വദ്രയ്ക്കെതിരായ ആരോപണം; പാര്ലമെന്റില് ബഹളം, സര്ക്കാരിനെ പിന്തുണച്ച് എസ്.പിയും ബി.എസ്.പിയും
റോബര്ട്ട് വദ്ര അഴിമതി കാട്ടിയിട്ടുണ്ടെങ്കില് അതില് സോണിയ ഗാന്ധി എന്തു പിഴച്ചെന്ന് സമാജ്വാദി പാര്ട്ടിയും ബഹജുന് സമാജ്വാദി പാര്ട്ടിയും. സോണിയ ഗാന്ധിയുടെ മരുമകന് റോബര്ട്ട് വദ്രയ്ക്കെതിരെ ഉയര്ന്ന ആരോപണങ്ങള് പ്രത്യേക അന്വേഷണസംഘം അന്വേഷിക്കണമെന്ന് ആവശ്യപെട്ട് ബി.ജെ.പി പാര്ലമെന്റിന്റെ ഇരുസഭകളിലും ബഹളം വച്ചിരുന്നു. ബി.ജെ.പി അംഗങ്ങളുടെ ആവശ്യത്തോടു പ്രതികരിക്കുകയായിരുന്നു എസ.പി.യും ബി.എസ്.പിയും.
വദ്രയ്ക്കെതിരെ ഗുരുതരമായ ആരോപണങ്ങളാണ് ഹരിയാണയിലെ ഐ.എ.എസ്. ഉദ്യോഗസ്ഥന് അശോക് ഖെംക ഉന്നയിച്ചിരിക്കുന്നത്. ഗുഡ്ഗാവിലെ 3.5 ഏക്കര് സ്ഥലത്തിനായി വദ്ര വ്യാജരേഖ തയ്യാറാക്കിയെന്നും ഒട്ടേറെ കൃത്രിമകൈമാറ്റങ്ങള് നടത്തിയെന്നും ഖെംക കുറ്റപ്പെടുത്തുന്നു.
ഈ സ്ഥലം പിന്നീട് 58 കോടിക്കാണ് റിയല് എസ്റ്റേറ്റ് ഭീമന് ഡിഎല്എഫിന് കൈമാറിയത്. വഴിവിട്ടാണ് വാണിജ്യാടിസ്ഥാനത്തിലുള്ള കോളനികളുടെ ലൈസന്സ് വദ്രയ്ക്ക് ലഭിച്ചത്. ഇക്കാര്യത്തില് സംസ്ഥാന നഗരാസൂത്രണ വകുപ്പ് അനാവശ്യ തിടുക്കം കാട്ടിയെന്നും ചട്ടങ്ങളും വ്യവസ്ഥകളും ബലികഴിച്ചെന്നും അദ്ദേഹം കുറ്റപ്പെടുത്തുന്നു. വദ്ര- ഡിഎല്എഫ് ഇടപാടിനെക്കുറിച്ച് അന്വേഷിക്കാന് സംസ്ഥാനസര്ക്കാര് ചുമതലപ്പെടുത്തിയ മൂന്നംഗ സമിതിക്ക് നല്കിയ വിശദീകരണത്തിലാണ് ഖെംക വദ്രയ്ക്കെതിരെ ഗുരുതരമായ ആരോപണങ്ങള് ഉന്നയിച്ചത്.
അതേസമയം വദ്ര ഒരു വ്യക്തി മാത്രമാണെന്നും സഭയിലില്ലാത്ത അദ്ദേഹത്തെക്കുറിച്ച് ചര്ച്ച ചെയ്യാന് അനുവദിക്കില്ലെന്നും കോണ്ഗ്രസും വ്യക്തമാക്കി.
https://www.facebook.com/Malayalivartha
