ബിഹാറില്‍ തെരഞ്ഞെടുപ്പ് കാലത്താണെങ്കിലും അല്ലെങ്കിലും ആര്‍.ജെ.ഡി നേതാവ് ലാലു പ്രസാദ് യാദവിന്റെ മക്കള്‍ എന്നും ചര്‍ച്ചാവിഷയമാണ്. ഇത്തവണ നിയമസഭാ തെരഞ്ഞെടുപ്പില്‍ മത്സരിക്കുന്ന ലാലുവിന്റെ ഇളയ രണ്ട് മക്കളാണ് ഇപ്പോള്‍ വാര്‍ത്തയിലെ താരം. കഴിഞ്ഞ ദിവസം നാമനിര്‍ദേശ പത്രികയ്‌ക്കൊപ്പം ഇവര്‍ നല്‍കിയ സത്യവാങ്മൂലമാണ് പുതിയ വാര്‍ത്ത. ഇതില്‍ ലാലുവിന്റെ ഇളയ മകനും രഘോപുര്‍ മണ്ഡലത്തിലെ സ്ഥാനാര്‍ത്ഥിയുമായ തേജസ്വി പ്രസാദ് യാദവിന്റെ പ്രായം 26 വയസ്സാണ്. അതിലെന്താണ് വാര്‍ത്തയെന്നല്ലേ. തേജ്വസിയുടെ ജേഷ്ഠ സഹോദരനും മഹുവയിലെ സഥാനാര്‍ത്ഥിയുമായ തേജ് പ്രതാപ് യാദവിന്റെ പ്രായമാകട്ടെ 25 വയസ്സും. അതായത്, ജേഷ്ഠനേക്കാള്‍ ഒരു വയസ്സിനു മൂത്തതാണ് ഇളയവന്‍.
ഇതു മാത്രമല്ല സത്യവാങ്മൂലത്തിലുള്ള മറ്റ് വിവരങ്ങള്‍. തേജ് പ്രതാപിനേക്കാള്‍ സമ്പന്നനാണ് അനുജന്‍ തേജസ്വി. അനുജന് 1,40,93,822.23 രൂപയുടെ ജംഗമ വസ്തുക്കളുണ്ട്. എന്നാല്‍ തേജ് പ്രതാപിന്റെ ജംഗമ വസ്തുക്കളിലെ ആസ്തി 1,12,25,199,90 രൂപയാണ്. തേജസ്വിയുടെ സ്ഥാവര സ്വത്താകട്ടെ 91,52,500 രൂപയുടേതാണ്. ജേഷ്ഠനാകട്ടെ 88,72,500 രൂപയുടെ സ്ഥാവര സ്വത്താണുള്ളത്.
ബിഹാര്‍ ബോര്‍ഡ് ഇന്റര്‍മീഡിയറ്റ് പാസായെന്നാണ് തേജ് പ്രതാപിന്റെ വിദ്യാഭ്യാസ യോഗ്യതയായി കാണിച്ചിരിക്കുന്നത്. ജോലിയാകട്ടെ സാമൂഹ്യ പ്രവര്‍ത്തനവും ബിസിനസും. അനുജന്‍ തേജ്വസനി യാദവിന്റെ വിദ്യാഭ്യാസ യോഗ്യത ന്യൂഡല്‍ഹി ഡി.പി.എസ് ആര്‍.കെ പുരം സ്‌കൂളില്‍ നിന്നും ഒമ്പതാം കഌസ് പാസ്സായി. ക്രിക്കറ്റ് കളിക്കാരനും ബിസിനസ്സുകാരനും സാമൂഹ്യ പ്രവര്‍ത്തകനുമാണ് തേജസ്വി.
തേജ് പ്രതാപ് തിങ്കളാഴ്ചയാണ് നാമനിര്‍ദേശ പത്രിക സമര്‍പ്പിച്ചത്. എന്നാല്‍ തേജസ്വി മൂന്നാം തീയതി ശനിയാഴ്ച പത്രിക സമര്‍പ്പിച്ചിരുന്നു. ഇരുവര്‍ക്കുമൊപ്പം പിതാവ് ലാലുവും പത്രികാ സമര്‍പ്പണത്തിന് എത്തിയിരുന്നു. എന്നാല്‍ ഇളയ മകന് മൂത്തവനേക്കാള്‍ പ്രായം കൂടിയത് രാഷ്ട്രീയ ചാണക്യനായ ലാലു പോലും ശ്രദ്ധിച്ചില്ലെന്നതാണ് വാസ്തവം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha