അധിക അളവില്‍ മരുന്നുകഴിച്ച് ആശുപത്രിയിലായ ഷീന ബോറ വധക്കേസിലെ മുഖ്യപ്രതി ഇന്ദ്രാണി മുഖര്‍ജി ആശുപത്രി വിട്ടു. ഇവരെ ബൈക്കുള്ള ജയിലിലേക്ക് മാറ്റി. സിബിഐ ചോദ്യംചെയ്യലിനോട് ജയില്‍വെച്ച് സഹകരിക്കാമെന്ന് ഇന്ദ്രാണി കോടതിയെ അറിയിച്ചു. കഴിഞ്ഞ വെള്ളിയാഴ്ചയാണ് അവശനിലയിലായ ഇന്ദ്രാണി മുഖര്‍ജിയെ ആശുപത്രിയിലേക്ക് മാറ്റിയത്. 

രണ്ടുദിവസം ഇന്ദ്രാണി ബോധമില്ലാതെ കിടന്നു. വിഷാദത്തിനുള്ള മരുന്ന് അമിത അളവില്‍ ശരീരത്തില്‍ കണ്ടെത്തിയതിനെതുടര്‍ന്ന് ഇതിനുള്ള ചികിത്സയായിരുന്നു നടത്തിയിരുന്നത്. ആരോഗ്യനില ഭേദപ്പെട്ടതിനെതുടന്നാണ് ഇവരെ വീണ്ടും ജയിലിലേക്ക് മാറ്റിയത്. അതേസമയം ജയിലില്‍ സിബിഐ ചോദ്യം ചെയ്യുന്നതിന് തടസമില്ലെന്ന് കോടതിയെ ഇന്ദ്രാണി അറിയിച്ചിട്ടുണ്ട്.
ആശുപത്രിയില്‍ നിന്നുള്ള മെഡിക്കല്‍ റിപ്പോര്‍ട്ടും കോടതിയില്‍ സമര്‍പ്പിച്ചു. കേസന്വേഷണം ഏറ്റെടുത്ത സിബിഐ ഉടന്‍തന്നെ ഇന്ദ്രാണി മുഖര്‍ജിയെ ചോദ്യംചെയ്യുമെന്നാണ് അറിയുന്നത്. മകള്‍ ഷീന ബോറയെ വധിച്ചെന്ന കേസില്‍ മുഖ്യപ്രതിയാണ് ഒരു മാധ്യമ കമ്പനിയുടെ ചീഫ് എക്‌സിക്യൂട്ടീവ് ഓഫീസറായിരുന്ന ഇന്ദ്രാണി മുഖര്‍ജി.
2012ല്‍ മുന്‍ ഭര്‍ത്താവ് സഞ്ജീവ് ഖന്നയേയും ഡ്രവര്‍ ശ്യാം റായിയേയും കൂട്ടുപിടിച്ച് മകളെ കൊലപ്പെടുത്തി കാട്ടില്‍ വലിച്ചെറിഞ്ഞെന്നാണ് ഇന്ദ്രാണിക്കെതിരായ കേസ്. കഴിഞ്ഞദിവസം കോടതി ഇവരുടെ ജുഡീഷ്യല്‍ കസ്റ്റഡി ഒക്ടോബര്‍ 19 വരെ നീട്ടിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha