധാനമന്ത്രിയുടെ ഓഫീസില്‍ നടന്ന സുപ്രധാനയോഗം നിര്‍ത്തിവെച്ചു..... പ്രധാനമന്ത്രി നരേന്ദ്രമോദി ലോലഹൃദയനാണെന്ന് കേന്ദ്ര ആഭ്യന്തരമന്ത്രി അമിത്ഷാ.
പ്രധാനമന്ത്രിയെക്കുറിച്ചുള്ള പുതിയ പുസ്തകമായ 'മോദി@20: ഡ്രീംസ് മീറ്റ് ഡെലിവറി'യുടെ പ്രകാശനച്ചടങ്ങിലാണ് ഷാ നരേന്ദ്രമോദിയുടെ മനസ്സലിവിനെ പ്രകീര്‍ത്തിച്ചത് . വിശക്കുന്ന മയിലിന് ഭക്ഷണം ലഭിച്ചുവെന്ന് ഉറപ്പാക്കാന്‍ മോദി പ്രധാനമന്ത്രിയുടെ ഓഫീസില്‍ നടന്ന സുപ്രധാനയോഗം നിര്‍ത്തിവെച്ചകാര്യത്തെകുറിച്ചാണ് ഷാ പറഞ്ഞത്. 

''രണ്ടുവര്‍ഷം മുന്‍പുനടന്ന യോഗത്തിനിടെയാണ് സംഭവം നടന്നത്. ആ സമയത്ത് ഒരു മയില്‍ പറന്നെത്തി മുറിയുടെ കണ്ണാടിച്ചില്ലില്‍ കൊത്തി. പ്രധാനമന്ത്രി കണ്ണിമചിമ്മാതെ കുറേനേരം അതിനെ നോക്കിനിന്നു.

മയിലിന് വിശക്കുന്നുണ്ടെന്ന് മനസ്സിലാക്കിയ അദ്ദേഹം ഉടനെ ജീവനക്കാരെ വിളിച്ചുവരുത്തി. ഭക്ഷണം നല്‍കാനും നിര്‍ദേശിക്കുകയുണ്ടായി. ഇത്രയും ഗൗരവമുള്ള യോഗത്തില്‍ ഏര്‍പ്പെട്ടിരിക്കുമ്പോള്‍ ഒരു മയിലിനെക്കുറിച്ച് ചിന്തിക്കുന്നത് അദ്ദേഹം എത്രമാത്രം ലോലഹൃദയനാണെന്ന് തുറന്നുകാണിക്കുന്നു.''-ഷാ പറഞ്ഞു.

പ്രധാനമന്ത്രി മോദി തന്റെ വസതിയില്‍ മയിലിന് ഭക്ഷണം കൊടുക്കുന്നതിന്റെ വീഡിയോ 2020-ല്‍ സാമൂഹികമാധ്യമങ്ങളില്‍ വ്യാപകമായി പ്രചരിക്കുകയുണ്ടായി.