വിഷം കഴിക്കാറായി കര്‍ഷകര്‍, കുപ്പിയുടെ എണ്ണം കൂട്ടി കൃഷി ഡയറക്ടര്‍. പഞ്ചാബില്‍ കീടനാശിനി ഇടപാടുമായി ബന്ധപ്പെട്ട അഴിമതിയില്‍ പോലീസ് നടത്തിയ റെയ്ഡില്‍ കൃഷി വകുപ്പ് ഡയറക്ടറുടെ വസതിയില്‍ നിന്ന് പിടിച്ചെടുത്തത് 53 കുപ്പി വിദേശമദ്യവും ലക്ഷക്കണക്കിന് രൂപയുടെ വിദേശ കറന്‍സികളും. അതും മുന്തിയ കമ്പനികളുടെ വിലയേറിയ സ്‌കോച്ചുകള്‍ തന്നെ. ഞായറാഴ്ച രാത്രിയാണ് കൃഷി ഡയറക്ടര്‍ മംഗള്‍ സാധുവിന്റെ വസതിയില്‍ റെയ്ഡ് നടന്നത്.
പഞ്ചാബിലെ പരുത്തി കര്‍ഷകര്‍ക്കായി ബയര്‍ കോര്‍പ് സയന്‍സ് ഒബ്‌ലെറോണ്‍ കീടനാശിനി കമ്പനിയില്‍ നിന്ന് 33 കോടി രൂപയുടെ കീടനാശിനി വാങ്ങിയത് സാധുവിന്റെ ഉത്തരവിന്റെ അടിസ്ഥാനത്തിലായിരുന്നു. 92,130 ലിറ്റര്‍ കീടനാശിനിയാണ് വാങ്ങിയത്. എന്നാല്‍ ഈ കീടനാശിനി ഉപയോഗിച്ച കര്‍ഷകര്‍ക്ക് യാതൊരു പ്രയോജനവും ലഭിച്ചില്ലെന്നു മാത്രമല്ല 11,780 ഏക്കര്‍ സ്ഥലത്തെ പരുത്തി കൃഷി കീടബാധമൂലം നശിക്കുകയും ചെയ്തിരുന്നു. ഇതോടെയാണ് കര്‍ഷകരും കോണ്‍ഗ്രസും കൃഷി വകുപ്പിലെ ഇടപാടിനെതിരെ രംഗത്തുവന്നത്.
സാധുവില്‍ നിന്നും 750 എം.എല്‍ അളവ് വരുന്ന മദ്യത്തിന്റെ കെയ്‌സുകളാണ് പിടിച്ചെടുത്തത്. ഇതില്‍ നാല് കെയ്‌സ് ബ്ലൂ ലേബല്‍, അഞ്ച് കെയ്‌സ് ഷിവാസ് റീഗല്‍, നാല് കെയ്‌സ് ബ്ലാക്ക് ലേബല്‍ കുപ്പികളുമാണ് പിടിച്ചെടുത്തത്. ഇവയുടെ വിലയാകട്ടെ ഓരോന്നിനും യഥാക്രമം 18,000രൂപ, 4,200 രൂപ, 5,500 രൂപ എന്നിങ്ങനെയാണ്.
ഇതിനു പുറമേ 7.5 ലക്ഷം രൂപ മൂല്യമുള്ള 11,634 യു.എസ് ഡോളര്‍, 1.13 ലക്ഷം രൂപ വിലമതിക്കുന്ന 2,290 കനേഡിയന്‍ ഡോളര്‍ എന്നിവയും അലമാരയില്‍ നിന്ന് കണ്ടെടുത്തു. സാധുവിന്റെ കിടപ്പുമുറിയില്‍ ഒളിപ്പിച്ചുവച്ച 4.14 ലക്ഷം രൂപയും പിടിച്ചെടുത്തിട്ടുണ്ട്. 1997 മുതല്‍ 2015 വരെ അഞ്ചിടങ്ങളിലായി വാങ്ങിക്കൂട്ടിയ പുരയിടങ്ങളുടെ രേഖകളും അന്വേഷണ സംഘത്തിന് കിട്ടി. മൊഹാലിയില്‍ 2700 ചതുരശ്ര അടിയും മക്ത്‌സറില്‍ 2500 ചതുരശ്ര അടിയും തരണ്‍ തരാണില്‍ 2700 ചതുരശ്ര അടിയും വിസ്തൃതിയുള്ള വീടുകളും ഇതില്‍ പെടും. അഞ്ചു കോടി രൂപയാണ് ഇതിന്റെ വിപണിമൂല്യം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha